ނިމިދިޔަ ސަރުކާރުގެ ދުވަސްވަރު ހައި ކޯޓުގައި އޮތް ރައީސް ޔާމީންގެ މައްސަލައިގެ ތެރެއަށް އެންމެ ބޮޑަށް އަތްބޭނި އެކަކީ މި ސަރުކާރުން ރީޖަނަލް އެއާޕޯޓްސް ކުންފުނީގެ މެނޭޖިން ޑިރެކްޓަރުގެ މަގާމަށް ހަމަޖައްސާފައި ހުންނެވި އަހުމަދު މުބީން ކަމަށް ކުރީގެ ޕޮލިސް ކޮމިޝަނަރު ހުސައިން ވަހީދު ތުހުމަތު ކުރައްވައިފި އެވެ.

ރައީސް ޔާމީން ވެސް ބައިވެރިވެވަޑައިގެންނެވި ޕީއެންއެފްގެ ޖަލްސާއެއްގައި ހުސައިން ވިދާޅުވީ ފ. އަތޮޅުގެ ރަށަކަށް މުބީން ގޮސް ކުރި ކޮމިއުނިކޭޝަންތައް އެކި މީހުންގެ ފަރާތުން އެކި ދިމަދިމާއިން އިވިފައިވާ ކަމަށެވެ.

"ރައީސް ޔާމީން ޖަލުގައި ހުންނެވިއިރު އިރު މުބީން ކުރީ ކީއްކަން އަޅުގަނޑުމެންނަށް އެނގޭ. ހައި ކޯޓުގައި އޮތް ރައީސް ޔާމީންގެ މައްސަލައިގެ ތެރެއަށް އެންމެ ބޮޑަށް އަތް ބޭނި އެކަކީ މުބީންކަން އަޅުގަނޑަށް ކެރިހުރެ ދަންނަވަން ކެރޭ،" ރައީސް ޔާމީންގެ ވެރިކަމުގައި ޕޮލިސް ކޮމިޝަނަރުކަން ކުރެއްވި ހުސައިން ވިދާޅުވި އެވެ. "ފ. އަތޮޅު ރަށެއްގައި އޭނާ ގޮސް ކުރި ކޮމިއުނިކޭޝަންތައް އަޅުގަނޑުމެންނަށް އިވިފައި ވަނީ އެކިއެކި ދިމަދިމާއިން އެކި މީސް މީހުން ތުރޫކޮށް."

މުބީން އަކީ ފ. ބިލެއްދޫ ދާއިރާގެ ކުރީގެ މަޖިލިސް މެންބަރެވެ. އޭނާ އިންތިޚާބުވީ ޖޭޕީގެ ޓިކެޓުގަ އެވެ. ނަމަވެސް ފަހުން ވަނީ ޕާޓީ ބަދަލުކޮށްފަ އެވެ.

ހުސައިން ވިދާޅުވީ މުބީން އަކީ، މި ހުރިހާ ކަމެއް ކޮށްދިނީމާ ވަލުދޮރާށީގައި އިން ކުޑަކުޑަ ދޮރަކުން ސިއްރު ސިރުން ވަނުމުން، މަގާމެއް ދީފައި ހުރި މީހެއް ކަމަށެވެ.

ރައީސް ޑރ. މުހައްމަދު މުއިއްޒު މިހާރު ވަނީ މުބީން އެމްޑީކަން ކުރައްވާ ރީޖަނަލް އެއާޕޯޓްސް، އެއާޕޯޓް ކޮމްޕެނީއާ އެއްކޮށްލަން ނިންމަވައިފަ އެވެ.

މި ތުހުމަތުތަކާ ގުޅިގެން، ރައީސް ޔާމީން ޖަލުން މިނިވަން ކުރުމަށް އޭނާ ކުރެއްވި މަސައްކަތްތަކުގެ ހަނދާންތައް މުބީން ވަނީ އާކުރައްވައިފަ އެވެ.

https://www.facebook.com/ahmed.mubeen.5055/posts/pfbid0FQTt8C86bkvoG9gtM5RKTDvq8bPo4ga3jktsyLQjfveXUCMQT3J4xYhv75v7keZFl?ref=embed_post