މޫސުން ވަރަށް ގޯސްވާނެކަމަށް ލަފާކޮށް ވ. އަތޮޅުން ފެށިގެން ދ. އަތޮޅަށް ރީނދޫ އެލާޓް ނެރެފި އެވެ.

މޫސުމާބެހޭ ގައުމީ އިދާރާއިން މިރޭ ނެރުނު އެލާޓުގައި ވަނީ ބޯކޮށް ވާރޭވެހި ގުގުރުމުގެ އިތުރުން ވިލާގަނޑުގައި ގަޑިއަކު 45 މޭލަށް ވައި ގަދަވެ، ކަނޑުތައް ވެސް ގަދަވާނެ ކަމަށް ލަފާކޮށްފަ އެވެ.

އާ އަހަރު ފެށުމާއެކު ކުރަން ފެށި ވިއްސާރައިގައި މިއަދާއި މިރޭ ރާއްޖޭގެ ބޮޑު ސަރަހައްދަކަށް ވާރޭވެހިފައިވެ އެވެ.

މެޓުން ރީނދޫ އެލާޓް ނެރެފައި ވަނީ މިރޭ 8:15 އިން ފެށިގެން މެންދަމު 12:30 ގެ ނިޔަލަށެވެ.

މިއަދު އެކޮށް އެކި އަތޮޅުތަކަށް ވަނީ ރީނދޫ އެލާޓު ނެރެފަ އެވެ. އެގޮތުން ބ، ތ އަދި ލ. އަތޮޅަށް މިއަދު ރީނދޫ އެލާޓު ނެރެފައިވެ އެވެ.

އިއްޔެ މެޓް އޮފީހުން ނެރުނު ބަޔާނެއްގައި ބުނެފައިވަނީ އާ އަހަރުގެ ފުރަތަމަ ފަސް ދުވަހު ރާއްޖެއަށް ކުރަމުންދާ ވިއްސާރައިގެ ބާރުގަގަދަވާނެ ކަމަށެވެ. މޫސުން ގޯސްވާނީ ސްރީ ލަންކާގެ އިރު ދެކުނުގައި އުފެދިފައިވާ ކޮޅިގަނޑާއި، އެ ކޮޅިގަނޑާއި ގުޅިފައިވާ ލޯ ޕްރެޝާ ޓްރަފުގެ ސަބަބުން ކަމަށް އެ އިދާރާއިން ބުނެ އެވެ.

އެހެންކަމުން، ހުރިހާ ފަރާތްތަކުންވެސް، ވަކިން ހާއްސަކޮށް ކަނޑު ދަތުރުކުރާ މީހުން މޫސުމާ ގުޅޭގޮތުން ނެރޭ މައުލުމާތުތަކަށް ސަމާލުވުމަށް މެޓުން ވަނީ އެދިފަ އެވެ.