މާފަންނުގެ ރައްޔިތުންނާ ބައްދަލުކުރަން ރައީސް މުހައްމަދު މުއިއްޒު ބާއްވަވާ ބައްދަލުވުމުގައި ސުވާލުކުރަން ބޭނުންވާ މީހުން ނަންނޯޓްކުރަން ދާއިރާގެ ރައްޔިތުންނަށް ފޮނުއްވި މެސެޖާ ގުޅިގެން މާފަންނު މެދު ދާއިރާގެ މެންބަރު އަސްމާ ރަޝީދު މާފަށް އެދިވަޑައިގެންފި އެވެ.

ރައީސް މުއިއްޒު މާފަންނުގެ ރައްޔިތުންނާ ބައްދަލުކުރެއްވުން އޮންނާނީ އަންނަ ބުރާސްފަތި ދުވަހު ތާޖުއްދީން ސްކޫލްގަ އެވެ. އެ ބައްދަލުވުމުގައި ރައީސްއާ ސުވާލެއް ކުރަން ނުވަތަ މެސެޖެއް ދޭން ބޭނުންވާ ނަމަ، އެންގުމަށް އެދިވަޑައިގެން، އަސްމާ ވަނީ ދާއިރާގެ މެންބަރުންނަށް މެސެޖެއް ފޮނުއްވައިފަ އެވެ.

އެކަމާ ގުޅިގެން ކޯފާ އިސްކުރައްވައި ރައީސް މުއިއްޒު ވަނީ ދާއިރާގެ ރައްޔިތުންގެ ކިބައިން މައާފަށް އެދުމަށް ހަރުކަށިކޮށް އަސްމާއަށް އަންގަވާފަ އެވެ.

ރައީސް މުއިއްޒުގެ އެންގެވުމާ ގުޅިގެން އަސްމާ މިއަދު ނެރުއްވި ނޫސް ބަޔާނެއްގައި ވިދާޅުވީ އޭނާ ފޮނުވި މެސެޖަކީ ޖަލްސާގައި އެއްވެސް ސަބަބަކާ ހުރެ ރައީސްއާ ސީދާ ސުވާލު ކުރަން ފުރުސަތު ނުލިބޭ ފަރާތްތަކުގެ ހިޔާލާއި ކަންބޮޑުވުންތައް ރައީސްއާ ހަމައަށް ފޯރުކޮށްދިނުމުގެ މަގުސަދުގައި ފޮނުވި މެެސެޖެއް ކަމަށެވެ.

އަދި އޭނާ ފޮނުވި މެސެޖާ ގުޅިގެން އެއްވެސް ބޭފުޅަކަށް އޮޅުމެއް އަރާފައިވާ ނަމަ، ނިހާޔަތަށް މާފަށް އެދޭ ކަމަށް އެ ބަޔާނުގައިވެ އެވެ.

ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ރައީސްގެ ބައްދަލުވުންތަކުގައި މިނިވަންކަމާއެކު ހިޔާލު ފާޅު ކުރެވޭނެ ކަމަށެވެ. އަދި ކުރީ ބައިގައި ސުވާލު ހުށަހަޅަން ނުޖެހޭނެ ކަމަށް ވެސް އޭނާ ވިދާޅުވި އެވެ.