ދިވެހި ބަހަށް އިސްކަންދިނުމުގެ ގާނޫނުގެ ދަށުން އުފައްދާފައިވާ ދިވެހިބަހުގެ އެކެޑަމީގެ މަސައްކަތްތައް ހިންގުމަށް ދިވެހި ލޭންގުއޭޖު، ކަލްޗާ އެންޑް ހެރިޓޭޖް މިނިސްޓަރުގެ ނައިބު އިބްރާހިމް ވަހީދު (އޮގަރު ވަހީދު) އައްޔަންކުރުމަށް ނިންމަވައިފި އެވެ.

މިގޮތަށް ނިންމާފައިވާކަން ހާމަވީ ޑިސެމްބަރު 5 ވަނަ ދުވަހު ހެރިޓޭޖް މިނިސްޓަރު އާދަމް ނަސީރު އެ އިދާރާގެ ހުރިހާ މުވައްޒަފުންނަށް ފޮނުއްވި މެމޯއަކުންނެވެ.

ބަހުގެ އެކަޑަމީ ހިންގުން ސިޔާސީ ވެރިއަކާއި ހަވާލުކުރެއްވި އިރު، މިހާރުވެސް އެ އެކަޑަމީގައި ރައީސަކު އެބަ ހުންނެވި އެވެ. ގާނޫނުގައި ވާގޮތުން އެކަޑަމީ ހިންގުމަށް ފަސް މެންބަރުންގެ ބޯޑެއް އެކުލަވާލައި އައްޔަން ކުރެއްވުމުގެ ބާރު އޮންނަނީ ރައީސުލްޖުމްހޫރިއްޔާ އަށެވެ.

ބުރާސްފަތި ދުވަހު މިނިސްޓަރު އާދަމް ނަސީރު ފޮނުއްވި މެމޯގެ ސުރުހީގައި ވަނީ ދިވެހި ބަހުގެ އެކަޑަމީގެ މަސައްކަތްތައް ހިންގުމަށް މިނިސްޓަރުގެ ނައިބު އިބްރާހިމް ވަހީދު އައްޔަންކުރައްވަން ނިންމެވި ކަމަށެވެ.

"ދިވެހި ބަހުގެ އެކަޑަމީގެ މަސައްކަތްތައް ހަރުދަނާ ކުރުމުގެ ގޮތުން 2024 ނޮވެންބަރު 26 އިން ފެށިގެން ސިޔާސީ ވެރިއެއްގެ ހައިސިއްޔަތުން މަސައްކަތްތައް ހިންގާ ބަލަހައްޓަވާނީ މި ވުޒާރާގެ މިނިސްޓަރ އޮފް ދިވެހި ލެންގުއޭޖު، ކަލްޗަރ އެންޑް ހެރިޓޭޖުގެ ނައިބު އަލްފާޟިލް އިބްރާހިމް ވަހީދުގެ ލަފާގެ ދަށުން ކަމުގައި ހުރިހާ މުވައްޒަފުންގެ މައުލޫމާތަށް ޓަކައި ދަންނަވަން" މެމޯގައިވެ އެވެ.

ގައުމީ ބަހަށް އިސްކަންދިނުމުގެ ގާނޫނުގެ ދަށުން 2009 ގައި އުފެއްދި ބަހުގެ އެކަޑަމީގެ ހިންގުން ސިޔާސީ ވެރިއަކާއި ހަވާލުކުރުމަށް މިނިސްޓަރު ފޮނުވި މެމޯގެ ގާނޫނީ ބާރުވެރިކަމެއް ނެތް ކަމަށް ބައެއް ފަރާތްތަކުން ދަނީ ބުނަމުންނެވެ.