ގުގުރުމާއެކު ބޯކޮށް ވާރޭ ވެހޭނެކަމަށް ލަފާކޮށް ރާއްޖޭގެ ބޮޑުބަޔަކަށް ޔެލޯ އެލާޓު ނެރެފި އެވެ.

މޫސުމާބެހޭ ގައުމީ އިދާރާ، މެޓް އޮފީހުން މިއަދު ނެރުނު ޔެލޯ އެލާޓުގައި ބުނެފައިވަނީ ށ.އަތޮޅުން ފެށިގެން އދ.އަތޮޅާ ހަމައަށް މިއަދު 7.15 އިން ފެށިގެން މެންދުރުކުރީ 11:15 އާ ދެމެދު ބޯކޮށް ވިއްސާރަކޮށް ވައިގަދަވާނެކަމަށް ލަފާކުރެވޭ ކަމަށެވެ.

އެ ގޮތުން އެ ސަރަހައްދުގައި ހިމެނޭ އަށް އަތޮޅަށް ގުގުރުމާއެކު ބޯކޮށް ވާރޭ ވެހޭނެކަމުގައި މެޓު އޮފީހުން ބުނެފައިވެ އެވެ.

މެޓް އޮފީހުން ވަނީ ދެވަނަ ޔެލޯ އެލާޓެއްވެސް މިއަދު ނެރެފަ އެވެ. އެގޮތުން ހއ އަތޮޅުން ފެށިގެން އދ އަތޮޅާއި ހަމައަށް މިއަދު 11:15 އިން ފެށިގެން މެންދުފަހު 3:00 އާ ދެމެދު ބޯކޮށް ވާރޭވެހި ގުގުރާނެކަމަށް ވަނީ ލަފާކޮށްފަ އެވެ.

ރާއްޖެ ކައިރީގައި އުފެދޭ ދެ ކޮޅިގަނޑެއްގެ ސަބަބުން 18 ޑިސެންބަރުން ފެށިގެން ފަސް ދުވަހުގެ މުއްދަތަށް މޫސުން ގޯސްވާނެ ކަމަށް މެޓު އޮފީހުން އިއްޔެ ވަނީ ބުނެފަ އެވެ.

މެޓުން ބުނީ އިއްޔެ ބަންގާޅު ކަނޑުގައި ކޮޅިގަނޑެއް އުފެދިފައިވާ ކަމަށާއި ކުރިއަށްއޮތް ދެދުވަސްތެރޭގައި މިކޮޅިގަނޑު އިންޑިއާގެ ޓަމިލްނާޑޫގެ އައްސޭރިފަށާ ދިމާލަށް ޖެހޭނެކަމަށް ލަފާކުރެވޭކަމަށެވެ. އަދި މީގެ އިތުރަށް މިހަފްތާ ތެރޭގައި ރާއްޖެއާ ދުރުން ދެކުނުގައި ކޮޅިގަނޑެއް އުފެދި، ހުޅަނގަށް ދަތުރުކުރާނެ ކަމަށް ބެލެވޭކަމަށެވެ.

ޑިސެމްބަރު 18 ވާ ބުދަދުވަހުން ފެށިގެން ކުރިއަށްއޮތް ފަސް ދުވަހު ރާއްޖޭގެ ސަރަހައްދަށް ވައި ބާރުވާނެކަމަށް ބެލެވޭކަމަށާއި، އާންމުގޮތެއްގައި ދެކުނާއި މެދުރާއްޖެތެރެއަށް ގަޑިއަކު 17 މޭލާއި 27 މޭލާއި ދެމެދުގެ ބާރުމިނުގައި ވައިޖެހޭނެކަމަށް ލަފާކޮށްފައިވެ އެވެ. އަދި އުތުރުގެ އަތޮޅުތަކަށް ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައި ވައިޖެހޭނެކަމަށް ލަފާކޮށްފައިވެ އެވެ.

އެހެންކަމުން އުތުރުގެ ހިސާބުތަކަށް އާދައިގެ ވަރަކަށް ކަނޑުގަދަވާނެކަމަށް ބެލެވޭއިރު، މެދުރާއްޖެތެރެއާއި ދެކުނުގެ ހިސާބުތަކަށް އިތުރަށް ކަނޑުގަދަވާނެ ކަމަށް ބެލެވޭކަމަށް މެޓް އޮފީހުން ބުނެ އެވެ.

މީގެ އިތުރުން މިދުވަސްވަރު ގަދަވަޔާއެކު ވިއްސާރަކޮށް، ގުގުރުމާއެކު ވިލާގަނޑުގައި ގާތްގަނޑަކަށް 40 މޭލާއި 55 މޭލަށް ވައިގަދަވުން އެކަށީގެންވާކަމަށްވެސް އެއިދާރާއިން ލަފާކުރެ އެވެ.

މިދުވަސްވަރު ހާއްސަކޮށް ކަނޑުދަތުރުކުރާ ފަރާތްތަކުން އެންމެ ފަހުގެ މޫސުމީ ނިމުތުތަކާއި ސަމާލުތަކަށް ސަމާލުކަންދިނުމަށް އިސްކަންދޭން އެ އިދާރާއިން އިލްތިމާސްކުރެ އެވެ.