ބަހާމާސްގެ ކްރޫޒް ޝިޕްގައި 200 އަށް ވުރެ ގިނަ ފަތުރުވެރިން ރާއްޖެ އަތުވެއްޖެ އެވެ.

ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ ދުވަސްވަރާ ދިމާކޮށް ރާއްޖެ އައި ހަތަރު ވަނަ ކުރޫޒް ޝިޕަކީ ކްރިސްޓަލް ސިންފަނީ ނަމަކަށް ކިޔާ ކުރޫޒް ޝިޕެކެވެ.

މި ކުރޫޒް ޝިޕް މިދިޔަ ބުރާސްފަތި ދުވަހު ރާއްޖެ އައިސްފައިވަނީ 212 ފަތުރުވެރިންނާއެކު އެވެ.

މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނި ގޮތުގައި ބަހާމާސްގެ މި ކުރޫޒް ޝިޕް ރާއްޖެއަށް އައިސްފައިވަނީ ސީޝެލްސް އިންނެވެ. މާލޭގައި އޮތް މި ކުރޫޒް ޝިޕް މިއަދު ލަންކާއަށް ފުރުމަށް ވަނީ ހަމަޖެހިފަ އެވެ.

މާލެ އައިސްފައިވާ ބަހާމާސްގެ ކުރޫޒް ޝިޕް --- ފޮޓޯ: އިމިގްރޭޝަން

މިދިޔަ މަހުގެ 30 ވަނަ ދުވަހު ސީޝެލްސް އިން ދެ ކުރޫޒް ޝިޕެއް ރާއްޖެއަށް އައިސްފައިވެ އެވެ. މި ދެ ޝިޕްގައި 3،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކުރި އެވެ. އަދި ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކުރޫޒް ޝިޕް ރާއްޖެއަށް އައުމަށް ހަމަޖެހިފައިވާ ކަމަށް މާޔާ އިން ބުނެފައިވެ އެވެ.

ރާއްޖޭގެ އިމިގްރޭޝަންގެ ސީޕޯޓް ޑިވިޝަނުން ވަނީ ކްރިސްޓަލް ސިންފަނީ އިން ރާއްޖެ އައި 216 ފަތުރުވެރިއަކާއި 416 ކުރޫ މެންބަރުންނަށް ކްލިއަރެންސް ހިދުމަތް ދީފައިވާކަމަށް ބުނެފަ އެވެ.