ހަރަދު ކުޑަކުރުމުގެ ނަމުގައި ގައުމުގެ ރައްޔިތުންނަށް އޮޅުވާލައިގެން ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއް ދުވަހެއްގައި ބޭއްވުމަށް ރައީސް މުހައްމަދު މުއިއްޒު ކުރައްވާ މަސައްކަތަކީ ބޭކާރު މަސައްކަތެއް ކަމަށާއި އެއަށް ރައްޔިތުންގެ ވޯޓު ނުދޭނޭ ކަމަށް ހިތަދޫ ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ނާޒިލް ވިދާޅުވި ގޮތުގައި، ހަރަދު ކުޑަކުރުމުގެ ނަމުގައި އިންތިހާބުތައް އެއްކޮށްލަން ސަރުކާރުން އުޅުނު ނަމަވެސް، ރައްޔިތުން އެކަމަށް ތާއީދެއް ނުކުރާނެއެވެ. އަދި އެއީ ރައްޔިތުން ބަލައިގަންނާނެ ކަމެއް ވެސް ނޫންނެވެ.

އެހެން ކަމުން ސަރުކާރުން އޮޅުވާލައިގެން ހަރަދު ކުޑަކުރުމުގެ ނަމުގައި ނަގަން މަސައްކަތް ކުރާ ފެންނަ ނުފެންނަ ވޯޓުގެ ނަތީޖާ ނުކުންނާނީ ސަރުކާރު ލަދުގަންނަ ވަރަށް ކަމަށް ނާޒިލް ވިދާޅުވި އެވެ.

"އިންތިހާބު އެއްނުކުރެވޭނެ، ނުކުރެވޭނެ، ރައްޔިތުންނެއް ވޯޓެއް ނުދޭނެ،" ނާޒިލް ވިދާޅުވި އެވެ.

ހަރަދު ކުޑަކުރުމުގެ ބަހަނާ ދައްކައިގެން އިންތިހާބުތަކަށް ބަދަލު ގެނައުމަކީ ރައްޔިތުން ގަބޫލުކުރާނެ ހަމައެއް ނޫން ކަމަށާއި، "މިއީ ރައްޔިތުން ބަލައިގަންނަ ސަރުކާރެއް ނޫން" ކަން އިންތިހާބުގެ ނަތީޖާއިން ވެސް ފެންނާނެ ކަމަށް އޭނާ ވިދާޅުވި އެވެ.

މި ސަރުކާރުން ދައްކާ ހަރަދު ކުޑަކުރުމުގެ ވާހަކަ ދެކޮޅު ނުޖެހޭކަން ފާހަގަކުރެއްވުމުގެ ގޮތުން ނާޒިލް ވިދާޅުވީ، މި ސަރުކާރު އައުމުގެ ކުރިން ފޮރިން މިނިސްޓްރީއަށް މަހަކު ހަރަދުވަނީ 23 މިލިއަން ރުފިޔާ ކަމަށެވެ. ނަމަވެސް މި ސަރުކާރު އައުމަށްފަހު، މިހާރު ފޮރިން މިނިސްޓްރީގެ މަހެއްގެ ބަޖެޓަކީ 54 މިލިއަން ރުފިޔާ ކަމަށް އޭނާ ވިދާޅުވި އެވެ.

އެމްބަސީ ތަކަށް ސަރުކާރުން ބޮޑެތި ހަރަދުތައް ކުރާކަން ފާހަގަކޮށް، ނާޒިލް ވިދާޅުވީ އެމްބަސީ ތަކަށް ކުރާ ހަރަދުގެ ތަފްސީލް ރައްޔިތުންނަށް އެނގެން ޖެހޭނޭ ކަމަށެވެ. އަދި އޭގެން ވަނީ ކޮން ފައިސާއެއްތޯ ވެސް އޭނާ ވަނީ ސުވާލު އުފައްދާފަ އެވެ.

ދެ އިންތިހާބު އެއްކޮށްލައިގެން 50 މިލިއަން ރުފިޔާ ސަލާމަތްވާއިރު، އެމްބަސީތަކަށް އަހަރަކު 648 މިލިއަން ރުފިޔާ ހަރަދުކުރާ ކަމަށް އޭނާ ވިދާޅުވި އެވެ. އަދި އެއީ ފަސް އަހަރަށް 3 ބިލިއަނަށް ވުރެ ގިނަ ރުފިޔާކަމަށް އޭނާ ވިދާޅުވި އެވެ.