90ގެ އަހަރުތަކުގައި ބޮލީވުޑުން މަޝްހޫރުވި ގޯވިންދާއާއި މިހާރުގެ ޒުވާން އެކްޓަރު ވަރުން ދަވަންއާ އަޅާކިޔަނީ ކީއްވެކަން ނޭނގޭ ކަމަށް ގޯވިންދާގެ އަންހެނުން ސުނީތާ އަހޫޖާ ބުނެފި އެވެ.

މީޑިއާއަށް ދިން އިންޓަވިއުއެއްގައި ސުނީތާ ބުނީ އޭނާގެ ފިރިމީހާއާ ވަރުންއާ އަޅާކިޔާ މީހުން ވާހަކަ ދައްކާ ކަމަށާއި އެހެން ނަމަވެސް އެކަން ކުރާ ސަބަބެއް ނޭނގޭ ކަމަށެވެ.

އެގޮތުން ގޯވިންދާއަކީ ވަރުންއަށްވުރެ ސީނިއާ އެކްޓަރެއް ކަމަށާއި އެ ދެތަރިން އެއް ހަމައެއްގައި ގުނޭނެ ގޮތެއް ނޯންނާނެ ކަމަށް ވެސް ސުނީތާ ބުންޏެވެ.

"އޭނާއަށް ވެސް (ވަރުން އަށް) އެކަން ފަސޭހަ ކަމަކަށް ނުވާނެ. ސަލްމާންއާއި ގޯވިންދާ ފަދަ ތަރިންނާ އަޅާކިޔުމަކީ އޭނާއަށް ވެސް ކުރިމަތިވާ ޕްރެޝަރެއް" ސުނީތާ ބުންޏެވެ.

ސުނީތާ އިތުރަށް ބުނީ ގޯވިންދާއަކީ ވަރުންގެ ބައްޕަ ޑޭވިޑް ދަވަންގެ ގިނަ ފިލްމުތަކެއްގައި މަސައްކަތްކުރި ތަރިއެއް ކަމަށާއި ވަރުން ކުޑައިރު ވެސް ގޯވިންދާގެ މަސައްކަތް ފެނިފައިވާނެ ކަމަށެވެ.

ވަރުންއާއި ގޯވިންދާގެ އެކްޓިންގައި އެއްގޮތް ކަމެއް ހުންނަ ސަބަބަކީ އެއީ ކަމަށް ސުނީތާ އޭނާގެ އިންޓަވިއުގައި ފާހަގަ ކޮށްފައިވެ އެވެ.

ވަރުންގެ އެންމެ ފަހުގެ ކޮމެޑީ ފިލްމުތަކުން ގޯވިންދާއާއި ވަރުންގެ އެކްޓިން ސްޓައިލް އެއްގޮތްކަން ފާހަގަކޮށް ގިނަ ބަޔަކު ސޯޝަލް މީޑިއާގައި ވެސް އެކަން ފާހަގަކުރި އެވެ.