ނޫސްވެރިން އެކްރެޑިޓްކުރުމާ ބެހޭ އުސޫލެއް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން އެކުލަވާލައިފި އެވެ.

މި އުސޫލުގެ މަގްސަދުތަކުގެ ތެރޭގައި ފެންވަރު ރަނގަޅު ހިދުމަތެއް ފޯރުކޮށްދިނުމަށް ބާރު އެޅުމާއި ނޫސްވެރިންގެ ގޮތުގައި މަސައްކަތްކުރާ ފަރާތްތަކުގެ ތައުލީމާއި ތަޖުރިބާ ކަނޑައެޅުން ހިމެނެ އެވެ.

މީގެ އިތުރުން، ނޫސްވެރިންގެ ދަފްތަރެއް އެކުލަވައިލުމާއި، ބްރޯޑްކާސްޓިން ދާއިރާގައި މަސައްކަތްކުރާ ނޫސްވެރިންނަށް ފާސް ދޫކުރުން ވެސް މި އުސޫލުގެ މަގްސަދުތަކުގެ ތެރޭގައި ހިމެނެއެވެ.

މި އުސޫލުގެ ދަށުން އެކްރެޑިޓްކުރެވޭ ފަރާތްތައް:

އެޑިޓަރުން

ރިޕޯޓަރުން/ނޫސްވެރިން

ޕްރެޒެންޓަރުން

ލިޔުންތެރިން

ކޮލަމިސްޓުން

ފޮޓޯ ޖާނަލިސްޓުން/ފޮޓޯގްރާފަރުން

ވީޑިއޯ ޖާނަލިސްޓުން/ވީޑިއޯގްރާފަރުން

އެކްރެޑިޓްކުރުމަށް ހުށަހަޅާ ފަރާތްތަކުން، ބްރޯޑްކާސްޓިން ނުވަތަ ނޫސްވެރިކަމުގެ ދާއިރާއިން މަދުވެގެން އެމްކިއުއޭ ލެވެލް ތިިނެއް ފުރިހަމަކޮށްފައިވުން ނުވަތަ ތިން އަހަރު ދުވަހުގެ ތަޖުރިބާ ލިބިފައިވާންޖެހޭނެ ކަމަށް އުސޫލުގައިވެއެވެ.

އަދި ފާއިތުވި ފަސް އަހަރު ދުވަހު ޖިނާއީ ކުށެއް ސާބިތުވެފައިނުވާ ފަރާތެއް ކަމުގައި ވާންޖެހޭނެ ކަމަށް އުސޫލުގައިވެއެވެ.

އެކްރެޑިޓްކޮށް ކާޑު ދޫކުރެވޭނީ، ބްރޯޑްކާސްޓްކުރުމުގެ ކޯޑް އޮފް ޕްރެކްޓިސް، ކުޑަކުދިންނާއި އަންހެނުންގެ ޙައްޤުތައް ހިމާޔަތްކުރުން، ޤުދުރަތީ ކާރިސާތަކާއި ހިތާމަވެރި ހާދިސާތައް ކަވަރުކުރުން، ހަލަބޮލި ހާލަތުތައް ކަވަރުކުރުން އަދި އިންތިހާބުގެ ދުވަސްވަރު ސިޔާސީ ކޮންޓެންޓް ބްރޯޑްކާސްޓްކުރުމުގެ ގައިޑްލައިންތަކާ ގުޅޭ ތަމްރީނުތައް ފުރިހަމަކުރާ ފަރާތްތަކަށެވެ. މި ތަމްރީނުގެ ފީއަކީ 100 ރުފިޔާ ކަމަށް ވެއެވެ.

އެކްރެޑިޓެޑް ޕްރެސް ފާސްގެ މުއްދަތަކީ ފަސް އަހަރު ދުވަހެވެ. މުއްދަތު ހަމަވުމުގެ 30 ދުވަހުގެ ކުރިން ކާޑު އައުކުރުމަށް އެދި ކޮމިސަނަށް ހުށަހަޅަންވާނެ ކަމަށް އުސޫލުގައިވެއެވެ.

ކާޑު ބާތިލުކުރެވޭނެ ހާލަތްތަކުގެ ތެރޭގައި ޖިނާޢީ ކުށެއް ސާބިތުވުން، ތަކުރާރުކޮށް އިސްލާހުކުރަން އެންގުމަށްފަހު ވެސް އިސްލާހުނުކުރުން، ކޯޑް އޮފް ޕްރެކްޓިސްއާ ޚިލާފުވުން، ނުވަތަ ނޫސްވެރިކަމުގެ ސުލޫކީ މިންގަނޑާ ޚިލާފު އަމަލެއް ހިންގުން ހިމެނެއެވެ.

މި އުސޫލަށް ޢަމަލުކުރަން ފަށާނީ، އުސޫލު ކޮމިސަނުގެ ވެބްސައިޓުގައި ސާއިއުކުރާ ތާރީހުން ފެށިގެން ހަ މަސް ދުވަސް ފަހުން ކަމަށް ވެއެވެ.