ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން ވަގަށް ގޯތިތަކެއް ވިއްކި ކަމަށް ތުހުމަތުކޮށް އެ މައްސަލަ ބަލައިދޭން ރައްޔިތުން މަޖިލީހަށް ހުށަހަޅައިފި އެވެ.

ވަގަށް ގޯތި ދިން ކަމަށް ބުނާ މައްސަލަ ބަލަން މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސް ކުރައްވައި ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) މަޖިލީހަށް ފޮނުއްވި ސިޓީގައި ވިދާޅުވީ އުސޫލުން ބޭރުން 50 އަށްވުރެ ގިނަ ގޯތި އެޗްޑީސީން ދޫކޮށްފައިވާ ކަމަށާއި އެ ގޯތިތަކުގެ ޖުމްލަ އަދަދު 400 މިލިއަނަށްވުރެ މަތިވާނެ ކަމަށް ލަފާކުރެވޭ ކަމަށެވެ.

މީގެއިތުރުން މި ޖަރީމާ ހިންގާކަން ހައުސިން މިނިސްޓްރީއަށް އެނގުނުތާ ފަސް މަސް ފާއިތުވެގެން ގޮސްފައިވާ ކަމަށާއި ނަމަވެސް، އެކަމާމެދު މިނިސްޓްރީން ނުވަތަ ސަރުކާރުން ފިޔަވަޅެއް އަޅައިފައިނުވާކަމަށް ސިޓީގައި ބަޔާންކޮށްފައިވެ އެވެ. އަދި އެކަމަކީ ދައުލަތުގެ އަގުހުރި ބިންތަކެއް ވިއްކައިލައިފައިވާ މައްސަލައަކަަށް ވާތީ ސީރިޔަސް މައްސަަލައެއްގެ ގޮތުގައި މަޖިލީހުން ބަލަންޖެހޭ މައްސަލައެއް ކަމަށް ދެކޭ ކަމަށް ވެސް ވިދާޅުވި އެވެ.

އެކަމުގައި ޝާމިލުވާ އެންމެން ދެނެގަތުމާއެކު، އެފަދަ ކަންކަން އިތުރަށް ހިންގިޔަ ނުދިނުމަށްޓަކައި އަޅަންޖެހޭ ފިޔަވަޅުތައް އެޅުމަށް ދައުލަތުގެ ކަމާބެހޭ މުއައްސަސާތަކަށް މަޖިލީހުން އެގުމަށްޓަކައި މަސައްކަތް ކޮށްދިނުމަށް ކުޑޫގެ ސިޓީގައި އެދިވަޑައިގެންނެވި އެވެ.

އެޗްޑީސީން ގޯތިތަކެއް ވިއްކިކަމަށް ބުނާ މަސައްލަ މަޖިލީހަށް ހުށައަޅާފައިވާއިރު، މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް އެޗްޑީސީން ހުޅުމާލެއިން ގޯތިތަކެއް ދިން މައްސަލަ ފެންމަތިވެ އެ މައްސަލައިގެ ޖިނާއި ތަހުގީގެއް ފުލުހުން ފަށާފައެވެ. އަދި ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.

ސޯޝަލް މީޑިއާގައި ދައުރުވާ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ. އަދި ދެން ހިމެނެނީ އަބްދުލް މަޖީދު މާހިރު ނަމަކަށް ކިޔާ މީހެކެވެ.

ކުރީގެ ސަރުކާރުން "ބިންވެރިޔާގެ" ސްކީމްގެ ދަށުން ހުޅުމާލެ ދެކާއި ތިނެއް އާއި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ވެސް ދޫކޮށްފައިވެ އެވެ.