ވެނެޒުއެލާގައި ހުންނަ މަސްތުވާތަކެތީގެ ނެޓްވޯކްތަކަށް އެމެރިކާއިން ދޭ ހަމަލާތައް "ވަރަށް އަވަހަށް" ފެށޭނެ ކަމަށް އެގައުމުގެ ރައީސް ޑޮނާލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް ވިދާޅުވީ ވެނެޒުއެލާގެ ޑްރަގް ނެޓްވޯކްތަކުގެ ބިރު ކައިރި ގައުމަތަކަށް ވަރަށް ބޮޑުވެފައިވާ ކަމަށާއި އެކަން ނިމުމަކަށް ގެންނަން ޖެހޭ ކަމަށެވެ. އެގޮތުން ވެނެޒުއެލާގައި މަސްތުވާތަކެތީގެ ވިޔަފާރިކުރާ ކަމަށް ތުހުމަތު ކުރެވޭ ނެޓްވޯކްތަކާ ދެކޮޅަށް އެމެރިކާ ސިފައިން ވަރަށް އަވަހަށް އޮޕަރޭޝަންތައް ފަށާނެ ކަމަށް އޭނާ ވިދާޅުވި އެވެ.

ޓްރަމްޕް ވިދާޅުވީ ވެނެޒުއެލާގެ ޑްރަގް ނެޓްވޯކްތަކާ ދެކޮޅަށް ފަށާ އޮޕަރޭޝަންތައް ހިންގާނީ ބިމުން ކަމަށެވެ. އެގޮތުން އެ މައްސަލަ ހައްލުކުރުމަށް އޮޕަރޭޝަން ފަށަން މިހާރު އޮފިޝަލުންނާއެކު މަޝްވަރާތައް ކުރެވިފައިވާ ކަމަށް ވެސް ޓްރަމްޕް ވިދާޅުވި އެވެ.

"އަޅުގަނޑުމެން ބިމުން ވެސް އެ މީހުން ހުއްޓުވަން އޮޕަރޭޝަންތައް ފަށާނަން. ބިމުގެ މަގުން އެކަން ކުރަން ފަސޭހަވާނެ. އެކަން ވަރަށް އަވަހަށް ފެށޭނެ،" ރައީސް ޓްރަމްޕް ވިދާޅުވި އެވެ.

ޓްރަމަޕް ވިދާޅުވީ ވެނެޒުއެލާގައި ހިންގާ ބޮޑެތި ޑްރަގް ނެޓްވޯކްތަކާ ދެކޮޅަށް ހިންގާ އޮޕަރޭޝަނަކީ މުޅި ކެރިބިއަން ސަރަހައްދުގައި މަސްތުވާތަކެތި އެތެރެކޮށް ވިއްކުމުގެ ވިތަފާރިކުރާ މަގުތައް ބަންދުކުރުމަށް އަމާޒުކޮށްގެން ކުރާނެ މަސައްކަތެއް ކަމަށާއި މިކަން ކާމިޔާބު ވަންދެން އޮޕަރޭޝަން ކުރިޔަށް ދާނެ ކަމަށް ޓްރަމްޕް ވިދާޅުވި އެވެ.

ޓްރަމްޕް ވިދާޅުވީ އެމެރިކާއިން މި އޮޕަރޭޝަން ފަށަން މިހާރު ވެސް އެމެރިކާގެ ފަޔާ ޖެޓްތަކާއި ނޭވީގެ ދިހަ ނަމަވަރާއި، ގިނަ ހަނގުރާމަ މަނަވަރު އަދި ގާތްގަނޑަކަށް 15،000 ސިފައިން ކެރިބިއަން ސަރަހައްދަށް ފޮނުވާފައިވާނެ ކަމަށެވެ.

އެމެރިކާ ސިފައިން ވަނީ މަސްތުވާތަކެތި ކަމަށް ޝައްކުކުރެވޭ ދޯނިފަހަރަށް ފާއިތުވި މަސްތަކުގައި 20 އަށް ވުރެ ގިނަ ވައިގެ ހަމަލާދީ 83 މީހުން މަރާލާފަ އެވެ. އަދި އަދި ހަމަލާތައް ދީފައިވާ ގިނަ އުޅަނދުތަކަކީ ވެނެޒުއާލާގެ ބަނދަރުން ފުރައިގެން ދިޔަ އުޅަނދުތަކެއް ކަމަށް ވެސް އެމެރިކާއިން ވަނީ ބުނެފަ އެވެ.

ޓްރަމްޕް ވެނެޒުއެލާ އާ ދެކޮޅަށް ހަމަލާތައް ދޭނެކަމުގެ އިންޒާރު ދީފައިވާތީ ވެނެޒުއެލާއިން ވަނީ އެގައުމުގެ އަސްކަރީ ހަރަކާތްތައް ވަރުގަދަ ކޮށްފަ އެވެ. އެގޮތުން އަދި ޓްރަމްޕް ވެނެޒުއެލާއަށް ހަމަލާއެއް ދީފި ނަމަ ރައްދުގައި ހަމަލާދޭނެކަމުގެ އިންޒާރު ވެސް އެ ގައުމުން ވަނީ ދީފަ އެވެ.