ދެކުނު ކޮރެއާގައި މާޝަލް ލޯ އިއުލާން ކުރިތާ ކުޑަ ވަގުތުކޮޅެއްގެ ތެރޭގައި އުވާލައިފި އެވެ.

ދެކުނު ކޮރެއާގެ ރައީސް ޔޫން ސުކް ޔެއޯލް ކުއްލި ގޮތަކަށް އަންގާރަ ދުވަހު ވަނީ މާޝަލް ލޯ އަށް އަމަލުކުރަން ނިންމާފައިވާކަން އިއުލާން ކުރައްވާފަ އެވެ. ނަމަވެސް މާޝަލް ލޯ އިޢުލާންކުރިތާ ގަޑިއިރުތަކެއްގެ ތެރޭގައި އުވާލުމަށް ނިންމާފައިވަނީ، ސިޔާސީ ހަރަކާތްތައް މަނާކުރުމަށާއި މީޑިއާ ސެންސަރުކުރުމަށް އޭނާ ކުރި މަސައްކަތާއި އެ ގައުމުގެ މަޖިލިސް މެންބަރުންގެ ބޮޑު އަޣުލަބިއްޔަތަކުން ދެކޮޅުވުމާއި ގުޅިގެންނެވެ.

ދެކުނު ކޮރެއާގެ އެންމެ ބޮޑު ސިޔާސީ ހަމަނުޖެހުމުގައި، ޔޫން ވަނީ އޭނާގެ ސިޔާސީ ވާދަވެރިންގެ ތެރޭގައި ތިބި "ދައުލަތާ ދެކޮޅު ބާރުތައް" ހުއްޓުވުމަށް މާޝަލް ލޯ އިއުލާންކޮށް އަސްކަރީ ގާނޫނަށް އަމަލުކުރަން ފެއްޓެވިކން އިއުލާންކުރައްވާފަ އެވެ،

ނަމަވެސް، ޕާލަމެންޓު މެންބަރުންގެ އިއްތިފާޤުން މި ޤަރާރު ބަލައިނުގަނެ ވަނީ މާޝަލް ލޯއަށް އަމަލުކުރާ ގަރާރު އުވާލަން ފާސްކޮށްފަ އެވެ. ޔޮންހަޕް ނިއުސް އޭޖެންސީން ބުނެފައިވާ ގޮތުގައި ކެބިނެޓުން ވަނީ މިއަދު ފަތިހު މާޝަލް ލޯ އުވާލުމަށް އެއްބަސްވެފަ އެވެ.

ނޭޝަނަލް އެސެމްބްލީ ޕާލަމެންޓު ކުރިމަތީގައި ތިބި މުޒާހަރާކުރާ މީހުން ވަނީ އެކަމާއި އުފާފާޅުކޮށްފަ އެވެ.

މައިގަނޑު އިދިކޮޅު ޕާޓީ ކަމުގައިވާ ޑިމޮކްރެޓިކް ޕާޓީން ވަނީ 2022 އިން ފެށިގެން ވެރިކަމުގައި ހުންނެވި ޔޫން އިސްތިއުފާދެއްވުމަށް ނުވަތަ އިމްޕީޗްކުރުމާ ކުރިމަތިލާން ޖެހިވަޑައިގަންނަވާނެ ކަމަށް ބުނެފަ އެވެ.

މާޝަލް ލޯ އެ ގައުމުގައި ތަންފީޒުކުރަން ނިންމެވި ނިންމެވުން ރައީސް ޔޫން އަނބުރާ ގެންދެވުމުން ދެކުނު ކޮރެއާގެ ވޮން ފައިސާ ވަނީ ޑޮލަރާ އަޅާބަލާއިރު ދެ އަހަރު ތެރޭގައި ކުރިމަތިވި އެންމެ ދަށް އަގުން އަރައިގަނެފަ އެވެ. އަދި ހަމައެހެންމެ ދެކުނު ކޮރެއާގެ ސްޓޮކްތަކާ ގުޅިފައިވާ އެކްސްޗޭންޖް ޓްރޭޑް ފަންޑުތަކުގެ ގެއްލުންތައްވެސް ވަނީ ކުޑަވެފަ އެވެ.

ސިޔާސީ ވާދަވެރިންނާ ދެކޮޅަށް އަމާޒުކޮށް މާޝަލް ލޯ ގެންނަން ހުށަހެޅި ޤަރާރު ޕާލަމެންޓުގެ 190 މެންބަރުން ދެކޮޅުހަދާ ވަނީ ބޭރުކޮށްފަ އެވެ. ރައީސް ޔޫންގެ އަމިއްލަ ޕާޓީންވެސް ވަނީ މި ޤަރާރު އުވާލުމަށް ގޮވާލާފަ އެވެ. ދެކުނު ކޮރެއާގެ ޤާނޫނު ބުނާގޮތުން، ރައީސް ވަގުތުން މާޝަލް ލޯ އުވާލަންޖެހޭނީ ޕާލަމެންޓުން އަޣުލަބިއްޔަތު ވޯޓަކުން އެކަމަށް އެދިއްޖެނަމަ އެވެ.

1980 ގެ އަހަރުތަކުން ފެށިގެން ޑިމޮކްރަސީއެއްގެ ގޮތުގައި އޮތް، އެމެރިކާގެ އެކުވެރި އަދި އޭޝިއާގެ މުހިންމު އިޤްތިސޯދެއް ކަމުގައިވާ މި ޤައުމުގައި ދިމާވި މި ހަމަނުޖެހުމުން ބައިނަލްއަޤްވާމީ ކަންބޮޑުވުން އުފެދުނެވެ.

ޔޫން ޓީވީ އެޑްރެސްއެއްގައި މާޝަލް ލޯ އިޢުލާން ކުރެއްވުމާއެކު، ދެކުނު ކޮރެއާގެ ސިފައިން ބުނެފައިވަނީ ޕާލަމެންޓާއި ސިޔާސީ ޕާޓީތަކުގެ ހަރަކާތްތައް މަނާކުރެވޭނެ ކަމަށާއި، މީޑިއާއާއި ޕަބްލިޝަރުން މާޝަލް ލޯ ކޮމާންޑުގެ ބާރުގެ ދަށަށް ގެނެވޭނެ ކަމަށެވެ.

މިކަމާއި ގުޅިގެން އެމެރިކާގެ ޑެޕިއުޓީ ސެކްރެޓަރީ އޮފް ސްޓޭޓް ކާޓް ކެމްބެލް ވިދާޅުވެފައިވަނީ އެމެރިކާއިން ދެކުނު ކޮރެއާގެ ކަންތައްތައް ބަލަމުންދަނީ "ވަރަށް ބޮޑު ކަންބޮޑުވުމާއެކު" ކަމަށެވެ. ނިއުކްލިއާ ހަތިޔާރު ގެންގުޅޭ އުތުރު ކޮރެއާއާ ދެކޮޅަށް ރައްކާތެރިކަން ދިނުމަށްޓަކައި 28,500 އެމެރިކާ ސިފައިން ދެކުނު ކޮރެއާގައި ތިބެ އެވެ.

މިއީ 1980 އިން ފެށިގެން ދެކުނު ކޮރެއާގައި މާޝަލް ލޯ އިޢުލާންކުރި ފުރަތަމަ ފަހަރެވެ. އެ އަހަރު ޗުން ޑޫ ހްވާންގެ އިސްނެގުމުގެ ދަށުން މިލިޓަރީ އޮފިސަރުންގެ ގްރޫޕަކުން އޭރުގެ ރައީސް ޗޮއި ކިޔު-ހާއަށް މަޖުބޫރުކޮށްގެން މާޝަލް ލޯ އިޢުލާންކުރުވީ އިދިކޮޅު ފަރާތްތަކާއި، މަސައްކަތްތެރިންނާއި ދަރިވަރުން ޑިމޮކްރެޓިކް ސަރުކާރެއް އަނބުރާ ގެނައުމަށް ގޮވާލަމުންދިޔަ އަޑުތައް މަރުވާލުމަށެވެ.