މިދިޔަ ހަފުތާގެ ބުރާސްފަތި ދުވަހުގެ ހެނދުނު ސަރުކާރުގެ ތިން މިނިސްޓްރީއެއް ހިންގާ އިމާރާތްތަކުގައި އަލިފާން ރޯވި ހާދިސާއާ ގުޅިގެން މައުލޫމާތު ސާފުކުރުމަށް ސިފައިންނާއި ފުލުހުން ރައްޔިތުން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ހާޒިރުކުރަން ނިންމައިފި އެވެ.

އަލިފާނގެ ހާދިސާއާއި ގުޅިގެން ކަމާ ގުޅުންހުރި ފަރާތްތަކާ ބައްދަލުކޮށް މައުލޫމާތު ސާފުކުރުމަށް ކޮމިޓީގެ ބައްދަލުވުމެއް ބާއްވަން ނިންމާފައި ވަނީ 241 ކޮމިޓީގެ މުގައްރިރު، އޭދަފުށި ދާއިރާގެ ޕީއެންސީ މެންބަރު އަހުމަދު ސަލީމް (ރެޑް ވޭވްް) އެވެ.

އަލިފާނގެ ހާދިސާއާއި ގުޅިގެން ކަމާ ގުޅުންހުރި ފަރާތްތަކާ ބައްދަލުކޮށް މައުލޫމާތު ސާފުކުރުމަށް ކޮމިޓީގެ ބައްދަލުވުން ތަވާލުކުރީ އަންނަ ބުރާސްފަތި ދުވަހުގެ ހެނދުނު 10 އަށެވެ.

އެ ކޮމިޓީއިން އަލިފާނުގެ މައްސަލަ ބަލަން ނިންމާފައިވާއިރު، އެ ހާދިސާގެ ޖިނާއި ތަހުގީގެއް ހިންގައި ދިނުމަށް އެދި ފުލުހަށް ހުށަހަޅަން އިދިކޮޅު މައި ޕާޓީ، އެމްޑީޕީން ވަނީ ނިންމާފަ އެވެ.

އެމްޑީޕީން މިއަދު ނޫސްވެރިންންށް މައުލޫމާތު ދިނުމަށް ބޭއްވި ބައްދަލުވުމުގައި އެ ޕާޓީގެ ލީގަލް ޑިރެކްޓަރު މަހްފޫޒް ސައީދު ވިދާޅުވީ، ހާދިސާގެ މިނިވަން ތަހުގީގެއް ހިންގަން ޖެހޭ ކަމަށް ގަބޫލުކުރެވޭތީ އެމްޑީޕީން އެކަން ހުށަހަޅާނެ ކަމަށެވެ.

އަދި އަލިފާން ނިއްވާލުމުގައި އިހުމާލުވެފައިވާ ކަމަށް ތުހުމަތުކޮށް އެ މައްސަލަ ވަކި މައްސަަލައެއްގެ ގޮތުގައި ނޭޝަނަލް އިންޓެގްރިޓީ ކޮމިޝަނަށް (އެންއައިސީ) އަށް ހުށަހަޅާނެ ކަމަށް ވެސް މަހްފޫޒް ވިދާޅުވި އެވެ.

އަލިފާނުގެ ހާދިސާ ތަހުގީގުކުރުމަށް ބޭރުގެ ޓީމެއް ރާއްޖެ އައުމަށް ހަމަޖެހިފައިވާ ކަމަށް ފުލުހުން ބުނެ އެވެ.

ބުރާސްފަތި ދުވަހުގެ ހެނދުނު ހިނގި މި އަލިފާނުގެ ހާދިސާގައި ތިން މިނިސްޓްރީ އެއް ހިމެނޭ އިމާރާތް ވަނީ ބޭނުން ނުކުރެވޭ ވަރަށް އަނދައިފަ އެވެ. އަދި އެ މިއާރާތުގައި ކުރިން ހިނގަމުން އައި އިދާރީ މަސައްކަތްތައް މިހާރު ވަނީ ވަގުތީ ގޮތުން ދަރުބާގުއެއަށް ބަދަލުކޮށް އަލުން އެ ހިދުމަތްތައް ދޭން ފަށާފަ އެވެ.