އިމްޕޯޓު އެކްސްޕޯޓުން މިދިޔަ މަހު ލިބުނު އާމްދަނީ ދަށްވެއްޖެ
ޗައިނީސް އާ އަހަރާ ދިމާކޮށް ޗައިނާ މީހުން އައިސް ފުރާލަނީ
އިންސްޓަގްރާމްގެ އަޕްޑޭޓްގައި ޓިކްޓޮކްއާ ވައްތަރު ގޮތްތަކެއް!
ހެއްވާ، މަޖާ، ކުރު ފިލްމު ކުޅުމަށް މަޝްހޫރު މުހައްމާ ކަލޯ (މުހައްމަދު އަބްދުﷲ) އަށް ބްރޯޑްކާސްޓިން މެންބަރުކަމަށް އައްޔަން ކުރުމުން ގިނަބައެއްގެ ފާޑު ކިއުން އަމާޒުވި އެވެ. ނަމަވެސް މުހައްމާ ކަލޯގެ ނަން ރައްޔިތުންގެ މަޖިލީހަށް ފޮނުއްވީ ރައީސް މުހައްމަދު މުއިއްޒު، ޚާއްސަ އިސްކަމެއް ދެއްވައިގެންނެވެ. ކުރިމަތިލީ މީހުންގެ ފެންވަރު ބަލާ ކޮމިޓީން މުހައްމާ އަށްވުރެ ގިނައިން މާކްސް ލިބުނު މީހުން ތިބި ކަމުގައި ވިޔަސް ރައީސް މުއިއްޒުގެ ފުރިހަމަ ބާރު އޮންނަ މަޖިލީހުގެ އަގުލަބިއްޔަތުން މުހަންމާ ކަލޯއަށް މަގާމު އަރުވައިފި އެވެ. އެހެންކަމުން ރައީސް އެފަދަ މަގާމެއް މުހައްމާ ކަލޯއަށް ނަމަވެސް އެހެން މީހަކަށް ނަމަވެސް އަރުވާނީ މުހިންމު ސަބަބެއް އޮވެގެން ކަމުގައި ގަބޫލުކުރަން ޖެހެ އެވެ. އެ ސަބަބަކާ މެދު ވިސްނުމުގެ ބޭނުމެއް ނެތެވެ. އޮތީ ރައީސް ކުރައްވާ މަސައްކަތްޕުޅު ގާތުން ބަލައި އަގު ވަޒަންކުރުމެވެ.
ރާއްޖޭގެ ރައީސްކަމުގައި މުއިއްޒު އެއް އަހަރަށް ވުރެ ދިގު މުއްދަތަކަށް ހުންނަވައިފި އެވެ. މި ދިގު މުއްދަތުގައި އެމަނިކުފާނު ވަނީ ގިނަ ރާއްޖޭގެ ގިނަ ރަށް ތަކަކަށް ޒިޔާރަތް ކުރައްވާފަ އެވެ. އެމަނިކުފާނު ރާއްޖެތެރެއަށް ކުރައްވާ ފުރަމާނަ ދަތުރުފުޅުގެ ތިންވަނަ ދަތުރުފުޅު ނިންމެވީ ދާދި ފަހުންނެވެ. މި ދަތުރުފުޅުތަކުގެ ތެރެއިން އެންމެ ފާހަގަކޮށްލެވޭ ކަމަކީ އެމަނިކުފާނު ކުޅުއްވައި ރިލީޒް ކުރައްވަމުން ގެންދަވާ ކުރު ފިލްމުތަކެވެ. އެފިލްމުތަކުގެ ރިވިއު ހެދުމަކީ ރައްޔިތުންނަށް ކުރަން ޖެހޭނެ ކަމެއްކަމަށް ދެކެމެވެ.
ރައީސް މުއިއްޒު ދާދިފަހުން ގއ. އަތޮޅުގެ ރަށަކަށް ވަޑައިގެންނެވީ އެވެ. އެމަނިކުފާނު ވަޑައިގަންނަވަން ވާއިރަށް ކުޑަ ކުއްޖެއްގެ އަތަށް ކަރުދާސްކޮޅެއް ދީފައި ރައީސަށް އަރުވަން ބަހައްޓަ އެވެ. ރައީސް ކަރުދާސްކޮޅު ބެއްލެވިއިރު އޮތީ އައި މިސް މައި ޑޭޑީ އެވެ. ރައީސް އެއްސެވީ ޑޭޑީ ކޮބައިތޯ އެވެ. ވަގުތުން ޑެޑީ ވީ ތަނެއް ބަލައި ޑޭޑީ ކުއްޖާއާ ހަމަޔަށް ގެނެސް ދިނުނަމަށް ސަލާމަތީ ބާރުތަކަށް އަމުރު ކުރެއްވި އެވެ. ބަސް ބުނާހާ އަވަހަށް އެކަންކޮށް ނިންމާލުމާއެކު ފެންނަނީ ތުއްތު ކުއްޖާ ކުރެން މިހާރު ހެޕީހޭ ރައީސް ސުވާލުކުރައްވާ މަންޒަރެވެ. ރައީސްގެ ކުރު ފިލްމްގެ ޑައިރެކްޓަރުން ވަގުތުން ފިލްމު ރިލީޒް ކޮށްލި އެވެ. އޯގާވެރި ރައީސެވެ. ރައްޔިތުން އަތް ޖަހަންވީ އެވެ.
އެހެން ދަތުރެކެވެ. ރ. އަތޮޅު މާކުރަތުގައި ފުރާވަރު އުމުރުގެ ދެތިން ފިރިހެން ކުދިން ފާރެއްގެ ކައިރީގައި ހުއްޓިގެން ތިބެ އެވެ. ރައީސް އެކުދިންގެ ގާތަށް ވަޑައިގަންނަވަ އެވެ. ބޭނުންވަނީ ކޮންކަމެއްތޯ ސުވާލުކުރައްވަ އެވެ. އެކުދިން ބުނެ އެވެ. ބޭނުމީ ފްޓުސަލް ދަނޑެކެވެ. ރައީސް ފަހަތަށް ބައްލަވައި ސްޕޯޓްސް މިނިސްޓަރު އަބްދުﷲ ރާފިއުއަށް ގޮވާލައްވާފައި މި ކުދިންނަށް މިރަށުގައި ފުޓުސަލް ދަނޑެއް ހަދައިދޭށޭ ވިދާޅުވި އެވެ. މިނިސްޓަރު ރާފިއު އާދޭހޭ ވިދާޅުވުމުން މިއަހަރު ހަދާދޭށޭ ވެސް ވިދާޅުވި އެވެ. އެ ކުރު ފިލްމުވެސް ވަގުތުން ރިލީޒްވީ އެވެ. ރައްޔިތުން އަތް ޖަހަންވީ އެވެ.
ދެން އޮތީ އެންމެ ފަހުގެ، އެންމެ ހިނގާ، ފިލްމެވެ. ރައީސް ހުންނެވީ ފުޓުބޯޅަ ދަނޑެއްގަ އެވެ. ނަންބަރު ހަތެއް ޖައްސަވައިގެން ރަތްކުލައިގެ ޖާޒީއެއްގައި ފުޓުބޯޅަ ކުޅުއްވާށެވެ. އިދިކޮޅުގައި އޮތީ ނޫކުލައިގެ ޓީމެކެވެ. ރައީސް ވަރަށް ދޭސީ ފާޑަކަށް ދުވެވަޑައިގަންނަވަ އެވެ. ޓީމުގެ މެންބަރަކު ރައީސަށް ބޯޅަ ޕާސް ކުރެ އެވެ. އެހެން މެންބަރުން ރައީސަށް މަގުފަހިކޮށްދެއްވަމުން މަޑުމަޑުން ރައީސާއެކު ހަރަކާތްތެރިވެ އެވެ. އިދިކޮޅު ޓީމުގެ ކުޅުންތެރިން ވެސް ރައީސަށް މަގު ދައްކަވަމުން ފަސްފަހަތަށް ދަނިކޮށް ރައީސް އެއޮތް ޖެއްސެވި ބޯޅަ ގޮސް ވަނީ ސީދާ ގޯލަށެވެ. ގޯލް ކީޕަރު ނޭނގޭ ކަމަށް ހަދާފައި ބޯޅަ މަތިން ފުންމައިގެން ގޮސް ގޯލް ދަނޑި ބުޑަށް ޖެހިގަނެ އެވެ. ފިލްމު ވަގުތުން ރިލީސްވެއްޖެ އެވެ. ރައްޔިތުން އަތް ޖަހަންވީ އެވެ.
ރައީސްގެ އަމަލުފުޅުތަކާއި ކުރު ފިލްމުތައް ފެނިފައި އެނެމެ ހަނދާނަށް އަންނަނީ ވަރަށް ކުޑައިރު ކިޔަން ލިބުނު ވާހަކައެއްގެ މަތިންނެވެ. އެވާހަކައަކީ ހުސެއިން ސަލާހުއްދީނު ލިޔުއްވި ކުދި 28 ވާހަކައިގެ ތެރޭގައި ހިމެނޭ ވާހަކަ އެވެ. ވާހަކައިގައި ވާގޮތުން ރަސްގެފާނު ރަށްބޭރު މަގަކުން ވަޑައިގަންނަވަނިކޮށް ފެނިވަޑައިގެންނެވީ މުސްކުޅިއަކު ޒައިތޫނި ގަސްތަކެއް އިންދަން އުޅެނިކޮށެވެ. ޒައިތޫނި ގަހަކީ ވަރަށް ދުވަހުން ހެދި ފޯދޭ ގަހެކެވެ. އެހެންކަމުން ރަސްގެފާނު، އެ މުސްކުޅިއާ އަށް ވިދާޅުވި އެވެ. މިގަހުގެ މޭވާ ކާން ނުލިބޭނެކަން އެނގޭއިރު އެގަސް އިންދުމުގެ ބޭނުމަކީ ކޮބައި ހެއްޔެވެ. މުސްކުޅިޔާ ދެންނެވި އެވެ. އަހަރެމެން ކެއީ އިހު ތިބީން އިންދި ގަހުގެ މޭވާ އެވެ. ފަހުން އަންނާނެ މީހުން ކެއުމަށް ބޭނުންވާ މޭވާ ލިބޭނެ ގަސް އިންދުމަކީ އަހަރެމެންގެ ވާޖިބެކެވެ. ރަސްގެފާނު ވިދާޅުވި އެވެ. ސާބަހެވެ. ރަސްގެފާނު މީހަކާ ދިމާޔަށް ސާބަހޭ ވިދާޅުވެއްޖެނަމަ އެމީހަކަށް ބައިތުލްމާލުން 1000 ދީނާރު ލިބުމަކީ އޭރު އާދަ އެވެ. އެހެންކަމުން އެ މީހާއަށް 1000 ދީނާރު ލިބުނެވެ. ރަސްގެފާނު ދެން ވިދާޅުވި ބަސްފުޅަށް ވެސް އެމީހާގެ ޖަވާބުން ރަސްގެފާނަށް ވިދާޅުވެވުނީ ސާބަހޭ އެވެ. އަނެއްކާ އަނެއް 1000 ދީނާރެވެ. މައްސަލައެއް ނެތެވެ. ރަސްގެފާނުގެ އަޅުންނެވެ. ބައިތުލްމާލަކީ ރަސްގެފާނުގެ މުދަލެވެ.
ރާއްޖޭގައި ރަސްކަން އުވުނުތާ މިހާރު ކިތަންމެ ދުވަހެކެވެ. މިހާރު ކުރަނީ ރައްޔިތުންގެ ވެރިކަމެވެ. ވެރިކަން ކުރައްވަނީ ރައީސެވެ. އެމަނިކުފާނު ވެރިކަން ކުރައްވަނީ ލިޔެވިފައި ހުންނަ ގަވާއިދުތަކަކާއި ހަމަތަކެއްގެ މައްޗަށެވެ. ޚަރަދު ކުރަން ޖެހެނީ ވަކި ގޮތަކަށެވެ. އެއީ ހަމަ ޖެހިފައި ހުންނަ ބަޖެޓުތަކަކުންނެވެ. އެ ބަޖެޓުތަކަކީ އަހަރު ދުވަހަށް ފާސްވެ ނިމިފައި ހުންނަ އެއްޗެކެވެ. އެހެން ކަމުން ރައީސް ވަޑައިގަންނަވަނިކޮށް މަގުމަތިން ގޮވައިލާފައި ތިމަންނާމެނަށް މިވެނި ކަމެއް ބޭނުމޭ ބުނުމުން އެކަމަކާ ބެހޭ މިނިސްޓަރަކަށް ވިދާޅުވެފަ އެކަމެއް ކޮށްދޭށެކޭ ރައީސެއް ކަމަކު ވިދާޅެއް ނުވެވޭނެ އެވެ.
ރައީސްގެ ކުރު ފިލްމުތަކަށް ޚާއްސަ ޓީމުތަކާއެކު ޝޫޓިންގައި ދެވަނަ އަހަރު ފެށުނީ އެވެ. ކުރިއަށް ހުރި ފިލްމުތަކުން ހެއްވާ މަޖާ ބައި ތަންކޮޅެއް ގިނައިން ފެނުން ގާތެވެ. އެބައިގެ ޑައިރެކްޓަރަކަށް މުހައްމާއަކީ މުހިންމު މީހެކެވެ. ރައްޔިތުން އަތްޖަހާށެވެ.
