މިއަދުގެ ނިއު ނޯމަލް ނުވަތަ އާންމު ދިރިއުޅުމުގެ އާދަކާދައަށް ބަލާއިރު، ހެނދުނު ނާސްތާކުރާ ގަޑިން ފެށިގެން، އޮފީސް މޭޒު ދޮށުގައި، ރޭގަނޑު ކެއުމުގެ ވަގުތުގައި އަދި އެއަށްފަހު އެނދުގައި އޮންނަ ވަގުތުތަކާއެކު، މުޅި ދުވަސް ހޭދަވެގެން ދަނީ އިށީނދެގެން ނުވަތަ އޮށޯވެގެންނެވެ.

ކަސްރަތު ކުރުމާއި ހަރަކާތްތެރިވެ އުޅުން މަދުވުމުގެ މި އާދައަކީ ހިތުގެ ސިއްހަތަށް ނުހަނު ބޮޑެތި ނުރައްކާތަކެއް ކުރިމަތިކުރުވާ ކަމެއް ކަމަށް ސިއްހީ މާހިރުންނާއި ހިތުގެ ބައްޔަށް ހާއްސަ ޑޮކްޓަރުން އިންޒާރުދެ އެވެ.

ގިނައިރު އިށީނދެގެން އިނުމުން ހިތަށް ވަނީ ކިހިނެއް؟

ގިނައިރު އިށީނދެގެން އިނުމުގެ ސަބަބުން ހަށިގަނޑުގެ މަސްތަކުގެ ހަރަކާތްތެރިކަން ކުޑަވެ، ހަކަތަ އަންދާ މިންވަރު ދަށްވެގެން ދެއެވެ. މީގެ ސަބަބުން ހަށިގަނޑަށް ތިރީގައިވާ އަސަރުތައް ކުރެ އެވެ.

  • ލޭ ދައުރުވުން މަދުވުން: ގިނައިރު އިށީނދެގެން އިނުމުން ލޭ ދައުރު ވުމުގެ ދުވެލި މަޑުވެ، ހިތަށް ލޭ ފޮނުވައިދޭ ނާރުތަކަށް ބާރުބޮޑުވެ އެވެ.
  • ކޮލެސްޓްރޯލް އަދި ލޭގެ ހަކުރު މަތިވުން: ހަށިގަނޑުގެ މަސްތަކުން އިންސިއުލިން ބޭނުންކުރާ މިންވަރު ދަށްވެ، ލޭގައި ހަކުރާއި ނުބައި ކޮލެސްޓްރޯލް އިތުރު ވެގެންދެ އެވެ.
  • ލޭގެ ޕްރެޝަރު މަތިވުން: ގިނައިރު ހަރަކާތެއް ނުކޮށް އިނުމަކީ ލޭގެ ޕްރެޝަރު މަތިވުމަށް މަގުފަހިވާ ކަމެކެވެ.
  • ނާރުތައް ބެދުމުގެ ފުރުސަތު ބޮޑުވުން: ކޮލެސްޓްރޯލް މަތިވެ، ލޭގެ ދައުރުވުން ދަށްވުމުގެ ސަބަބުން ހިތުގެ ނާރުތަކުގައި ފެޓް ނުވަތަ ސަރުބީ ބަންދުވުމުގެ ނުރައްކާ ބޮޑުވެ އެވެ.

ދުވާލަކު އެއްފަހަރު ކަސްރަތު ކުރުމުން އެކަނި ފުދޭނެތަ؟

ގިނަ މީހުންނަށް ހީވެފައި އޮންނަނީ ދުވާލަކު 30 މިނެޓު ނުވަތަ 1 ގަޑިއިރު ޖިމްގައި ކަސްރަތު ކުރުމުން، ދެން އޮތް 8 ނުވަތަ 10 ގަޑިއިރު އިށީނދެގެން އިނުމުގެ ނޭދެވޭ އަސަރު ފިލައިދާނެ ކަމަށެވެ.

ނަމަވެސް ޑޮކްޓަރުން ވިދާޅުވަނީ މިއީ ކުށްހީއެއް ކަމަށެވެ. ކަސްރަތުކުރި ކަމުގައި ވިޔަސް، ދުވަހުގެ ބޮޑު ބައި އިށީނދެގެން ހޭދަކުރާ ނަމަ ހިތުގެ ބަލިތައް ޖެހުމުގެ ފުރުސަތު އޮންނާނެ ކަމަށް އެ ފަރާތްތަކުން ވިދާޅުވެ އެވެ.

ހިތުގެ ދުޅަހެޔޮކަމަށް އާއްމު ދިރިއުޅުމުގެ އާދަތައް!

  • ކޮންމެ 30-60 މިނެޓަކުން ތެދުވުން: އޮފީހުގައި މަސައްކަތް ކުރާއިރު ނުވަތަ ޓީވީ ބަލަން އިނދެގެން ކޮންމެ ބައި ގަޑިއަކުން ނުވަތަ ގަޑިއިރަކުން ތެދުވެ ފަސް މިނެޓު ހިނގާލާށެވެ.
  • ފޯނުން ވާހަކަ ދައްކާއިރު ހިނގުން: ފޯނު ކޯލްތަކުގައި ހުންނަ އިރު އިށީނދެގެން އިނުމުގެ ބަދަލުގައި ކޮޓަރީގައި ނުވަތަ އޮފީސް ތެރޭގައި ހިނގާލާށެވެ.
  • ސިޑި ބޭނުން ކުރުން: ލިފްޓުގެ ބަދަލުގައި ސިޑިން އަރައި ފޭބުމުގެ އާދަ އަށަގަންނުވާށެވެ.
  • ކެއުމަށްފަހު ކުރު ހިނގާލުމެއް: ކެއުމަށްފަހު ވަގުތުން އޮށޯތުމުގެ ބަދަލުގައި 10-15 މިނެޓުގެ ކުރު ހިނގާލުމެއް ހިނގާލުމަކީ ލޭގެ ހަކުރު ކޮންޓްރޯލް ކުރުމަށް އެހީތެރިވެދޭ ކަމެކެވެ.
  • ކުރު ރާސްތާތަކަށް ހިނގާފައި ދިއުން: ކައިރި ފިހާރައަކަށް ނުވަތަ މިސްކިތަށް ދާއިރު ސައިކަލު ނުވަތަ ކާރުގެ ބަދަލުގައި ހިނގާފައި ދިއުން އިހްތިޔާރު ކުރާށެވެ.

ހިތުގެ ސިއްހަތު ސަލާމަތް ކުރުމަށްޓަކައި ހަމައެކަނި ހާއްސަ ވަގުތެއްގައި ކަސްރަތު ކުރުމުގެ ބަދަލުގައި، މުޅި ދުވަހުގެ ތެރެއަށް ހަރަކާތްތެރިކަން ވެއްދުމަކީ ނުހަނު މުހިންމު ކަމެކެވެ.