ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅޭ ގެ، މ. ޒޭވަރު ފުލުހުން ބަލައިފާސްކޮށްފި އެވެ.

ރޭގެ ވަގުތެއްގައި ފަޒުލްގެ ގެ ބަލާފާސްކޮށްފައި މިވަނީ ބިންވެރިޔާ ސްކީމުގެ ގޯތި ނުލިބޭ ބަޔަކަށް ހުޅުމާލޭން ވަގަށް ގޯތިތަކެއް ދޫކުރިކަމަށް ކުރެވޭ ތުހުމަތާއި ގުޅިގެންނެވެ.

"އަދަދު" ނޫހުން ރިޕޯޓްކޮށްފައިވާ ގޮތުގައި ރޭގެ ވަގުތެއްގައި ފުލުހުން އެ ގެއަށް ވަދެ، ގިނަ އިރުތަކެއް ވަން ދެން އެގޭގައި ހަރަކާތްތެރިވެފައިވެ އެވެ. ނަމަވެސް އެ ތަނުން އެއްވެސް ލިޔެކިޔުމެއް ނޫނީ ހެކީގެ ގޮތުގައި ބޭނުންކުރެވޭނެ އިތުރު އެއްޗެއް ގެންދިޔަކަން އެނގިފައިނުވެ އެވެ.

މިކަމާއި ގުޅޭގޮތުން ފުލުހުން ވަކި އެޗެއް ބުނެފައި ނުވެ އެވެ.

ވަގަށް ގޯތި ދޫކުރިކަމުގެ ތުހުމަތުތަކާއެކު ފަޒުލް ވަނީ އެމްޑީގެ މަގާމުން އިސްތިއުފާ ދީފަ އެވެ. ވަގު ގޯތި ދީފައިވަނީ ޑޮކިއުމެންޓް ފޯޖްކޮށްގެން ކަމަށް ވަނީ ތުހުމަތުކޮށްފަ އެވެ. އެކަން ހާމަވެފައިވަނީ ފަޒުލްގެ ބޭބެ މުހައްމަދު ފަޒީލް ރަޝީދުއަށް ބިންވެރިޔާ ސްކީމްގެ ދަށުން ގޯތި ލިބިފައިނުވާއިރު، ގޯއްޗެއް ލިބުނުކަމަށް ނިންމާ ވަށާފާރު ރޭނި މައްސަލައެއް ފެންމަތިވުމާއި ގުޅިގެންނެވެ.

ގޯތީގެ އިތުރުންވެސް ފަޒުލް އެޗްޑީސީގައި ގިނަ ހިޔާނާތުގެ އަމަލުތަކެއް ހިންގިކަމަށް ވަނީ ތުހުމަތުކޮށްފަ އެވެ. އެކަމާއި ގުޅިގެން އެޗްޑީސީގެ ގިނަ އަދަދެއްގެ އިސްވެރިންނާއި މުވައްޒަފުންވެސް ވަނީ ވަޒީފާއިން ވަކިކޮށްފަ އެވެ.

މީގެ އިތުރުން އެޗްޑީސީގެ ޗެއާމަން ފިޔަވާ ހުރިހާ މެންބަރުން ވަނީ ސަސްޕެންޑްކޮށް ޕާސްޕޯޓް ހިފަހައްޓާފަ އެވެ. ޕާސްޕޯޓް ހިފެހެއްޓި މީހުންގެ ތެރޭގައި ފަޒުލް އާއި އޭނާގެ ބޭބެ ފަޒީލްގެ އިތުރުން ހައުސިން މިނިސްޓްރީގެ ބައެއް މީހުންވެސް ހިމެނެ އެވެ.

ފުލުހުންނާއި އޭސީސީން އަންނަނީ ވަގު ގޯތި މައްސަލަ ތަހުގީގުކުރަމުންނެވެ.