ހދ. ހިރިމަރަދޫގެ ރައްޔިތުން އެހެން ރަށަކަށް ބަދަލުކޮށްދިނުމަށް އަނެއްކާ ވެސް ސަރުކާރުގައި އެދިއްޖެ އެވެ.

މިދިޔަ ސެޕްޓެމްބަރު މަހު ވެސް އެ ރަށުގެ ކައުންސިލުން ވަނީ ލޯކަލް ގަވަނަންސް މިނިސްޓަރު އާދަމް ޝަރީފު އަރިހުން އެ ރަށު މީހުން ބަދަލުކޮށްދިނުމަށް އެދިފަ އެެވެ. އަދި އެރަށު ކައުންސިލުން އަނެއްކާ ވެސް މިނިސްޓަރަށް ވަނީ ބަދަލުކުރުން އަވަސްކޮށްދިނުމަށް އެދިފަ އެވެ.

އެ ރަށު ކައުންސިލުން ބުނިގޮތުގައި ބަދަލުކުރުން އަވަސްކޮށްދިނުމަށް އެދިފައިވަނީ އެ ރަށު ނެރު ތިލަވުުމުގެ ސަބަބުން އެ ރަށު ރައްޔިތުން ލަފާ ފުރުމުގައި ދިމާވެފައިވާ ދަތިތަކާ ގުޅިގެންނެވެ.

މިނިސްޓަރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ އެރަށުގެ ނެރު ތިލަވުމުގެ ސަބަބުން ރަށަށް ދަތުރުކުރާ ފަރާތްތަކަށް ކުރިމަތިވެފައިވާ ދަތިތައް މިނިސްޓްރީގެ ސަމާލުކަމަށް ގެނެސްފައިވާ ކަމަށެވެ. އަދި ގުޅުންހުރި ފަރާތްތަކާއެކު އެ މައްސަލަ ހައްލުކުރުމަށް މަސައްކަތްކުރާނެ ކަމަށް މިނިސްޓަރު ވަނީ ވިދާޅުވެފަ އެވެ.

މީގެ ކުރިން ހިރިމަރަދޫ ރައްޔިތުން ވަނީ ކ. ތުލުސްދޫއަށް ބަދަލުވާން ބޭނުންވާ ކަމަށް ބުނެފަ އެވެ. އަދި ކ. ތުލުސްދޫ ކައުންސިލުން ވަނީ އެ ރަށު ހުރިހާ ރައްޔިތުން ބަދަލުވާނަމަ މިކަމަށް މަރުހަބާ ކިޔާނެކަމަށް ބުނެފަ އެވެ.

އާބާދީ މަދު ހދ. ހިރިމަރަދޫގައި ދިރިއުޅެނީ އެންމެ 293 މީހުންނެވެ.