ނޫސްވެރިކަމުގެ އިނާމާ މެދު ކުރެވޭ ތުހުމަތުތައް ބަލަން މީޑިއާ ކައުންސިލުން މިއަދު ނިންމައިފި އެވެ.

މިއަދު ބޭއްވި މީޑިއާ ކައުންސިލްގެ ހަތް ވަނަ ދައުރުގެ 45 ވަނަ ޖަލްސާގައި ނިންމާފައި ވަނީ ނޫސްވެރިކަމުގެ އިނާމާ ގުޅުންހުރި އެންމެހާ ބޭފުޅުންގެ ފަރާތުން މައުލޫމާތު ހޯދައި, މިކަމާ ގުޅިގެން އުފެދިފައިވާ ކަންބޮޑުވުންތަކާއި މައްސަލަތަކާ ގުޅޭ ރިޕޯޓެއް ނެރުމަށެވެ.

މީޑިއާ ކައުންސިލްގެ އެވޯޑާ ގުޅިގެން ތުހުމަތު ކުރަނީ ސަރުކާރުންނެވެ. ސަރުކާރުން އެ ތުހުމަތު ކުރަނީ ސަރުކާރުންް ހިތްހަމަނުޖެހޭ ނޫސްވެރިއަކަށް އެވޯޑު ލިބުމުންނެވެ. އަދަދު ނޫހުން ގެނެސްދިން ރައީސް ޑރ. މުހައްމަދު މުއިއްޒު އެމަނިކުފާނުގެ ދޮންމަންމައަށް ހެދި އިހާނެތިގޮތުގެ ތަފްސީލް ހިމެނޭ ސްކީލާން ޑޮކިއުމެންޓްރީއަށް އެވޯޑު ލިބުން ސަރުކާރުން އަންނަނީ މީޑިއާ ކައުންސިލަށް ނުފޫޒުފޯރުވަން މަސައްކަތް ކުރަމުންނެވެ. އެގޮތުން މީޑިއާ ކައުންސިލްގެ ރައީސް އަހްމަދު މުސްތަފާ ޕީއެސްއެމްގައި އަދާކުރަމުންގެންދިޔަ ވަޒީފާއިން ވަކިކޮށް ބިރުދައްކާފައިވެ އެވެ.

ސަރުކާރާ އެއްކޮޅަށް ބަޔާންދޭން ޝަރުތުކޮށް އޭނާއަށް ވަނީ އަލުން ވަޒީފާދީފަ އެވެ. އެގޮތުން ވަޒީފާ އަލުން ދިނުމުން މުސްތަފާ ވަނީ ސްކީލާން ޑޮކިއުމެންޓްރީ ގޯސް ކަމަށް ބުނެ ބަޔާނެއް ނެރެފަ އެވެ.

އެ އެވޯޑް ހަފްލާއަށް ފަހު ސަރުކާރުން ބިރުދެއްކުމުން މި އަހަރުގެ އެވޯޑަށް އިންސާފުކުރި ޖަޖުންވެސް ވަނީ ތަހުގީގީ ނޫސްވެރިކަމުގެ އެވޯޑު ދިނީ އުސޫލާ ހިލާފަށް ކަމަށް ބުނެ އަމިއްލަ ނިންމުމާ ދެކޮޅަށް ބަޔާނެއް ނެރެފަ އެވެ.