އެޗްއައިވީ، ސިފްލިސް އަދި ހެޕަޓައިޓިސްބީ ފަދަ މައިމީހާގެ ފަރާތުން ފާރުތަވުން ނައްތާލެވިފައިވާ ގައުމަކަށް، ރާއްޖެ ހެދުމަށް ކުރަމުން އަންނަ މަސައްކަތުގެ ދަށުން ފެށޭ އަހަރު ނިމުމުގެ ކުރީން ޑަބްލިއުއެޗްއޯ ގަބޫލުކުރާ މިންވަރަށް އެ ލަނޑުދަނޑި ހާސިލްކުރުމަކީ އަމާޒެއް ކަމަށް, ހެލްތް މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.

މިއަހަރުގެ ދުނިޔޭގެ އެއިޑްސް ދުވަހުގެ ފާހަގަކުރުމަށް މީރުމާގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ އެ އަމާޒަށް ރާއްޖެ ވާސިލުވުމަށް މިހާރު މަސައްކަތް ކުރަމުންގެންދާ ކަމަށެވެ.

ނާޒިމް ވިދާޅުވީ ސަރުކާރުގެ އަމާޒަކީ ސިއްހީ ދާއިރާގައި މަސައްކަތް ކުރާ ހުރިހާ ފަރާތެއް ގުޅިގެން ކުރިއަށް ގެންދާ މަސައްކަތުގައި، ދުނިޔޭގެ ސިއްހަތު ޖަމްއިއްޔާ ގާބޫލުކުރާ ފެންވަރަށް ރާއްޖޭގައި އެ ބަލި ނައްތާލެވިފައިވާ ގައުމަކަށް ހެދުން ކަމަށެވެ.

މިނިސްޓަރު ނާޒިމް ވިދާޅުވީ ދުވަހާ ގުޅިގެން، ގައުމެއްގެ ގޮތުގައި ހާސިލްކުރާ އެންމެ މުހިންމު ކަމަކީ މި ސެކްޓާއަށް ފަރުވާ ދިނުމުގައި އަމަލު ކުރާނެ މުހިންމު ތިން ގައިޑްލައިނެއް ތައާރަފް ކުރުން ކަމަށެވެ. އަދި މިފަދަ ގައިޑްލައިނެއް އޮވެ ގައިޑްލައިނާ އެއްގޮތަށް މަސައްކަތް ކުރިއަށް ގެންދިއުމަކީ ދާން ބޭނުންވާ މިސްރާބަށް ދިއުމަށް އެންމެ މުހިންމު އެއް ކަންތައް ކަމަށް ވިދާޅުވި އެވެ.

އެހެންކަމުން އެފަދަ ބައްޔަކަށް ޝައްކުކުރެވޭ ނަމަ ނުވަތަ ބައްޔެއް ޖެހުމުގެ ފުރުސަތު އެއްވެސް ވަރަކަށް އޮތްނަމަ އަވަހަށް ބައްޔަށް ޓެސްޓު ކުރެއްވުމަށް މިިނސްޓަރު ވަނީ އިލްތިމާސްކުރައްވާފަ އެވެ.

"ހެލްތު ސެކްޓާއިން ކަށަވަރު ކޮށްދޭން ބޭނުމީ އެފަދަ ފަރާތްތަކަށް ދޭންޖެހޭ ރައްކާތެރިކަމާއި އޯގާތެރިކަމާއި އަޅާލުން މި ނިޒާމުގެ ތެރެއިން ދެމުން ގެންދާނެ ކަން." މިނިސްޓަރު ނާޒިމް ވިދާޅުވި އެވެ.

ނާޒިމް ވިދާޅުވީ ގައުމެއްގެ ގޮތުގައި އެންމެން ގުޅިގެން މަސައްކަތް ކޮށްގެން ނޫނީ މިފަދަ ކަންކަމުން އަރައިނުގަނެވޭނެެކަމީ އެންމެން ވެސް ދަންނަ ހަގީގަތެއް ކަމަށެވެ.

ސަރުކާރުގެ މިއަދުގެ އަމާޒަކީ މައިމީހާގެ ފަރާތުން އެޗްއައިވީ، ސިފްލިސް އަދި ހެޕަޓައިޓެސްބީ ވާސިލުވުން ނައްތާލެވިފައިވާ ގައުމަކަށް ރާއްޖެ ހެދުމަށް މިހާރު ކުރެވެމުންދާ މަސައްކަތް، ބާރު ސްޕީޑުގައި ގެންގޮސް ފެށޭ 2025 ވަނަ އަހަރު ނިމުމުގެ ކުރީން ޑަބްލިއުއެޗްއޯ ގަބޫލުކުރާ ފެންވަރަށް އެކަން ހާސިލްވެފައިވާ ގައުމެއްގެ ގޮތުގައި އެ ލަނޑުދަނޑި ހާސިލްކުރުން ކަމަށް މިނިސްޓަރު ވަނީ ވިދާޅުވެފަ އެވެ.