އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އެމެރިކާގެ ރައްޔިތުންނަށް ސީދާކޮށް ފޮނުވި މެސެޖެއްގައި، ރައީސް ޑޮނަލްޑް ޓްރަމްޕްގެ ވެރިކަމުގެ ދަށުގައި އޮތް އެމެރިކާގެ ސަރުކާރު ބަދަލުކުރަންޖެހޭ ކަމަށް ބުނެފި އެވެ.

އަންގާރަ ދުވަހު އާންމުކުރި ހުޅުވާލެވިފައިވާ ސިޓީއެއްގައި، އައިއާރުޖީސީ އިން ވަނީ އެމެރިކާގެ ރައްޔިތުން ހޭލުމަށާއި، ފަސާދަވެފައިވާ ސިޔާސީވެރިންގެ އަތުން ގައުމުގެ ކޮންޓްރޯލް އަތުލުމަށް ގޮވާލާފަ އެވެ. މި މެސެޖު އައިސްފައިވަނީ އެމެރިކާގެ މިޑްޓާމް އިންތިހާބަށް ފަސް ހަފުތާއަށް ވެފައި ވަނިކޮށް އަދި އީރާނާ ދެކޮޅަށް އެމެރިކާ އާއި އިޒްރޭލުން ކުރަމުންދާ ހަނގުރާމައަށް ހަތް މަސް ފުރުނުތާ އެއް ދުވަސް ފަހުންނެވެ.

"މިއީ އެންމެ މުނާސަބު ވަގުތު، ސަބަބަކީ އެމެރިކާގެ ސިޔާސީ ނިޒާމު މިހާރު އޮތީ އޭގެ އެންމެ ބަލިކަށި ހާލަތުގައި،" އައިއާރުޖީސީ އިން ބުންޏެވެ.އެމެރިކާގެ ރައްޔިތުންނަށް މުހާތަބުކޮށް ފޮނުވި މި ސިޓީގައި ޓްރަމްޕްގެ ސަރުކާރުގެ މައްޗަށް ތުހުމަތުކޮށްފައިވަނީ ހަނގުރާމައާ ބެހޭގޮތުންނާއި، އީރާނުގެ ނިއުކްލިއާ ޕްރޮގްރާމާ ބެހޭގޮތުންނާއި، އަދި ހޮރްމުޒް ކަނޑުއޮޅީގެ ކޮންޓްރޯލް އޮތް ފަރާތަކާ ބެހޭގޮތުން އެމެރިކާގެ ރައްޔިތުންނަށް އޮޅުވާލަމުންދާ ކަމަށެވެ.

މީގެ އިތުރުން، މި ހަނގުރާމައިގައި ކާމިޔާބު ހޯދީ އީރާނުން ކަމަށް ކަނޑައަޅައި، އެމެރިކާ އިން އީރާނުގެ ނިއުކްލިއާ ޕްރޮގްރާމް ހުއްޓުވުން ފަދަ ކަނޑައެޅި އެއްވެސް ލަނޑުދަނޑިއެއް ހާސިލުނުކުރެވުނު ކަމަށް އެ ސިޓީގައި ބުނެފައިވެ އެވެ.

"އެމެރިކާ އާއި އިޒްރޭލުން އެތައް ހާސް ބޮމަކާއި މިސައިލެއް ބޭނުންކޮށްގެން ސަރުކާރުގެ އިމާރާތްތަކާއި، މީހުން ދިރިއުޅޭ ތަންތަނާއި، ހަތިޔާރު އުފައްދާ ކާރުހާނާތަކުގެ އިތުރުން ބޭނުންނުކޮށް ހުރި އަސްކަރީ މަރުކަޒުތަކަށް ހަމަލާދިން،" ސިޓީގައިވެ އެވެ. "ނަމަވެސް، އީރާނުގެ ނިއުކްލިއާ ސިނާއަތާ ގުޅުންހުރި ބައެއް އިމާރާތްތަކަށާއި ވައިގެ ދިފާއީ މަދު މަރުކަޒުތަކަކަށް ގެއްލުން ދެވުން ފިޔަވައި، އެމީހުން އިއުލާންކުރި އެއްވެސް މަގްސަދެއް ހާސިލުކުރެވިފައެއް ނުވޭ." އައިއާރްޖީސީން ބުންޏެވެ.

ވައިޓް ހައުސްގައި ތިބި ފަސާދަވެފައިވާ ސިޔާސީވެރިންގެ ސަބަބުން އީރާނާއި އެމެރިކާގެ ރައްޔިތުންނަކީވެސް އަނިޔާ ލިބެމުންދާ ބައެއް ކަމަށާއި، ދެ ގައުމުގެ ރައްޔިތުންގެ އިހުސާސްތައް ހުރީ އެއްގޮތަކަށް ކަމަށް ވަނީ ބުނެފަ އެވެ. އީރާނުގެ ސިޔާސީ މައިދާނުގައި ބޭނުންކުރާ އެމެރިކާއަށް މަރު" މި ޝިއާރަކީ އެމެރިކާ ރައްޔިތުންނަށް އަމާޒުކޮށް ބުނާ ބަހެއް ނޫން ކަމަށާއި، އެއީ ވައިޓް ހައުސްގައި ތިބި ނުބައި ވެރިން ނެތިދިއުމަށް އެދި ކުރެވޭ ދުއާއެއް ކަމަށްވެސް ބުނެފައިވެ އެވެ.

އަންގާރަ ދުވަހު ނޫސްވެރިންނާ ވާހަކަދައްކަވަމުން އައިއާރުޖީސީގެ ތަރުޖަމާނު ހުސައިން މުހިއްބީ ވަނީ ޓްރަމްޕަކީ އިތުރުފުޅު ހެއްދެވުމުގައި ހައްދުފަހަނަޅާފައިވާ ބޭފުޅެއް ކަމަށް ތުހުމަތުކުރައްވާފަ އެވެ. އަދި ޓްރަމްޕްގެ ސަރުކާރުން ހިންގާ ހަރަކާތްތަކުގެ ސަބަބުން ލިބޭ ގެއްލުންތަކުގެ ހަގީގަތް އެމެރިކާގެ ރައްޔިތުންނަށް ނޭނގޭ ކަމަށް އޭނާ ވިދާޅުވި އެވެ.

"އަޅުގަނޑަށް ގަބޫލުކުރެވެނީ އެމެރިކާގެ ރައްޔިތުންނަށް މި ހަގީގަތްތައް ނޭނގޭ ކަމަށް. އެމީހުންނަށް މިކަން އެނގޭނަމަ، އެމީހުންގެ ވިސްނުން ބަދަލުވެ، ސަރުކާރަށް ޕްރެޝަރު ކުރާނެ،" މުހިއްބީ ވިދާޅުވި އެވެ.

އީރާނާ ދެކޮޅަށް ހަނގުރާމަ ފެށި އެއް ސަބަބަކީ ނިއުކްލިއާ ހަތިޔާރުގެ ބިރު ކަމަށް ޓްރަމްޕް ތަކުރާރުކޮށް ވިދާޅުވަމުން ގެންދެވި ނަމަވެސް، އީރާނުން ބުނަނީ އެގައުމުން ނިއުކްލިއާ ހަތިޔާރު އުފައްދަން މަސައްކަތް ނުކުރާ ކަމަށެވެ. އަދި ޔުރޭނިއަމް މުއްސަނދިކުރުމުގެ މަސައްކަތަކީ ހަމައެކަނި މަދަނީ ހަކަތަ އުފެއްދުމަށް ކުރާ ކަމެއް ކަމަށް އީރާނުން ބުނެ އެވެ.

ހޮރްމުޒް ކަނޑުއޮޅީގެ ކޮންޓްރޯލް އީރާނަށް ގެއްލިފައިވާ ކަމަށް އެމެރިކާއިން ބުނާ ބުނުމަށްވެސް މުހިއްބީ ރައްދުދެއްވި އެވެ. އޭނާ ވިދާޅުވީ، ވަރަށް ބޮޑު ހަރަދަކާއި ނުރައްކަލުގެ ތެރެއިން، ރޭގަނޑުގެ ކަނު އަނދިރީގައި އެމެރިކާގެ ކުޑަ އުޅަނދެއް އެ ސަރަހައްދުން ދަތުރުކުރުމަކީ ކަނޑުއޮޅި ހުޅުވިފައި އޮތުން ނޫން ކަމަށެވެ. ނަމަވެސް، ތަފާސްހިސާބުތަކުން ދައްކާގޮތުގައި އެ ސަރަހައްދުން ތެޔޮ ބޭރުކުރާ މިންވަރު މިހާރު ދަނީ އަލުން އިތުރުވަމުންނެވެ.

ހަނގުރާމަ ހުއްޓާލުމަށްޓަކައި މެދުވެރިން މެދުވެރިކޮށް ދެ ގައުމުންވެސް މަޝްވަރާ ކުރަމުންދާއިރު، ރައީސް ޓްރަމްޕް މިދިޔަ ހަފުތާގައި އދ. ގެ އާންމު މަޖިލީހުގައި ވާހަކަދައްކަވަމުން ވަނީ އީރާނު "ސުންނާފަތިކޮށްލުމާ" މެދު ވިސްނަވާ ކަމަށް ވިދާޅުވެފަ އެވެ.

"އަޅުގަނޑު ވަރަށް ބޮޑު ނިންމުމެއް ނިންމަން އެބައޮތް. އީރާނާއެކު އެއްބަސްވުމަކަށް އައިސް އެގައުމު އަލުން ބިނާކުރަން ފުރުސަތު ދޭނީތޯ، ނުވަތަ އިސްލާމިކް ރިޕަބްލިކް ވަރަށް އަވަހަށް ސުންނާފަތިކޮށްލާނީތޯ؟" ޓްރަމްޕް ވިދާޅުވި އެވެ.

ޓްރަމްޕް ލަފާކުރެއްވި ގޮތުގައި ނޮވެމްބަރު މަހުގެ އިންތިހާބަށްފަހު އެއްބަސްވުމަކަށް އާދެވިދާނެ އެވެ. މި އިންތިހާބުން ނިންމާނީ އެމެރިކާގެ ކޮންގްރެސްގެ ކޮންޓްރޯލް އޮންނާނީ ކޮން ޕާޓީއަކަށްތޯއާއި، ޓްރަމްޕްގެ ދެވަނަ ދައުރުގެ ފަހު ދެ އަހަރުގައި އޭނާއަށް ކުރިމަތިވާނެ ގާނޫނީ ހުރަސްތަކަކީ ކޮބައިތޯ އެވެ.