ސިޔާސީ ޕާޓީތަކުގެ ޤާނޫނާ ޚިލާފުވާ މީހަކު 30،000 ރުފިޔާއާއި 75،000 ރުފިޔާއާ ދެމެދުގެ އަދަދަކަށް ޖޫރިމަނާ ކުރެވޭ ގޮތަށް އަދި އެމީހަކު ނިސްބަތްވާ ޕާޓީއެއް 100،000 ރުފިޔާއިން ޖޫރިމަނާ ކުރެވޭ ގޮތަށް ސިޔާސީ ޕާޓީތަކާ ބެހޭ ޤާނޫނަށް އިސްލާހު ގެނެސް މަޖިލީހުން އެބިލު މިއަދު ފާސްކޮށްފި އެވެ.

މަޖިލީހުން މިއަދު މި ބިލު ފާސްކޮށްފައިވަނީ 61 މެންބަރުންގެ ވޯޓުންނެވެ. މި ބިލާ ދެކޮޅަށް 10 މެންބަރަކު ވޯޓު ދެއްވި އެވެ.

މި ބިލުގައި ސިޔާސީ ޕާޓީތަކުގެ ޤާނޫނުގެ 10 ވަނަ މާއްދާ އުވާލަންވެސް ވަނީ ހުށަހަޅާފަ އެވެ. އެއީ ސިޔާސީ ޕާޓީތަކުގެ ޕްރައިމެރީތަކާ ގުޅޭ މާއްދާ އެވެ.

މީގެ އިތުރުން, ސިޔާސީ ޕާޓީ ހިންގުމަށް ދައުލަތުގެ އަހަރީ ބަޖެޓްގައި އެ އަހަރަކަށް ލަފާ ކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ބަދަލުކުރަން ވަނީ ހުށަހަޅާފަ އެވެ. މިއީ ކުރިން ދޭ އަދަދަށް ވުރެ ވަރަށް މަދު އަދަދެކެވެ.

މި ބިިލުގެ އިތުރު އިސްލާހުތަކުގެ ތެރޭގައި އުވާލާ ޕާޓީއެއްގެ ކުލަ އަދި ނިޝާން 5 އަހަރު ދުވަސްވަންދެން ބޭނުން ނުކުރެވޭ ގޮތަށްވެސް ވަނީ ފާސްކޮށްފަ އެވެ.

މި ބިލު ހުށަހެޅުމުގެ ބޭނުމެއްގެ ގޮތުގައި ސިޔާސީ ޕާޓީތައް ހިންގުމަށް ދައުލަތުގެ ބަޖެޓުން ފައިސާ ދިނުމަށް ސިޔާސީ ޕާޓީގެ ގާނޫނުގައި ކަނޑައަޅާފައިވާ އުސޫލު އިސްލާހުކުރުމަށާއި، ގާނޫނާ ޚިލާފުވާ ހާލަތްތައް މަދުކުރުމުގައި ސިޔާސީ ޕާޓީތަކުން ޒިންމާ އުފުލުމަށް ބާރުއެޅުމުގެ ގޮތުން ގާނޫނާ ޚިލާފުވާ ވަކިވަކި ފަރާތް ޖޫރިމަނާކުރުން ކަމުގައި ސަރުކާރުން ވަނީ ބުނެފަ އެވެ.