މަސްތުވާތަކެތި ޓްރެފިކްކުރިކަން ސާބިތުވެ، އަންހެނަކު 12 އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފި އެވެ.

ކްރިމިނަލް ކޯޓުން އެ ހުކުމް އިއްވީ ގދ. މަޑަވެލީ، އުދަރެސްގޭ، ސަހާ ވަހީދުގެ މައްޗަށެވެ. ސަހާގެ މައްޗަށް ކޮށްފައި ވަނީ ޑައިމޯފިން ޓްރެފިކް ކުރުމުގެ ދައުވާ އެވެ.

އެ އަންހެން މީހާއަށް ކްރިމިނަލް ކޯޓުން އިއްވި ހުކުމުގައި ވަނީ މި އަހަރުގެ އޮގަސްޓު މަހު މާލެއިން ސ. ގަމަށް ދަތުރުކުރަން ވެލާނާ އިންޓަނޭޝަނަލް ގޮސް ހުރުމުގެ ތެރޭގައި ޝައްކުވެގެން އެއާޕޯޓުން ޗެކުކުރި އިރު ޖިންސާއި އުނަގަނޑާ ދެމެދު ހަރު އެއްޗެއް އޮވެގެން އެތަކެތި ނެގުމަށް އެންގި ކަމަށާއި އަދި އޭނާ ނެގީ 202 ގްރާމް ހުރި ރަބަރު ޕެކެޓްތަކެއް ކަމަށް ހުކުމްގައި ބުނެފައިވެ އެވެ.

އެ މައްސަލަގައި ސަހާއާއެކު އިއުތިރާފްގެ އެއްބަސްވުމެއްގައި ދައުލަތުން ހެދި ކަމަށް ވެސް ހުކުމްގައި ބުންޏެވެ.

އެ މައްސަލައިގައި ސުހާގެ މައްޗަށް އިއްވީ 12 އަހަރާއި ހަ މަސް ދުވަހުގެ ޖަލުގެ ހުކުމް އެކެވެ. އަދި އޭނާ 50،000 ރުފިޔާއިން ޖޫރިމަނާކޮށް އެ ފައިސާ އެއް އަހަރު ދުވަހުގެ ތެރޭގައި މީރާއަށް ދެއްކުމަށް ވެސް ވަނީ ހުކުމްކޮށްފަ އެވެ. އަދި ތަހުގީގު މަރުހަލާއިން ފެށިގެން ހުކުމް ކުރުމާ ހަމައަށް ޖަލުގައި ހުރި ހަތަރު މަހާއި ތިން ދުވަހުގެ މުއްދަތު ޖަލު އަދަބުން އުނިކުރަން ވެސް ކޯޓުން ވަނީީ ހުކުމްކޮށްފަ އެވެ.