ހޮލީވުޑްގެ މަޝްހޫރު ތަރިން ކަމަށްވާ ޖެނިފާ ލޮޕޭޒް (ޖޭލޯ)އާއި ބެން އެފްލެކްގެ ކައިވެނި ރޫޅެން މެދުވެރިވި މައިގަނޑު ސަބަބަކީ ބެންގެ ކުރީގެ އަންހެނުން ޖެނިފާ ގާނާ ކަމަށް ޖޭލޯ ބުނެފި އެވެ.

ހަބަރުތައް ބުނާ ގޮތުގައި ޖޭލޯއާއި ބެންގެ ކައިވެނީގައި މައްސަލަތައް ޖެހުމުގައި "އަސްލު ވިލަން"އަކީ ޖެނިފާ ކަމަށް ޖޭލޯ ގަބޫލުކުރެ އެވެ.

މިފަދަ ރިޕޯޓުތަކެއް މީޑިއާއަށް ފެންމަތިވެފައި މިވަނީ ޖޭލޯއާއި ބެންގެ ކައިވެނީގެ މައްސަލަ ކޯޓުގައި އޮތް ދުވަސްވަރެއްގައި ބެން ޖެނިފާއާއެކު ހޭދަކުރާ ވަގުތު އިތުރުވެފައި ވަނިކޮށެވެ.

ޖޭލޯއާއެކު މައްސަލަތައް އިތުރުވުމާއެކު ބެން ވަނީ ޖެނިފާއާއެކު ގިނަ ވަގުތުތަކެއް ހޭދަކޮށް އާ އަހަރު ވެސް އޭނާއާއެކު ފާހަގަކޮށްފަ އެވެ.

ހަބަރުތައް ބުނާ ގޮތުގައި ވަރީގެ ކަންތައްތައް ނުނިމެނީސް ބެންއާއި ޖެނިފާ އެކުގައި ހޭދަކުރާ ވަގުތު ގިނަވުމުން ޖޭލޯ ހުރީ އެކަމާ ހިތްހަމަ ނުޖެހިފަ އެވެ.

ބުނެވޭ ގޮތުގައި ބެންއާއި ޖޭލޯގެ ވަރީގެ މައްސަލަ ހުއްޓުމަކަށް އައިސްފައިވަނީ އެ ދެތަރިންގެ މެދުގައި މުދާ ބަހާނެ ގޮތަކާމެދު އެއްބަސް ނުވެވިގެންނެވެ.