އަންނަ އަހަރުގެ ޖުލައި މަހަށް އައްޑޫގެ ގުޅިފައިވާ ރަށްތަކަށް ދިމާވެފައިވާ ކަރަންޓްގެ މައްސަލަ ހައްލުކުރަން ކުންފުންޏަކާ ހަވާލުކޮށްފައިވާ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެ އެވެ.

"ދަ ގްރޭޓާ އައްޑޫ" ކެމްޕޭން އިވެންޓްގައި ވާހަކަފުޅުދައްކަވަމުން ރައީސް ވިދާޅުވީ އެ މައްސަލަ ހައްލުކުރަން މިއަދު ހަވީރު ކުންފުންޏަކާ ހަވާލުކޮށްފައިވާނެ ކަމަށެވެ. ނަމަވެސް އެކަމުގެ ތަފްސީލެއް ނުދެއްވަ އެވެ.

ރައީސް ވިދާޅުވީ، ނިމިދިޔަ އެމްޑީޕީ ސަރުކާރަށް މަޖިލީހުގެ މެޖޯރިޓީ ދިނުމުން ވެސް އެ މައްސަލަ ހައްލު ނުކުރެވުނު ކަމަށެވެ.

"ކައުންސިލުގެ މެޖޯރިޓީ އޮތް، މަޖިލީހުގެ ސުޕަމެޖޯރިޓީ އޮތް، ފަސް އަހަރު ނިމުނީ، ހައްލެއްނުވޭ،" ރައީސް ވިދާޅުވި އެވެ.

އެ އެއްބަސްވުމުގެ ދަށުން ކުރިއަށް އޮތް 20 އަހަރަށް އައްޑޫގެ ކަރަންޓްގެ މައްސަލަ ހައްލުކުރެވޭނެ ކަމަށެވެ.

"ސައްބީސް މެގަވޮޓްގެ ކަރަންޓު ފޯރުކޮށްދޭނެ ނިޒާމު އިރާދަކުރެއްވިއްޔާ މި އެއްބަސްވުމުގެ ދަށުން ގާއިމްކުރެވިގެން ދާނެ، މި އަންނަ އަހަރުގެ ޖުލައި މަހާ ހަމައަށް ދާއިރުގަ އިރާދަކުރެއްވިއްޔާ މުޅިން އެކުގައި މި މަޝްރޫއު ނިމި، ކުރިއަށް އޮތް 20 އަހަރު ދުވަހަށް އިރާދަކުރެއްވިއްޔާ އައްޑޫ ސިޓީގެ ކަރަންޓުގެ މައްސަލަ ހައްލުވެގެން ދާނެ މިކަމުގެ ސަބަބުން،" ރައީސް ވިދާޅުވި އެވެ.