ގައިންގަޔަށް އަރާ ބައްޔެއް ކަމަށްވާ ހިމަބިހި ޖެހޭ މީހުންގެ އަދަދު އިތުރުވަމުން ދިއުމާއި ގުޅިގެން ބަލި ފެތުރިދާނެކަމުގެ އިންޒާރު ދުނިޔޭގެ ސިއްހަތު ޖަމުއިއްޔާ (ޑަބްލިޔުއެޗްއޯ) އިން ދީފި އެވެ.

2023 ވަނަ އަހަރު މުޅި ދުނިޔޭން މި ބަލި ޖެހުނުކަމަށް 10.3 މިލިއަން ކޭސް ރިކޯޑްކޮށްފައިވާއިރު، އެ އަދަދަކީ 2022 ވަނަ އަހަރާއި އަޅާ ބަލާއިރު ވިހި އިންސައްތަ އިތުރު އަދަދެއް ކަމަށް ތަފާސްހިސާބުތަކުން ދައްކަ އެވެ. މި ބަލީގައި 2023 ވަނަ އަހަރު 107,500 މީހުން މަރުވެފައިވެ އެވެ.

އެމެރިކާގެ ސެންޓާސް ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ) އާއި ޑަބްލިޔުއެޗްއޯ ގުޅިގެން ޝާއިއުކުރި ދިރާސާއެއްގައި ބުނެފައިވާ ގޮތުގައި ހިމަބިހީގެ ކޭސްތައް އިތުރުވެފައި ވަނީ އެ ބަލިން ދިފާއުވުމަށް ވެކްސިން ދޭ މިންވަރު މަދުވުމުންނެވެ.

ހިމަ ބިއްސަކީ ރާއްޖެއިން ނައްތާލައިފައިވާ ބައްޔެއް ކަމުގައި ދުނިޔޭގެ ސިއްހަތު ޖަމިއްޔާއިން 2017 ވަނަ އަހަރު ވަނީ ކަނޑައަޅާފަ އެވެ. ރާއްޖެއިން ހިމަބިހި ނައްތާލެވުނުކަން އިއުލާނުކުރި ފަހުން އެންމެ ފުރަތަމަ ހިމަބިއްސަށް ބަޔަކު ޕޮޒިޓިވްވީ ކޮވިޑު-19 ބަލިމަޑުކަމުގެ ފުރަތަމަ ދުވަސްކޮޅު، 2020 ވަނަ އަހަރުގެ ޖެނުއަރީގަ އެވެ.

އޭގެ ފަހުން މިދިޔަ އަހަރުގެ އޭޕްރީލް މަހު އައްޑޫއިން ހިމަބިހި ޖެހިފައިވާ މީހެއް ފެނުނު ފަހުން އިތުރު ދެ މީހަކު ވަނީ އެބައްޔަށް ޕޮޒިޓިވްވެފަ އެވެ. އެ އަހަރުގެ ސެޕްޓެމްބަރު މަހުވެސް ވަނީ އިތުރު ކޭސްއެއް ފެނިފަ އެވެ.

ހިމަބިހިން ރަށްކާތެރިވުމަށް ރާއްޖޭގައި މީސްލްސް ވެކްސިން 1983 ވަނަ އަހަރުން ފެށިގެން ދަނީ ދެމުންނެވެ.

ހިމަބިހި ޖެހިފައިވާ މީހެއްގެ ކިބައިން ފެންނާނެ ބައެއް އަލާމަތްތަކުގެ ތެރޭގައި ހުން އައުމާއެކު ހަމުގައި ރަތްބިހި ނެގުން ހިމެނެ އެވެ. މީގެ އިތުރުން ކެއްސުމާއި، ނޭފަތުން އަރިދަފުސް ފޭބުމުގެ އިތުރުން ލޯ ރަތްވުން ވެސް ހިމެނެ އެވެ.