އެޗްޑީސީން ހިންގަމުންދިޔަ ކޮރަޕްޝަންގެ މައްސަލަތަކުގެ މައުލޫމާތު ހިމެނޭ ސިޓީ އެ ކުންފުނީގެ ކުރީގެ ޗެއާމަން އަހްމަދު ޒުހޫރު ވަޓްސްއެޕް މެދުވެރިކޮށް ވެސް ރައީސް ޑރ. މުހައްމަދު މުއިއްޒަށް ފޮނުވިކަން އެނގިއްޖެ އެވެ.

ޒުހޫރުގެ އަރިސް ބޭފުޅަކު ވިދާޅުވީ އެ ސިޓީ ވަޓްސްއެޕް މެދުވެރިކޮށް ވެސް ޒުހޫރު ރައީސް މުއިއްޒަށް ފޮނުވި ކަމަށެވެ. އަދި އެމަނިކުފާނު މެސެޖް ބެއްލެވުމަށްފަހު އެއްވެސް ކޮމެންޓެއް ނުކުރައްވާ ކަމަށް ވެސް އޭނާ ވިދާޅުވި އެވެ.

"ރައީސް މުއިއްޒު އެ ހައްދަވަނީ ކަނޑައެޅިގެން ދޮގު، ވަޓްސްއެޕް މެދުވެރިކޮށް ވެސް ޒުހޫރު އެ ސިޓީ ފޮނުއްވި. މާތްﷲ ދެކެ ބިރުވެރިވާ ބޭފުޅަކު ނަމަ ކިހިނެތްތޯ މިކަން ދޮގުކުރައްވާނީ. ހަމަ އަޖައިބު އަންތަރީސްވޭ،" އޭނާ ކިޔައިދިނެވެ.

އެޗްޑީސީގެ ހިޔާނާތުގެ މައްސަލައިގައި މީގެ ފަސް މަސް ކުރިން އެ ކުންފުނީގެ ކުރީގެ ޗެއާޕާސަން ޒުހޫރު ރައީސް އޮފީހަށް ފޮނުއްވި ސިޓީ ލިބިވަޑައިގެންފައިނުވާ ކަމަށް ވިދާޅުވެ ރައީސް މުއިއްޒު މިއަދު ވަނީ އިތުރުފުޅުހައްދަވާފަ އެވެ.

ރައީސް އޮފީހުގެ ބޭރުގައި މިއަދު މެންދުރުފަހު ބައެއް ނޫސްވެރިންނާ ބައްދަލުކުރައްވައި ރައީސް ވިދާޅުވީ އެފަދަ ސިޓީއެއް ލިބިވަޑައިނުގަންނަވާ ކަމަށާއި ލިބިވަޑައިގެންނެވި ނަމަ ޔަގީނުން ވެސް މާ ކުރިން އެ މައްސަލާގައި ފިޔަވަޅު އަޅުއްވާނެ ކަމަށެވެ.

ނަމަވެސް ރައީސް އޮފީހަށް ފޮނުވި ސިޓީ އެ އޮފީހުން ބަލައިގަތް ކަމުގެ ލިޔުން އެބައޮތެވެ. އެ ލިޔުމުގެ ކޮޕީއެއް "ހުރިހާ"އަށް ވެސް ވަނީ ލިބިފަ އެވެ.

އެޗްޑީސީ ތެރެއިން އެވަރުގެ ބޮޑެތި ކޮރަޕްޝަންގެ އަމަލުތަކެއް ހިންގިއިރު، ގައުމުގެ އެންމެ އިސްވެރިޔާއަށް އެކަން ނޭނގޭ ކަމަށް ވިދާޅުވުމަކީ ގަބޫލުކުރެވޭނެ ކަމެއް ނޫން ކަމަށް ގިނަ ބަޔަކު އަންނަނީ ބުނަމުންނެވެ.