މި ސަރުކާރުން ފަށާފައިވާ ފަސް މިލިއަން ގަސް މަޝްރޫއުގެ ދަށުން މޯލްޑިވްސް އިސްލާމިކް ބޭންކް (އެމްއައިބީ) އިން 1000 ގަސް އިންދައިފި އެވެ.

އެމްއައިބީން އިއްޔެ ބޭއްވި ގެންދިޔަ ގަސް އިންދުމުގެ ހަރަކާތުގެ ތެރެއިން 1000 ގަސް އިންދާފައި ވަނީ ޕިކްނިކް އައިލެންޑެއްގެ ގޮތުގައި ބޭނުންކުރާ ކ. ކުޑަގިރީގަ އެވެ.

އެމްއައިބީގެ މި ހަރަކާތް ރާވާ އިންތިޒާމުކޮށްފައި ވަނީ ކްލީން މޯލްޑިވްސް ޖަމިއްޔާއިންނެވެ. މީގެ އިތުރުން އެޗްޑީސީއާއި އެމްޓީސީސީ، އޭޝިއާ ފޯވަޑިން، އައިކެއާ އޮޕްޓިކަލްސް، މޯލްޑިސް ޕޮލިސް ސާވިސް އަދި ދަ ހޯކްސް ޕްރައިވެޓް ލިމިޓެޑުން ވަނީ ޕާޓްނަރުންގެ ގޮތުގައި މި ހަރަކާތުގައި ބައިވެރިވެފަ އެވެ.

މީގެ އިތުރުން މި ހަރަކާތުގައި ގިޔާސުއްދީން ސްކޫލްގެ ގިނައަދަދެއްގެ ދަރިވަރުންނާއި ބެލެނިވެރިން ވަނީ ބައިވެރިވެފަ އެވެ.

މި ހަރަކާތުގައި އެމްއައިބީގެ ސީއީއޯ މުފައްދަލް އިދްރީސް ހުމްރީ ދެއްކެވި ވާހަކާގައި ތިމާވެށި ހިމާޔަތް ކުރުމަކީ ކޮންމެ މީހެއްގެ ވެސް ފަރުދީ ޒިންމާއެއް ކަމަށް ދެކިގެން ކުރިޔަށް ދިއުމަށް ވަނީ ނަސޭހަތްތެރިވެފަ އެވެ.

ފަސް މިލިއަން ގަސް އިންދުމުގެ ޕްރޮގްރާމް ފަށާފައި ވަނީ މިދިޔަ އަހަރު ޖޫން 5 ކަމަށްވާ ތިމާވެށި ދުވަހު އެވެ. މިހާތަނަށް މި ޕްރޮގްރާމްގެ ގިނަ އިވެންޓްތަކެއް ވަނީ ބާއްވާފަ އެވެ.