ވަގު ގޯތި މައްސަލައިގައި އެޗްޑީސީގެ ކުރީގެ މެނޭޖިން ޑިރެކްޓަރު އިބްރާޙިމް ފަޒުލް ރަޝީދުގެ ގެ ފުލުހުން ބަލާފާސްކުރި ވަގުތު އެ މައްސަލައިގައި ހިމެނޭ ފަޒުލްގެ ބޭބެ، މުހައްމަދު ފަޒީލް ރަޝީދު ކަޅު ދަބަހެއް އެގެއިން ބޭރުކުރާ މަންޒަރު ފެންނަ ވީޑިއޯއެއް އާންމުވެއްޖެ އެވެ.

ވަގު ގޯތި މައްސަލަ ފަޅާއަރާފައިވަނީ ފަޒުލްގެ ބޭބެ މުހައްމަދު ފަޒީލް ރަޝީދުއަށް ބިންވެރިޔާ ސްކީމްގެ ދަށުން ގޯތި ލިބިފައިނުވާއިރު، ގޯއްޗެއް ލިބުނުކަމަށް ނިންމާ ވަށާފާރު ރޭނި މައްސަލައެއް ފެންމަތިވުމާއި ގުޅިގެންނެވެ. ފުލުހުން ތަހުގީގު ކުރަމުންދަނީ މިކަމާއި ގުޅޭ ފޯޖަރީގެ މައްސަލައެއްކަމަށްވެ އެވެ.

މި މައްސަލައާ ގުޅިގެން ފުލުހުން އިއްޔެގެ ވަގުތެއްގައި ވަނީ ފަޒުލް އާއި ފަޒީލް ދިރިއުޅޭގެ ކަމަށްވާ މ.ޒޭވަރުގެ ބަލާފާސްކޮށްފަ އެވެ.

ސޯޝަލް މީޑިއާގައި އާންމުވެފައިވާ ވީޑިއޯގައި ފެންނަ ގޮތުން އެވަގުތު ފަޒުލްގެ ބޭބެ ފަޒީލް އެގޭގެ ބެލްކަނީގައި ފޯނެއްގައި ހުރެ ދެކޮޅަށް ހިނގައެވެ. އެއަށްފަހު ގޭގެތެރެއަށް ވަދެ ސިޑިން މައްޗަށް އަރައެވެ. ދެން ފެންނަނީ އޭނާ ސިޑިން ފައިބައިގެންގޮސް ގޭގެ ދޮރުން ނުކުންނަމުން ވަރަށް ސިއްރުން ދެކޮޅު ބަލާލުމަށްފަހު ކަޅު ދަބަހެއް ހިފައިގެން ނުކުމެގެން ދާ މަންޒަރެވެ.

ބެލެވޭ ގޮތުގައި އޭނާގެ އަތުގައި އޮތީ ލެޕްޓޮޕް ދަބަހެކެވެ. އެ ވީޑިއޯގައި ހުދު ގަމީހެއް ލާފައި ހުރި މީހަކު ފަހުން ގޮސް އެގެއަށް ވަންނަ މަންޒަރުވެސް ފެނެ އެވެ. ވީޑިއޯ ޕޯސްޓްކުރި ފަރާތުން ބުނީ އެއީ ފަޒީލް އެނބުރި ގެއަށް ވަންނަ މަންޒަރުކަމަށެވެ. ނަމަވެސް އޭނާގެ އަތުގައި އޭރު ނެރުނު ދަބަހެއް ނެތެވެ.

ރައީސް މުހައްމަދު މުއިއްޒުގެ އަރިސް ބޭފުޅެއްކަމަށްވާ ފަޒުލް ރަޝީދުއަށް ބޮޑެތި ކޮރަޕްޝަންގެ ތުހުމަތުތަކެއް ކުރެވިފައިވާއިރު، ނުފޫޒުން އެއްކިބާވެފައިވާ މިނިވަން ތަހުގީގެއް ފުލުހުންނަށް ކުރެވޭނެކަމާއިމެދު ވަނީ ސުވާލު އުފެދިފަ އެވެ.

އެގޮތުން އެ ރޭ އެގެ ބަލާފާސްކުރަމުން ދިޔަ ވަގުތު މައްސަލައިގެ ތުހުމަތު އޮތް މީހަކަށް ގެއިން އެއްޗެއް ނެރުމުގެ ފުރުސަތު ފުލުހުން ދީފައިވާތީ ހޯމްލޭންޑް މިނިސްޓަރު އަލީ އިހުސާން އަށްވެސް ވަނީ ފާޑުކިޔުން އަމާޒުވެފަ އެވެ.

ރައީސްގެ ސަމާލުކަމަށް މީގެ ފަސް މަސް ކުރިން ފަޒުލްގެ ކޮރަޕްޝަންގެ ވާހަކަތައް ގެންދިއުމުންވެސް އެއްވެސް ފިޔަވަޅެއް އަޅުއްވާފައި ނުވާއިރު، މިހާރު ފިޔަވަޅު އަޅާކަމަށް ދަައްކަމުންދަނީ ސޯޝަލް މީޑިއާގައި މި މައްސަލަތައް ފެންމަތިވެ ރައްޔިތުންގެ ފާޑުކިޔުން އަމާޒުވުމާއި ގުޅިގެންކަން ފާހަގަކޮށްލެވެ އެވެ.