ކުރީގެ ރައީސް މުހައްމަދު ވަހީދުގެ ވެރިކަމުގައި ދިވެހި ސަރުކާރަށް 500 މިލިއަން ޑޮލަރުގެ ލޯނެއް ހަމަޖައްސައިދިނުމަށް ކުޑަކުދިންނަށް ޖިންސީ ގޯނާ ކުރުމުގެ ބޮޑު ރިންގެއް ހިންގަމުންދިޔަ ޖެފްރީ އެޕްސްޓީން ގެ އެހީތެރިކަން ހޯދިކަން ހާމަވެއްޖެ އެވެ.

ރައީސް މުހައްމަދު މުއިއްޒުގެ އެޑްވައިޒަރުކަން ކުރައްވާ، ވަހީދުގެ ވެރިކަމުގެ ތެރެއިން އެޕްސްޓީން އާއި ބައްދަލުކުރިކަން އެނގެން އޮތީ އެމެރިކާގެ ކޯޓެއްގައި ހިނގި ދައުވާއެއްގެ ލިޔެކިޔުންތަކުންނެވެ. އެއީ އެޕްސްޓީން ސެކްސް ޓްރެފިކިންގެ ބޭނުންތަކަށް އަދި އޭނާގެ ގާތް މީހުންނަށް ފައިސާ ބެހުމަށް އެހީތެރިވެދިން ކަމަށް ބުނެ ޖޭޕީ މޯގަން ޗޭސް ބޭންކް އާއި ދެކޮޅަށް ކުރި ދައުވާ އެވެ.

ލޯނު ހޯދުމުގެ އެހީތެރިކަމަށް އެދި ޖުލައި 28، 2012 ގައި ވަހީދު މެއިލްއެއް ފޮނުވިކަން ލިޔެކިޔުންތަކުން އެނގެ އެވެ. އެ މެއިލްގައި ވިދާޅުވެފައިނީ ސަރުކާރުން 500 މިލިއަން ޑޮލަރުގެ ލޯނެއް ހޯދުމަށް މަސައްކަތް ކުރަމުންދާ ކަމަށެވެ. އޭރުގެ ފިނޭންސް މިނިސްޓަރު އަބްދުﷲ ޖިހާދާއި އެކަމާ މަޝްވަރާކުރެއްވި ކަމަށް ވެސް އެ މެއިލްގައި ލިޔުއްވާފައިވެ އެވެ. އަދި ލޯނު ބޭނުންވަނީ 10 އަހަރުން އަނބުރާ ދައްކާ ގޮތަށް ކަމަށް ވެސް ވެ އެވެ.

އެ ވަގުތު ދުނިޔޭގެ މާލީ ހާލަތު އޮތް ގޮތުން ލޯނު ހޯދުމުގެ އެޕްސްޓީން އަށް ކުރެވޭނެ ކަމެއް އަންގައި ދިނުމަށް އެދިވަޑައިގެންފައިވެ އެވެ. އަދި ދެއްވި އެހީތެރިކަމަށް ޝުކުރު ދަންނަވާ ކަމަށް ވެސް ލިޔުއްވާފައިވެ އެވެ.

ކޯޓުގެ ލިޔެކިޔުންތަކުން އެނގޭގޮތުގައި ވަހީދުގެ މެއިލް، އެޕްސްޓީން ފޯވާޑު ކުރީ އޭރު ޖޭޕީ މޯގަންގެ ކޯޕަރޭޓް އެންޑް އިންވެސްޓްމަންޓް ބޭންކުގެ ސީއީއޯ ޖެސް ސްޓޭލީ އަށެވެ.

އެ މެއިލް ފޮނުވިތާ މަހެއް ފަހުން އޮގަސްޓު 31، 2012 ގައި ޗައިނާއިން ރާއްޖެއަށް 500 މިލިއަން ޑޮލަރުގެ ލޯނެއް ދީފައިވެ އެވެ. އެ ހަބަރު ރޮއިޓާސް އިން ރިޕޯޓުކޮށްފައިވެ އެވެ.

މިކަމާ ގުޅިގެން ވަހީދުގެ ބަހެއް އަދި ވަނީ ލިބޭގޮތް ނުވެފަ އެވެ.

މިކަން ހާމަވީ ސޯޝަލް މީޑިއާގައި ލީކްކޮށްލި ލިޔުންތަކެއްގެ ތެރެއިންނެވެ.