ފާއިތުވި ހަމަސް ދުވަހުގެ ތެރޭގައި ދެފަރާތުން ކަނޑުދަތުރުފަތުރަށް އަމާޒުކޮށް ދިން އެންމެ ވަރުގަދަ ހަމަލާތަކުގައި، އެމެރިކާއިން އީރާނުގެ ތެޔޮ އުފުލާ ފަސް ބޯޓެއް ފައްތާލުމާ ގުޅިގެން، ހޮރްމޫޒް ކަނޑުއޮޅި ކައިރިން 10 އާގުބޯޓަކަށް ހަމަލާދީފައިވާނެ ކަމަށް އީރާނުން ބުދަ ދުވަހު ބުނެފި އެވެ.

މި ހަމަލާތަކާ ގުޅިގެން ތެލުގެ އަގު އުފުލިފައިވާއިރު، ބްރެންޓް ކުރޫޑް ފިއުޗާސްގެ އަގު ޖުލައި މަހަށްފަހު ފުރަތަމަ ފަހަރަށް ފީފާއަކަށް 100 ޑޮލަރަށްވުރެ މައްޗަށް އަރާފަ އެވެ. މި ހަމަލާތަކުގައި ތެޔޮ ބޯޓެއްގައި ހުރި ފަޅުވެރިއަކު މަރުވެފައިވާ ކަމަށާއި، އިތުރު މީހަކު ގެއްލިފައިވާ ކަމަށް ރިޕޯޓުތައް ބުނެ އެވެ.

އީރާނުން ބުނީ އުރުދުންގައި ހުންނަ އެމެރިކާގެ އަސްކަރީ މަރުކަޒަކަށް ބެލިސްޓިކް މިސައިލް ފޮނުވާލާފައިވާ ކަމަށެވެ. އުރުދުންއިން ބުނި ގޮތުގައި 18 މިސައިލެއް ވަނީ ވައިގެ ތެރޭގައި ހަލާކުކޮށްލާފަ އެވެ. އަދި ބާކީ ދެ މިސައިލް ވެއްޓުނީ މީހުން ދިރިނޫޅޭ ސަރަހައްދުތަކަށެވެ. އެމެރިކާގެ އޮފިޝަލަކު ވިދާޅުވީ އެމެރިކާގެ އެއްވެސް ސިފައިންގެ މީހަކަށް ގެއްލުމެއް ލިބިފައިނުވާ ކަމަށެވެ.

އީރާނުގެ ރިވޮލިއުޝަނަރީ ގާޑް ކޯޕްސްއިން ބުނީ ކުރިއަށް އޮތް ތަނުގައި ދޭ ކޮންމެ ހަމަލާއަކަށް ދޭ ރައްދު ވަރުގަދަ ކުރާނެ ކަމަށެވެ. އަދި ޕާކިސްތާނު ބޯޑަރު ކައިރީގައިވާ ޗާބަހާރު ބަނދަރާ ހަމައަށް ފެތުރޭ ގޮތަށް، ކަނޑުގެ ސަރަހައްދުގައި މަނާ ސަރަހައްދުތައް ކަނޑައަޅައި، އޭގެ ޗާޓުތައް ވަރަށް އަވަހަށް އާންމުކުރާނެ ކަމަށްވެސް އެ ޖަމާއަތުން ބުންޏެވެ.

ރައީސް ޑޮނަލްޑް ޓްރަމްޕް ވިދާޅުވީ ތެހެރާނުން މަސައްކަތް ކުރަމުންދަނީ އެމެރިކާގެ ކޮންގްރެސްގެ ކޮންޓްރޯލް ރިޕަބްލިކަން ޕާޓީއަށް ލިބޭނެތޯ ކަނޑައަޅާ ނޮވެމްބަރު މަހުގެ މިޑްޓާމް އިންތިހާބަށް ނުފޫޒު ފޯރުވުމަށް ކަމަށެވެ.

"އަޅުގަނޑު ގަބޫލުކުރާ ގޮތުގައި އިންތިހާބަށް ފަހު ވަގުތުން ހަނގުރާމަ ނިމޭނެ. ސަބަބަކީ އެމީހުންނަށް ދެން ކެތެއް ނުކުރެވޭނެ. އެމީހުން އެ އުޅެނީ އިންތިހާބަށް އަސަރު ފޯރުވަން ބޭނުންވެގެން،" ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވި އެވެ.

ނައިބު ރައީސް ޖޭޑީ ވެންސް އާއި ސެކްރެޓަރީ އޮފް ސްޓޭޓް މާކޯ ރޫބިއޯ، މި ހަމަލާތައް ޓްރަމްޕްގެ ރިޔާސީ ދައުރު ނިމެންދެން (ޖެނުއަރީ 2029 އާ ހަމައަށް) ދެމިގެން ހިނގައިދާނެ ކަމުގެ އިންޒާރު ސިއްރު ގޮތެއްގައި ޓްރަމްޕަށް ދެއްވާފައިވާ ކަމަށް ވޯލް ސްޓްރީޓް ޖާނަލްއިން ބުދަ ދުވަހު ރިޕޯޓުކޮށްފައިވެ އެވެ.

މީގެ އިތުރުން ފާއިތުވި ދުވަސްތަކުގައި ސައުދީ އަރަބިއްޔާއާއި ޔަމަނުގެ ހޫތީންނާ ދެމެދުވެސް ހަމަލާތައް ވަނީ ވަރުގަދަވެފަ އެވެ. މިއީ މެދުއިރުމަތިން ދުނިޔެއަށް ފޯރުކޮށްދޭ ހަކަތައިގެ ސަޕްލައިއަށް ނުރައްކާވާ ފަދަ ދެވަނަ ކުރިމަތިލުމެކެވެ.

އީރާނުގެ ތެޔޮ ބޯޓުތަކުގައި ރޯވެފައިވާ މަންޒަރު ފެންނަ ވީޑިއޯ

އެމެރިކާގެ އަސްކަރިއްޔާއިން ބުނީ ރޭގަނޑުގެ ވަގުތެއްގައި އީރާނުގެ ތެޔޮ އުފުލާ ފަސް ބޯޓެއް ހަލާކުކޮށްލާފައިވާ ކަމަށެވެ. އަދި އެ ބޯޓުތައް އަޑިއަށް ދިޔުމުގެ ކުރިން ރޯވެފައިވާ މަންޒަރު ފެންނަ ވީޑިއޯއެއްވެސް ވަނީ އާންމުކޮށްފަ އެވެ. ސެންޓްރަލް ކޮމާންޑުން ބުނީ މިއީ އީރާނުގެ ރިވޮލިއުޝަނަރީ ގާޑުން އެމެރިކާގެ އަސްކަރީ މަނަވަރަކަށް ދެ ފަހަރެއްގެ މަތިން ބެލިސްޓިކް މިސައިލުން ހަމަލާ ދިނުމާ ގުޅިގެން ދިން ރައްދެއް ކަމަށެވެ. މި ހަމަލާތަކުގައި އެމެރިކާގެ އެއްވެސް މީހަކަށް ގެއްލުމެއް ލިބިފައިނުވާ ކަމަށް އެމެރިކާއިން ބުނެ އެވެ.

ވޮޝިންޓަނުން ވަނީ އެމެރިކާގެ މަނަވަރުތަކަށް ނުރައްކާވާ ހަމަލާތަކުގެ ބަދަލުހިފުމުގެ ގޮތުން އީރާނުގެ ތެޔޮ ބޯޓުތަކަށް ހަމަލާދިނުމުގެ އާ ސިޔާސަތެއް އިއުލާނުކޮށްފައެވެ. އަދި ފާއިތުވި ހަފުތާއެއްހާ ދުވަހުގެ ތެރޭގައި 10 ބޯޓަކަށް ހަމަލާދީފައިވާ ކަމަށްވެސް އެ ގައުމުން ބުނެ އެވެ.

"އީރާނުން ދަނީ އެމެރިކާގެ ކަނޑުގެ އަސްކަރީ އުޅަނދުތަކަށް ހަމަލާދޭން މަސައްކަތް ކުރަމުން. އެމީހުން އެފަދަ ކޮންމެ ކަމެއް ކުރާ ކޮންމެ ފަހަރަކު، އެމީހުންގެ ތެޔޮ ބޯޓުތައް ގެއްލޭނެ،" ކޮލަމްބިއާއަށް ކުރެއްވި ޒިޔާރަތެއްގައި ރޫބިއޯ ނޫސްވެރިންނަށް ވިދާޅުވި އެވެ.

އީރާނުން ބުނީ އެމެރިކާގެ ދެ މަނަވަރަކަށާއި އަށް ތެޔޮ ބޯޓަކަށް ހަމަލާދީފައިވަނީ އެމެރިކާގެ އަމަލުތަކުގެ ރައްދުގައި ކަމަށެވެ.

ދުބާއީ ކައިރީގައި ބޯޓު މަޑުކޮށްލައިގެން އޮއްވައި 'ހާކިއުލިސް ސްޓާ' ނަމަކަށް ކިޔާ ތެޔޮ ބޯޓަށް ދިން ހަމަލާގައި ފަޅުވެރިއަކު މަރުވެ، އިތުރު މީހަކު ގެއްލިފައިވާ ކަމަށް އެ ބޯޓު ކުއްޔަށް ހިފާފައިވާ ޕެނިންސިއުލާ ކުންފުނިން ބުނެފައިވެ އެވެ.

ބްރިޓިޝް މެރިޓައިމް ސެކިއުރިޓީ އެޖެންސީ އިން ބުނި ގޮތުގައި، އެ ސަރަހައްދުގައި އޮތް އުޅަނދަކަށް ހަމަލާއެއް އެރުމުގެ ސަބަބުން އެ އުޅަނދު ވަނީ އެއް ފަރާތަކަށް އަރިވެފަ އެވެ.

އިރާގުގެ ބަނދަރުގެ ދެ އޮފިޝަލަކު ވިދާޅުވި ގޮތުގައި، 2 މިލިއަން ފީފާގެ ތެޔޮ އުފުލާ 'ނިއު އެންޑްރޯސް' ބޯޓުގައި، އިރާގުގެ ކަނޑުގެ ސަރަހައްދުން ދިން ޑްރޯން ހަމަލާއެއްގެ ސަބަބުން ވަނީ ރޯވެފަ އެވެ. އެ ބޯޓުގައި ތިބި 22 ފަޅުވެރިންކުރެ އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.

ޔޫކޭއެމްޓީއޯ އިން އިތުރަށް ބުނި ގޮތުގައި، ހޮރްމޫޒް ކަނޑުއޮޅީގެ ދެފަރާތުގައިވާ އޮމާން ކަނޑާއި ގަލްފުގެ އުތުރު ސަރަހައްދުގައި ދަތުރުކުރަމުންދިޔަ ބައެއް ވިޔަފާރި އާގުބޯޓުތަކަށް ހަމަލާދީ، ދަތުރުނުކުރެވޭ ވަރަށް ވަނީ ގެއްލުން ދީފަ އެވެ.

މެރިޓައިމް ސެކިއުރިޓީގެ މަސްދަރަކުން ރިޕޯޓުކުރި ގޮތުގައި، ޔޫއޭއީގެ ހޮރްފައްކާން ބަނދަރުގައި އޮތް ގޭސް އުފުލާ ބޯޓަކަށްވެސް ވަނީ ގެއްލުން ލިބިފަ އެވެ.

މީގެ އިތުރުން، އީރާނުގެ ޖާސްކް ބަނދަރުގެ ދެކުނު ފަރާތުން ކަނޑުގެ ތެރޭގައި އެއްޗެއް ގޮވި އަޑު އިވިފައިވާ ކަމަށް އީރާނުގެ ފާސް ނިއުސް އެޖެންސީން ބުދަ ދުވަހުގެ ރޭ ރިޕޯޓުކޮށްފައިވެ އެވެ. ނަމަވެސް އެ ގޮވުމުގެ އަސްލަކީ ކޮބައިކަމެއް އަދި ސާފެއް ނުވެ އެވެ.

ހޮރްމޫޒް ކަނޑުއޮޅި ބަންދުވުން

ފާއިތުވި ހަފުތާތަކުގައި ވޮޝިންޓަނުން ދިޔައީ، ހަނގުރާމައިގެ ކުރިން ދުނިޔޭގެ ތެލުގެ ފަސްބައިކުޅަ އެއްބައި އުފުލާ ހޮރްމޫޒް ކަނޑުއޮޅިން އާގުބޯޓުތައް ރައްކާތެރިކަމާއެކު ދަތުރުކުރުވުމުގައި ކާމިޔާބީ ލިބެމުންދާ ކަމަށް ބުނަމުންނެވެ. ނަމަވެސް މި މަހު އަލުން ފެށުނު ހަމަލާތަކާއެކު އެ ކާމިޔާބީއަށް ވަނީ ހުރަސް އެޅިފަ އެވެ.

ރައިސްޓެޑް އެނާޖީގެ ޗީފް އިކޮނޮމިސްޓް ކްލޯޑިއޯ ގަލިމްބަރްޓީ ވިދާޅުވި ގޮތުގައި، އޮގަސްޓް 30 ގައި އަލުން ހަމަލާތައް ފެށުމުގެ ކުރިން ދުވާލަކު 8 މިލިއަނާއި 9 މިލިއަނާ ދެމެދުގެ އަދަދަކަށް ތެޔޮ ފީފާ ހޮރްމޫޒް ކަނޑުއޮޅިން ދަތުރުކުރި ނަމަވެސް، މިހާރު އެ އަދަދު ވަނީ ދުވާލަކު 2 މިލިއަން ފީފާއަށް ދަށްވެފަ އެވެ.

ތެލުގެ އަގު އުފުލުމަށްވުރެ ބޮޑަށް، ތެޔޮ ސާފުކޮށްގެން އުފައްދާ ބާވަތްތަކުގެ އަގު ވަނީ އިންތިހާއަށް މައްޗަށް ގޮސްފަ އެވެ. އެގޮތުން އެމެރިކާގައި ޑީސަލް ލިޓަރެއްގެ އަގު ބުދަ ދުވަހު ވަނީ ރެކޯޑް މިންވަރަކަށް، ގަލަނަކަށް 5.94 ޑޮލަރަށްވުރެ މައްޗަށް އަރާފަ އެވެ.