ބޮލީވުޑުގެ މަޝްހޫރު ތަރި ކެޓްރީނާ ކައިފްއަކީ އޭނާގެ ފިރިމީހާ ވިކީ ކައުޝަލްއަށްވުރެ ކާމިޔާބު ތަރިއެއް ކަމަށް ވިކީ އެއްބަސްވެއްޖެ އެވެ.

ވިކީ މިހެން ބުނެފައިވަނީ ބީބީސީ އޭޝިއާއަށް ދިން އިންޓަވިއުއެއްގައި އޭނާއަށްވުރެ ކެޓްރީނާ ކާމިޔާބު ކަމަށް ގަބޫލު ކުރަންތޯ އެހުމުން ދިން ޖަވާބުގަ އެވެ.

ވިކީ ބުނީ ހިތާއި ހިތުގެ ގުޅުމަކުން ދެ މީހަކު ގުޅުމުން މުދަލާއި މަޝްހޫރުކަން ފަދަ ކަންކަމަކީ މާއްދީ ކަންކަން ކަމަށާއި އެކަމުން އެމީހުންގެ ގުޅުމަށް އެއްވެސް ތަފާތެއް ނާންނާނެ ކަމަށެވެ.

އެގޮތުން އެކަކު އަނެކަކުގެ ރަނގަޅު ކަންތައްތަކާއި ގޯސް ކަންތައްތައް ވެސް އެނގޭނެ ކަމަށާއި ކައިވެންޏާ ހިސާބަށް ދެވޭނީ އެހުރިހާ ކަމެއް ގަބޫލު ކޮށްގެން ކަމަށް ވިކީ ބުންޏެވެ.

ވިކީއަކީ ވަރަށް ގިނައިން އޭނާއާއި ކެޓްރީނާގެ ގުޅުމުގެ ވާހަކަ މީޑިއާއާ ހިއްސާކުރާ ފަރާތެކެވެ. އެ ދެމީހުން ކައިވެނިކުރީ 2021 ވަނަ އަހަރު އެވެ.

ވިކީގެ ކުރިއަށްހުރި ފިލްމީ މަސައްކަތްތަކަށް ބަލާލާއިރު ދެން އެންމެ އަވަހަށް އޭނާ ފެނިގެންދާނީ "ޗާވާ" އަދި "ލަވް އެންޑް ވާ" އިންނެވެ.