އިނގިރޭސި ޝާހީ އާއިލާގެ ހަބަރުތަކަކީ ދުނިޔޭގެ އެކި ކަންކޮޅުތަކުގެ މީހުން ވަރަށް ޝައުގުވެރިކަމާއެކު އަބަދުވެސް ބަލާ ހަބަރު ތަކެކެވެ.

މިގޮތުން އެންމެ ފަހުން މީޑިއާގައި ދައުރުވި ހަބަރަކީ އެ އާއިލާއަށް ނިސްބަތްވާ ޕްރިންސް ހެރީއާއި މޭގަން މާކަލްގެ ކައިވެނި ރޫޅި ވަރިވާން އުޅޭ ހަބަރެވެ. މި އަޑުތައް މީޑިއާއަށް ފެންމަތި ވެފައިވަނީ ހެރީއާއި މޭގަން ވަކިވަކިން ބައެއް ހަފްލާތަކުގައި ބައިވެރިވާން ފެށި ހިސާބުންނެވެ. އެގޮތުން އެ ދެމީހުން އެއްކޮށް ތަންތަނަށް ނުދަނީ ދެމީހުންގެ ދެމެދުގައި މައްސަލަ ޖެހިފައިވުމުން ކަމަށް އަޑު ފެތުރުނެވެ.

އެންމެ ފަހުން މި އަޑުތަކަށް ޕްރިންސް ހެރީ މިވަނީ ރައްދުދީފަ އެވެ. ނިއުޔޯކްގެ ޑެޑްބުކްއަށް ދިން އިންޓަވިއުއެއްގައި ހެރީ ބުނެފައިވަނީ އެފަދަ އަޑުތައް ފަތުރާ މީހުންނާމެދު ހަމްދަރްދީ ވާ ކަމަށެވެ.

"އެމީހުން އެވާހަކަތައް ފަތުރަނީ ކަމެއް ވާނެ ކަމުގެ އުއްމީދުގައި. އެކަމަކު އެކަން ނުވާތީ އެމީހުންނަށްޓަކައި ދެރަވޭ،" ހެރީ ބުންޏެވެ.

ހެރީ އިތުރަށް ބުނީ މީޑިއާގެ ހަބަރުތައް ބުނާ ގޮތުންނަމަ އޭނާއާއި މޭގަން 12-10 ފަހަރު ވަރިވެ ދިރިއުޅުން އެއް ގައުމުން އަނެއް ގައުމަށް ބަދަލުވެސް ކޮށްފައިވާ ކަމަށެވެ.

އެ އަޑުތަކަށް ބީރު ކަންފަތެއް ދިނުމަކީ އެންމެ މޮޅު ގޮތް ކަމަށާއި އެމީހުން ދިރިއުޅެނީ އެހެން އިވޭ އަޑުތަކަށް އެއްވެސް ފަރުވާ ބަހައްޓައިގެން ނޫން ކަމަށް ހެރީ ބުނެފައިވެ އެވެ.

މީގެ ދެތިން އަހަރު ކުރިން ޝާހީ އާއިލާއާ ވަކިވެ ހެރީއާއި މޭގަން ދިރިއުޅެމުން އަންނަނީ އެމެރިކާގައި މުޅިން ވަކި ދިރިއުޅުމެކެވެ.