ދަރުމަވަންތަ ހޮސްޕިޓަލާ އިންވެގެން އޮންނަ ބިމުގައި 25 ބުރީގެ ކެންސަރު ހޮސްޕިޓަލެއް އަޅަން ހަމަޖެހި، އެ ހޮސްޕިޓަލުގެ ފުރަތަމަ މަރުހަލާގެ ހަދާ ޑިޒައިނާއި ކޮންސެޕްޓް މަސައްކަތް ނިމިފައިވާ ކަމަށް ސަރުކާރުން ބުނި ނަމަވެސް މިއީ ދޮގު މައުލޫމާތެއް ކަން އިތުބާރުހުރި ގޮތަކަށް އެނގިއްޖެ އެވެ.

"ހުރިހާ" އަށް މައުލޫމާތު ލިބިފައިވާ ގޮތުގައި ހޮސްޕިޓަލް އަޅަން ބިން ކަނޑައެޅުމުގެ އިތުރުން އިތުރު އެއްވެސް މަސައްކަތެއް މާލެ ސިޓީ ގްރޫޕް އޮފް ހޮސްޕިޓަލްސްްއިން ކޮށްފައެއް ނުވެ އެވެ.

މާލެ ސަރަހައްދުގައި ހިންގާ ސަރުކާރު ހޮސްޕިޓަލްތަކުގެ ޚިދުމަތް ރަނގަޅުކުރުމަށް ކުރަމުންދާ މަސައްކަތްތަކާ ގުޅޭ ގޮތުން މައުލޫމާތު ހިއްސާކުރުމަށް ނޫސްވެރިންގެ ބައްދަލުވުމެއް މާލެ ސިޓީ ގްރޫޕް އޮފް ހޮސްޕިޓަލްސްއިން މިއަދު ވަނީ ބާއްވާފަ އެވެ.

މައުލޫމާތު ލިބިފައިވާ ގޮތުގައި މި ޕްރޮޖެކްޓަަށް ބޭނުންވާ ފީސިބިލިޓީ މަސައްކަތާއި ފަންޑިން މަސައްކަތް ވެސް ސަރުކާރުން އަދި ނުކުރެ އެވެ. ކެންސަރަށް ހާއްސަ ހޮސްޕިޓަލެއް އަޅަން ކުރިން ނިންމާފައިވަނީ ލާމު އަތޮޅުގަ އެވެ. މި ޕްރޮޖެކްޓްގެ ލޮކޭޝަން ވަނީ މިހާރު މާލެއަށް ބަދަލުވެފަ އެވެ.

ކެންސަރު ބައްޔަށް ބޭނުންވާ ފަރުވާ ރާއްޖޭން ބޭރުން ހޯދުމަށް އާސަންދައިން ކޮންމެ އަހަރަކު ވެސް އެތައް މިލިއަން ރުފިޔާއެއް ހަރަދުކުރެ އެވެ.