މަޝްހޫރު ފެޝަން ބްރޭންޑެއް ކަމަށްވާ "މެންގޯ"ގެ ބާނީ އިސަކް އެންޑިކް ސްޕެއިންގެ ފަރުބަދައަކުން ވެއްޓި މަރުވެއްޖެ އެވެ.

ހަަބަރުތައް ބުނާ ގޮތުގައި އުމުރުން 71 އަހަރުގެ އިސަކް މަރުވީ 150 މީޓަރު އުސް ފަރުބަދައެއްގެ ކޮޅުން ވެއްޓި ލިބުނު އަނިޔާތަކުގެ ސަބަބުންނެވެ. އިސަކް ވެއްޓިފައިވަނީ އޭނާގެ އާއިލާއާއެކު ސްޕެއިންގެ ފަރުބަދައަކަށް "ހައިކިން"އަށް ގޮސް އުޅުމުގެ ތެރޭގައި ކަމަށް ރިޕޯޓުތައް ބުނެ އެވެ.

އޭނާގެ މަރާ ގުޅިގެން މެންގޯއިން ނެރުނު ބަޔާނެއްގައި ބުނެފައި ވަނީ އިސަކްގެ ވަކިވެދިއުމަކީ މެންގޯއަށް ލިބުނު ފޫނުބެދޭ ވަރުގެ ގެއްލުމެއް ކަމަށާއި އެހެން ނަމަވެސް އެ ކުންފުނީގެ ހިނގުން އިސަކްގެ ޝަރަފުގައި ކުރިއަށް ގެންދާނެ ކަމަށެވެ.

ތުރުކީގެ އިސްތަންބޫލްއަށް އުފަން އިސަކް އޭނާގެ އާއިލާއާއެކު ސްޕެއިންއަށް ދިރިއުޅުން ބަދަލުކުރީ 1960ގަ އެވެ. މެންގޯ ހުޅުވީ 1984ގަ އެވެ.

މިދިޔަ އަހަރު މެންގޯއަށް ތިން ބިލިއަނަށްވުރެ ބޮޑު އާމްދަނީއެއް ލިބިފައިވާއިރު އެއީ މުޅި ދުނިޔޭގައި ވެސް މިވަގުތު އެންމެ ފާހަގަ ކޮށްލެވޭ އެއް ފެޝަން ބްރޭންޑެވެ.