ފިނި މޫސުމެއް ނޫން ނަމަވެސް އަބަދު އަތްފައި ފިނިވެފައި ހުންނަނަމަ، އެއީ ހަމައެކަނި މޫސުމީ ކަމެއް ނޫން ކަމަށާއި، ހަށިގަނޑުގައި ލޭ ދައުރު ވުމަށް އަސަރުކުރާ ސިއްހީ މައްސަލަތަކެއްގެ އިޝާރާތަކަށް ވެދާނެ ކަމަށް މާހިރުން ބުނެ އެވެ.

އެމެރިކާގެ މޭރީލޭންޑްގައި މަސައްކަތް ކުރައްވާ ފިޒީޝަން ޑރ. ކުނާލް ސޫދް ސޯޝަލް މީޑިއާގައި ހިއްސާ ކުރެއްވި މައުލޫމާތެއްގައި ވަނީ، އަބަދު އަތްފައި ފިނިވާން މެދުވެރި ވެދާނެ މައިގަނޑު ހަތަރު ސަބަބެއް ހާމަ ކުރައްވާފަ އެވެ.

1. ނަފްސާނީ ސްޓްރެސް

ސްޓްރެސް ވުމުން ހަށިގަނޑުގެ "ފައިޓް-އޯ-ފްލައިޓް" ރެސްޕޮންސް އެކްޓިވޭޓްވެ، އެޑްރެނަލިން އާއި ކޯޓިސޯލް ފަދަ ހޯމޯންތައް އުފައްދަ އެވެ. މީގެ ސަބަބުން ހަށިގަނޑުގެ މައިގަނޑު ގުނަވަންތަކަށް ލޭ ފޮނުވުމަށްޓަކައި، އަތާއިފައިގެ ކުދި ލޭހޮޅިތައް ހަނިވެ، އަތްފައި ފިނިވާގޮތްވެ އެވެ.

2. ދަގަނޑުގެ ބައި މަދުވުން

ހަށިގަނޑުގައި ދަގަނޑުގެ ބައި މަދުވުމަކީ ހީމޯގްލޯބިން އުފެއްދުމަށް ހުރަސްއެޅޭ ކަމެކެވެ. ހީމޯގްލޯބިންއަކީ ލޭގެ ރަތް ސެލްތަކުން މުޅި ހަށިގަނޑަށް އޮކްސިޖަން ފޯރުކޮށްދޭ މާއްދާ އެވެ. ދަގަނޑުގެ ބައި މަދުވުމުން އަތްފައި ފިނިވުމުގެ އިތުރުން ވަރުބަލިވުމާއި، ބޯއެނބުރުމާއި، ނޭވާކުރުވުން ފަދަ އަލާމާތްތައް ފެންނާނެ އެވެ.

3. ތައިރޮއިޑް ގްލޭންޑްގެ މަސައްކަތް ދަށްވުން

ތައިރޮއިޑް ހޯމޯންތަކަކީ ހަށިގަނޑުގެ މެޓަބޮލިޒަމް އާއި ހޫނުމިން ކަންތައް ބަލަހައްޓައިދޭ މާއްދާއެކެވެ. ތައިރޮއިޑްގެ މަސައްކަތް ދަށްވުމުން ހަށިގަނޑުގެ މެޓަބޮލިޒަމް ލަސްވެ، ފިނީގެ އަސަރު މީހާއަށް މާ ބޮޑަށް ކުރާ ގޮތްވެ އެވެ. މީގެ ސަބަބުން ލޭ ދައުރުވުމަށް ވެސް ހުރަސްއެޅެ އެވެ.

4. ރޭނޯޑްސް ޑިޒީޒް

މިއީ ފިނިވުމުން ނުވަތަ ސްޓްރެސް ވުމުން އަތްފައިގެ އިނގިލިތަކުގެ ކުދި ލޭހޮޅިތައް ކުއްލިއަކަށް ހަނިވާ ބައްޔެކެވެ. ޑރ. ސޫދް ވިދާޅުވި ގޮތުގައި، ފިނިވުމުން އިނގިލިތަކުގެ ކުލަ ހުދު، ނޫ ނުވަތަ ރަތް ކުލައަށް ބަދަލުވާނަމަ، އެއީ ރޭނޯޑްސް ބަލީގެ އަލާމާތަކަށް ވުން ގާތެވެ.

އެހެން ކަމުން، އަތާއި ފައި އަބަދު ފިނިވެފައި ހުރުމާއެކު އެހެން އާދަޔާހިލާފު އަލާމާތެއް ފެންނަނަމަ، ލަސްނުކޮށް ސިއްހީ އެހީތެރިކަން ހޯދުމަށް ޑޮކްޓަރު އިރުޝާދު ދެއްވަ އެވެ.