ދިވެހި ވަތަނީ ހިދުމަތުގެ ދަށުން ނޭޝަނަލް ސާވިސްގެ އިންޓާންޝިޕް ޕްރޮގްރާމްތައް ތައާރަފުކޮށް، ނޭޝަނަލް ކެރިއާ ސާވިސްގެ ދައުރު އިތުރަށް ފުޅާކުރައްވާނެ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

މި ސަރުކާރުން މުޅިން އަލަށް ފެށި "ދިވެހި ވަތަނީ ހިދުމަތް" ޕްރޮގްރާމަށް އެއް އަހަރު ފުރުމުގެ މުނާސަބަތުގައި، އެކްސް ގައި ކުރެއްވި ޕޯސްޓެއްގައި ރައީސް ވިދާޅުވީ، މި ޕްރޮގްރާމަކީ ދިވެހި ޒުވާނުންގެ ކުރިމަގު އުޖާލާކޮށް، އާ ރާސްތާއެއް ފަހިކޮށްދިނުމުގެ މަތިވެރި ޢަޒުމުގައި ފެށި މުހިންމު މަސައްކަތެއް ކަމަށެވެ. މި ޕްރޮގްރާމް ރަސްމީކޮށް އިފްތިތާޙުކޮށްފައިވަނީ 1 އޮކްޓޫބަރު 2025 ގައެވެ.

އެއް އަހަރު ފުރުމާ ގުޅިގެން ރައީސް ވަނީ ތަމްރީނު ފުރިހަމަކުރި ޒުވާނުންނަށާއި އެ ކުދިންގެ އާއިލާތަކުގެ އިތުރުން، މި ޕްރޮގްރާމް ކާމިޔާބުކަމާއެކު ހިންގުމުގައި ބައިވެރިވި ހުރިހާ ފަރާތްތަކަށް ޝުކުރު އަދާކުރައްވާފަ އެވެ.

ރައީސް މުއިއްޒު ފާހަގަކުރެއްވި ގޮތުގައި، ކޮންމެ އަހަރަކު 1,000 ޒުވާނުން ތަމްރީނުކުރުމަށް ސަރުކާރުން ކަނޑައެޅި އަމާޒު ފުރަތަމަ އަހަރުގެ ތެރޭގައި ވަނީ ހާސިލުކުރެވިފަ އެވެ. އެގޮތުން، ނޭޝަނަލް ސާވިސް އިނީޝަލް ޓްރޭނިންގެ ތެރެއިން 1,028 ޒުވާނުން ތަމްރީނުކޮށްފައިވާއިރު، ސްކިލް ޓްރޭނިން ޕްރޮގްރާމުން 136 ޒުވާނަކު ވަނީ ތަމްރީނު ފުރިހަމަކޮށްފަ އެވެ. ފަންނީ ތަމްރީނުގެ ފުރަތަމަ ބެޗުން 63 ޒުވާނުން، ދެވަނަ ބެޗުން 73 ޒުވާނުން އަދި ތިންވަނަ ބުރުން 341 ދަރިވަރުން ވަނީ ދަސްވެނިވެފައެވެ.

ކުރިމަގުގެ ޕްލޭންތަކާ ގުޅޭގޮތުން ރައީސް ވިދާޅުވީ، ވަތަނީ ހިދުމަތުގެ ދަށުން އިތުރު ފަންނީ ދާއިރާތަކާއި އިންޓާންޝިޕް ފުރުސަތުތައް ތަޢާރަފުކުރެވިގެންދާނެ ކަމަށެވެ. އަދި ތަމްރީނު ނިންމާ ޒުވާނުންނަށް ފަސޭހަކަމާއެކު ވަޒީފާގެ މައިދާނަށް ނުކުމެވޭނެ މަގު ތަނަވަސްކޮށްދިނުމަށްޓަކައި، ނޭޝަނަލް ކެރިއާ ސާވިސްގެ ދައުރު މިހާރަށްވުރެ ބޮޑަށް ފުޅާކުރުމަކީ ސަރުކާރުގެ މުހިންމު އަމާޒެއް ކަމުގައި އެމަނިކުފާނު ވިދާޅުވި އެވެ.