ދެކުނު ކޮރެއާގެ ރައީސް ޔޫން ސުކް ޔެއޯލް އަންގާރަ ދުވަހުގެ ރޭ ކުއްލިއަކަށް މާޝަލް ލޯ އިއުލާނުކުރުމާ ގުޅިގެން އެ ޤައުމުގެ ސިޔާސީ މަޝްރަހު ވަނީ ވަރަށް ބޮޑަށް ހަލަބޮލިވެފަ އެވެ. ސިޔާސީ ހަލަބޮލިކަމުގެ ތެރެއިން ރައީސް ޔޫން ވަނީ އަމިއްލަ ޕާޓީގެ ވެރިޔާ ހަން ދޮންގް-ހޫން އާއި އިދިކޮޅު ޕާޓީގެ ވެރިޔާ ލީ ޖެ-މިޔުންގް އަދި އިތުރު އިދިކޮޅު މެންބަރުން ހައްޔަރުކުރުމަށް އަމުރުކުރައްވާފަ އެވެ.

އަންގާރަ ދުވަހު އެ ގައުމުގައި ކުއްލި ނުރައްކަލުގެ ހާލަތު އިއުލާންކުރައްވާ އަސްކަރީ ގާނޫނު ތަންފީޒު ކުރައްވަން ރައީސް ޔޫން ކުރެއްވި މަސައްކަތް ވަނީ ނާކާމިޔާބު ވެފަ އެވެ. މަޖިލީހުގެ 190 މެންބަރުން ދެކޮޅުވެ އެ އަމުރު ވަނީ ބާތިލުކޮށްފައިވެ އެވެ. މިއާއެކު މިހާރު މަޖިލީހުގައި ކުރަމުންދަނީ ރައީސް ޔޫން މަގާމުން ދުރުކުރުމުގެ މަސައްކަތެވެ.

ހޮނިހިރު ދުވަހު އިމްޕީޗްމަންޓް ވޯޓެއް ނެގުމަށް ވަނީ ހަމަޖެހިފަ އެވެ. މި ވޯޓު ފާސްވާނީ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތު ލިބިއްޖެނަމަ އެވެ.

ރައީސް ޔޫންގެ އަމިއްލަ ޕާޓީ، ޕީޕަލްސް ޕަވާ ޕާޓީ (ޕީޕީޕީ)ގެ ވެރިޔާ ހަން ދޮންގް-ހޫން ވަނީ ރައީސް އަވަހަށް ސަސްޕެންޑްކުރުމަށް ގޮވާލާފަ އެވެ. އޭނާ ވިދާޅުވި ގޮތުގައި ރައީސް ޔޫން މަޤާމުގައި ދެމިހުރެއްޖެނަމަ ޑިމޮކްރަސީއަށް "ބޮޑު ނުރައްކަލެއް" ކުރިމަތިވާނެ އެވެ.

ޤައުމުގެ އެކި ކަންކޮޅުތަކުގައި ޔޫން އިސްތިއުފާ ދިނުމަށް ގޮވާލާ މުޒާހަރާތައް ދަނީ ކުރަމުންނެވެ. އަދި ފުލުހުން ވަނީ ރައީސް ޔޫންއާ ދެކޮޅަށް "ބަޣާވާތުގެ" ތުހުމަތުގައި ތަހުގީގެއް ފަށާފަ އެވެ. ސާވޭތަކުން ދައްކާ ގޮތުގައި ރައްޔިތުންގެ 70 އިންސައްތައަށްވުރެ ގިނަ މީހުން ބޭނުންވަނީ ރައީސް އިމްޕީޗްކުރުމަށެވެ. މި ހަމަނުޖެހުންތަކާއި ގުޅިގެން ރައީސް ޔޫންގެ މަޤްބޫލުކަން ވަނީ 13 އިންސައްތައަށް ވެއްޓިފަ އެވެ.