މަޝްހޫރު ލަވަކިޔުންތެރި ޒޭން މަލިކްގެ އާ އަލްބަމްގައި އިންޑިއާގެ ކާމިޔާބު ކްލެސިކް ލަވަކިޔުންތެރިޔާ ނުސްރަތު ފަތެހް އަލީ ޚާންއަށް ހާއްސަކޮށް ލަވައެއް ހިމަނަން ނިންމައިފި އެވެ.

ހަބަރުތައް ބުނާ ގޮތުގައި ޒޭންގެ ކުރިއަށް އޮތް އެ އަލްބަމްއަކީ ދެކުނު އޭޝިއާގެ މިއުޒިކް ސްޓައިލް އަސްލަކަށް ބަލައިގެން އުފައްދާ އަލްބަމެކެވެ.

ދާދި ފަހުން ޒޭން ބައިވެރިވި ޕޮޑްކާސްޓެއްގައި ވާހަކަ ދައްކަމުން އޭނާ ވަނީ ނުސްރަތުގެ ލަވައެއް ފާހަގަކޮށް އޭނާއާ ގުޅުވައިގެން ވާހަކަ ދައްކާފަ އެވެ.

ޒޭން ބުނީ ނުސްރަތުގެ މަސައްކަތްތަކަކީ އޭނާ ވަރަށް ޝައުގުވެރިވާ މަސައްކަތްތަކެއް ކަމަށާއި އެ މަސައްކަތްުތަކުން އޭނާއަށް އާ ހިޔާލުތައް ލިބޭ ކަމަށެވެ.

މީގެ ކުރިން ދިން އިންޓަވިއުތަކުގައި ވެސް ޒޭން ވަނީ އޭނާގެ ކުރިއަށް އޮތް އަލްބަމް މީގެ ކުރީގެ އަލްބަމްތަކަށްވުރެ ތަފާތުވާނެ ކަމަށް ބުނެފަ އެވެ.

"ކޮންނަކޮލް"ގެ ނަމުގައި ނެރޭ އެ އަލްބަމް ރިލީޒް ކުރަން ހަމަޖެހިފައިވަނީ މި ހިނގާ އޭޕްރީލް މަހުގެ 17 ވަނަ ދުވަހު ކަމަށް ހަބަރުތައް ބުނެ އެވެ.