"މިއީ ފައިސަލްގެ ވެސް ވަރަށް ބުރަ މަސައްކަތާއި ވަރަށް ބޮޑު ބައިވެރު ވުމަކާ އެކު ގެނައި ވެރިކަމެއް." ރައީސް މުހައްމަދު މުއިއްޒުގެ ފުރަތަމަ ޓޫރިޒަމް މިނިސްޓަރު އިބްރާހިމް ފައިސަލް މަގާމުން ވަކި ކުރުމާ ގުޅިގެން ފައިސަލްގެ ބައްޕަ އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި އެވެ. އަބްދުއްރަހީމް ދެކެ ވަޑައިގަންނަވާ ގޮތުގައި މިސަރުކާރު ގެންނަން އެހާ ބުރަ މަސައްކަތްކޮށްފައި ހުރުމާއި ރައީސް މުއިއްޒާ ދެކޮޅަށް އެއްވެސް ކަމެއް ނުކުރާނެކަމުގެ ޔަގީން ކަން އޮތުމުން ފައިސަލް މަގާމުން ވަކި ކޮށްގެން ނުވާނެ އެވެ. އޭނާ މަގާމުން ވަކި ކުރުމަކީ އިންސާފުވެރި ކަމެއް ނޫނެވެ.

ރައީސް މުއިއްޒަށް ވެރިކަން ލިބިވަޑައިގެންނެވުމާ އެކު އެންމެ ގަދަޔަށް އިވުނު އެއް ވާހަކައަކީ އެވެރިކަން ގެނައުމަށްޓަކައި ބުރަކޮށް މަސައްކަތް ކުރި ގިނަ ބަޔަކު ބާކީކޮށްލި ވާހަކަ އެވެ. ޚާއްސަކޮށް ވެރިކަން ލިބުމާއެކު ކެމްޕޭނުގައި ބޭނުން ކުރި ހުސްގޮނޑި ނަގާ އެއްލާލި ވާހަކައަކީ މަޝްހޫރު ވާހަކައެކެވެ. އެހެންކަމުން ފައިސަލަށް މި ދިމާވިގޮތަކީ މިވެރިކަމުގެ ކަންތައް ހިނގަމުން އައި ގޮތަށް ބަލާއިރު މާ އާކަމެއް ނޫން ކަމަށް ބަލަންޖެހެ އެވެ. ގަބޫލްކުރަން ދަތިވީ ރައީސް މުއިއްޒަށް މަގާމު ހޯއްދަވައި ދެއްވި އަބްދުއްރަހީމްގެ ދަރިފުޅަށް އެގޮތް މެދުވެރިވުމެވެ.

އަބްދުއްރަހީމް ދެކެވަޑައިގަންނަވާ ގޮތުގައި މުއިއްޒުގެ ސަރުކާރަކީ އޭނާ ގެންނެވި ސަރުކާރެކެވެ. ޕީޕީއެމްގެ ރިޔާސީ ކެންޑިޑޭޓެއްގެ ގޮތުގައި ކުރީގެ ރައީސް އަބްދުﷲ ޔާމީން ހަމަޖެހިފައި އޮތް ނަމަވެސް ޔާމީންގެ ބަދަލުގައި އެހެން މީހަކު ވެރިކަމަށް ގެންނެވުމަށްޓަކައި ދުރާލާ ރޭއްވެވި ކަމަށް އަބްދުއްރަހީމް ވަނީ ވިދާޅުވެފަ އެވެ. އެއީ ވެރިކަމުގެ ކުރީ ކޮޅުގަ އެވެ. އޭރު އަބްދުއްރަހީމް ވިދާޅުވަމުން ގެންދެވީ އެމަނިކުފާނު އެންމެ އިތުބާރު ކުރައްވާ އެންމެ ގަދަރުކުރައްވާ ސިޔާސީ ބޭފުޅަކީ ރައީސް މުއިއްޒު ކަމަށެވެ.

ރައީސް މުއިއްޒުގެ ވެރިކަން ދިފާއު ކުރެއްވުމަށް ޖަލްސާތަކުގައި ކުރީގެ ރައީސް ޔާމީނާ ދެކޮޅަށް އެތަކެއް ވާހަކަފުޅެއް އަބްދުއްރަހީމް ދެއްކެވި އެވެ. މުއިއްޒު ވެސް ވިދާޅުވަމަން ގެންދެވީ އަބްދުއްރަހީމަކީ ސިޔާސީ ރޯލް މޮޑެލް ކަމަށެވެ. އެހެންކަމުން ރައީސް މުއިއްޒާއި އަބްދުއްރަހީމްގެ ގުޅުން ފެނުނީ ވަރަށް ބަދަހިކޮށެވެ. އަބްދުއްރަހީމް ވިދާޅުވަމުން ގެންދެވީ މުއިއްޒަށް ފަސް އަހަރުގެ ދެ ދައުރު ހޯއްދަވާ ދެއްވާނެ ކަމަށެވެ. އެހެން ނަމަވެސް ފައިސަލް މަގާމުން ވަކި ކުރުމާއެކު އެހުރިހާ ކަމެއް މިހާރު ވަނީ އެކޮޅުކޮޅުން ޖެހިފަ އެވެ. އަބްދުއްރަހީމް ވިދާޅުވަނީ ގުޅުން ރަނގަޅު ނަމަ އެކަން އެހެން ނުވާނެ ކަމަށެވެ. އާޚިރުގައި މުއިއްޒުގެ ފަރާތުން އަބްދުއްރަހީމަށް ލިބިވަޑައިގެންނެވީ ކެމްޕޭނަށް ބޭނުންކުރި ހުސްގޮނޑީގެ އިއްޒަތެވެ.

އަބްދުއްރަހީމް ފުޅިން ނެރުއްވި ޖިންނި

ޕީޕީއެމް މަގުމަތީގައި އުޅުނު ދުވަސްވަރު މުއިއްޒަކީ ތޯލާ ފުޅިއަކަށް އެޅޭފަދަ ކުޑަ މީހެކެވެ. ދިނީމާ ދިން ޓީ ޝާޓެއް ލައިގެން ބުނީމާ ބުނި ތަނެއްގައި އިށީނދެގެން އިނުމަކީ މުއިއްޒުގެ ސިފަ އެވެ. ރައީސް ޔާމީނާއި އަބްދުއްރަހީމްގެ ފަހަތުން ވަރަށް ބަސްއަހައިގެން އުޅުނު މީހެކެވެ.

އެއީ ރައީސް ޔާމީންގެ ބަދަލުގައި އެހެން ކެންޑިޑޭޓަކު ނެރުމަށް އަބްދުއްރަހީމް ރާއްވަވަމުން ގެންދެވި ދުވަސްވަރެވެ. ކެންޑިޑޭޓަކަށް މުއިއްޒު ޚިޔާރު ކުރެއްވީ މުއިއްޒުގެ މަޑުމައިތިރި ކަމާއި ބަސްއެހުން ހުރި ގޮތުން ވެރިކަމުގެ ބާރުތައް މުށުތެރެއަށް ލިބިވަޑައިގަންނަވާނެ ކަމަށް ދެކެވަޑައިގެންނެވުމުގެ ނަތީޖާކަމަށް ވެސް ވެދާނެ އެވެ.

އަބްދުއްރަހީމްގެ ރޭއްވެވުމުގެ ދަށުން ޕީޕީއެމްގެ ބޮޑު ސަޕޯޓާއި ރައީސް ޔާމީންގެ ހުސް ގޮނޑީގެ އެހީއާއެކު ވެރިކަމަށް ވަޑައިގެންނެވި މުއިއްޒަށް ވީ، ތޯލާ ފުޅިއެއްގައި ބަންދުކޮށްފައި އޮތް ޖިންނިއެއް ނެރެ މިނިވަންކުރުމުން ވާނެ ގޮތެވެ. ވެރިކަމުގެ ބާރު ލިބުމުން ހަމަ އިސްކޮޅަށް ތެދުވެ ބަލާލިއިރު އަބްދުއްހީމް ފެނުނީ މާކުޑަކޮށެވެ. މާ ތިރިކޮށެވެ. ބިޔަ ފިޔަވަޅެއް އަޅައިފިނަމަ ފައިދަށުވެ، ޗިސްވެދާނެ ހާވެސް ބަލިކަށިކޮށެވެ. އެހެންކަމުން ތިރިޔަށް ބަލާލައިފައި އެޅި ފުރަތަމަ ފިޔަވަޅުން އަބްދުއްރަހީމް އެވަނީ ވަރަށް ބޮޑަށް ފިތި އަލުން ހިން ދެމިނުލެވޭ ވަރުވެފަ އެވެ.

ތޯލާފުޅީގައި އޮތް ޖިންނި ފުޅިން ނިކުމެ ހަމަ އިސްކޮޅަށް ދެމި ލައިފަ އެވެ. އަދުރޭގެ ބޮގައި އެޅި ފިޔަވަޅަށްފަހު އަނެއް ފިޔަވަޅު އަޅާނީ ކޮން ދިމާއެއްގައި ކަމެއް ނޭނގެ އެވެ. އެހެންކަމުން އަބްދުއްރަހީމަށް އޮތީ ފުޅިން ނެރުނު ޖިންނި އަނބުރާ ފުޅިޔަށް ލެވޭނެ ގޮތެއް ހޯއްދަވަން ޖެހިވަޑައިގެންފަ އެވެ. އެކަމަށްޓަކައި ރަނގަޅު އެދުރު ބޭކަލެއްގެ ބޭނުން މިވަގުތަށް މުހިންމެވެ. ޝީރާޒީގެ ފާނު ކަމަށް ވިޔަސް ބަރުބަރީ ކަމުގައި ވިޔަސް ނުވަތަ ފޮނަދޫ ދަންނަކަލޭގެފާނު ފަދަ އެދުރުބޭކަލަކު ކަމަށް ވިޔަސް، އެފަދަ ބޭކަލެއްގެ އެހީ މިވަގުތު އަބްދުއްރަހީމަށް ބޭނުންވެ އެވެ.