ރާއްޖޭގެ އެކި ސަރަހައްދުތަކުގައި އާބަން ސެންޓަރުތައް ތަރައްގީ ކުރުމަަށްޓަކައި ސަރުކާރުން ހުށަހަޅާފައިވާ އާބަން ޑިވެލޮޕްމަންޓް ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.

މިއަދު މި ބިލު މަޖިލީހުގައި ފާސްވެފައިވަނީ 70 މެންބަރުންގެ ވޯޓުންނެވެ. މި ބިލާ ދެކޮޅަށް 11 މެންބަރަކު ވޯޓުދެއްވި އެވެ. ސަރުކާރުގެ ފަރާތުން މި ބިލު މަޖިލީހަށް ހުށަހަޅާފައިވަނި ވިލިނގިލި ދާއިރާގެ މެންބަރު އާޒިމް އަބްދުލް އަޒީޒް އެވެ.

މި ބިލާ ދެކޮޅަށް އެމްޑީޕީގެ މެންބަރުންވެސް އަދި ސަރުކާރުން ލޯކަލް ގަވާމެންޓް މިނިސްޓްރީއިންވެސް ވަނީ ކަންބޮޑުވުން ފާޅުކޮށްފަ އެވެ. މި ބިލުގައި ލާމަރުކަޒީ ޤާނޫނާ ތަޢާރުޒްވާ ކަންކަން ހުރިކަން ފާހަގަކޮށް، މި ބިލު ފާސްވެއްޖެނަމަ ކައުންސިލްތަކުގެ ބާރު ކެނޑޭނެކަމަށް ލޯކަލް ގަވަމެންޓް މިނިސްޓްރީއާއި އިދިކޮޅު އެމްޑީޕީއިންވެސް ވަނީ ބުނެފަ އެވެ.

މި ބިލު ތަސްދީގުވުމާއި އެކު ބޮޑެތި ބާރު ތަކަކާއިއެކު އާބަން އޮތޯރިޓީގެ ނަމުގައި އާ އޮތޯރިޓީއެއް އުފައްދާނެ އެވެ. މި އޮތޯރިޓީއަކީ ހައުސިން އެންޑް އާބަން ޑިވެލޮޕްމަންޓް މިނިސްޓްރީގެ ދަށުން ހިންގާނެ އޮތޯރިޓީއެކެވެ. މި އޮތޯރިޓީގެ ސަބަބުން ރާއްޖޭގެ އާބަން ސަރަހައްދުގެ ގޮތުގައި ސަރުކާރުން ކަނޑައަޅާފައިވާ ސަރަހައްދުތަކުގެ ކައުންސިލްތަކުގެ ބާރު ކެނޑިގެންދާނެ އެވެ.

ސަރުކާރުން މިހާރު ވަނީ އާބަން ސެންޓަރުތަކުގެ ގޮތުގައި ތަރައްގީކުރާނެ ރަށްތައް ކަނޑައަޅައިފަ އެވެ. އެއީ، ރ. އުނގޫފާރު، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ ، ބ. އޭދަފުށި، އަދި ލ. ފޮނަދޫ އެވެ.