ވައިނުސާފުވުމުގެ އަސަރު އެންމެ ބޮޑަށް ކުރަނީ މެދުރާއްޖެ ތެރޭގެ އަތޮޅުތަކަށް ކަމަށާއި ކުރިއަށް އޮތް ދެ ދުވަހު ވައިނުސާފުވުން ބޮޑުވާނެ ކަމަށް އެޗްޕީއޭ އިން ބުނެފި އެވެ.

ހާއްސަކޮށް މެދު ރާއްޖެ ތެރޭގައި ވައި ނުސާފުވުމުގެ އަސަރު ބޮޑަށް ކުރަމުންދާ ކަމަށް މޫސުމާބެހޭ ގައުމީ އިދާރާގެ ރެކޯޑުތަކުން ދައްކާތީ އެކަމަށް ހާއްސަ ސަމާލުކަމެއް ދިނުމަށް އެޗްޕީއޭ އިން ވަނީ އިލްތިމާސްކޮށްފަ އެވެ.

އެޗްޕީއޭއިން ބުނީ ކުރިއަށް އޮތް ދެ ދުވަހު ވެސް ވައިނުސާފުވުމުގެ އަސަރު ރާއްޖޭގެ ސަރަހައްދުގައި ހުންނާނެ ކަމަށް ބެލެވޭ ކަމަށެވެ.

ވައިގެ ސާފުކަން ހުރި މިންވަރު ދައްކައިދޭ "އައިކިއު އެއާ" ގެ މައުލޫމާތުތަކަށް ބަލާއިރު ރާއްޖޭގެ އެންމެ އުތުރުން ކުޅުދުއްފުށި ހިމެނޭ ސަރަހައްދާއި މެދުރާއްޖެތެރޭގެ އިތުރުން ދެކުނުން ފުވައްމުލައް ސިޓީގައި ދުންފުހުގެ ސަބަބުން ވައި ވަނީ ވަރަށް ބޮޑަށް ނުސާފުވެފަ އެވެ. އެ ސަރަހައްދުތަކުގެ ވައިގެ ކޮލިޓީ ރަތް ސަމާލުގައި ހުރި އިރު އެހެން ސަރަހައްދުތަކުގައިވެސް އެކި މިންވަރަށް ވައި ވަނީ ނުސާފުވެފައެވެ.

ވައި ނުސާފުވުމުގެ ސަބަބުން ސިއްހީގޮތުން ނޭދެވޭ އަސަރުތައް ކުރުމާއި ފުއްޕާމެއާއި ހިތުގެ ބަލިތައް ބޮޑުވުމުގެ ނުރައްކާ ބޮޑުވާނެތީ ހާއްސަ ފިޔަވަޅުތަކެއް އެޅުމަށް އެޗްޕީއޭ އިން ވަނީ އިލްތިމާސްކޮށްފަ އެވެ. އެގޮތުން ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުމަށް ވަނީ އެދިފަ އެވެ. އަދި ބޭރަށް ނުކުންނަ ވަގުތުތަކުގައި މާސްކު އެޅުމަށާއި ބޭރުގެ ނުސާފު ވައި ނުވަންނާނެހެން ގޭގެ ދޮރުތައް ލައްޕާފައި ބެހެއްޓުމަށާއި އެއަރ ޕިއުރިފަޔާ ބޭނުންކުރުމަށްވެސް އެޗްޕީއޭއިން އިލްތިމާސްކުރެ އެވެ.