ރާއްޖޭގައި ދެވަނަ ހިއްސާގެ ބާޒާރެއް ގާއިމުކޮށް ހިންގުމުގެ ބޭނުމުގައި، ސައްތައިން ސައްތަ ސަރުކާރު ހިއްސާވާ ގޮތަށް "ނޭޝަނަލް އެކްސްޗޭންޖް ލިމިޓެޑް" ގެ ނަމުގައި އާ ކުންފުންޏެއް މިއަދު އުފައްދަވައިފި އެވެ.

ރައީސް މުހައްމަދު މުއިއްޒަށް ޤާނޫނުއަސާސީންނާއި ލިބިދޭ އިހްތިޔާރާއި ބާރުގެ ދަށުން ނެރުއްވި ރިޔާސީ ގަރާރަކުން މި ކުންފުނި އުފެއްދެވިކަން ރައީސް އޮފީހުން ވަނީ ހާމަކޮށްފަ އެވެ.

ރައީސް އޮފީހުން ވިދާޅުވި ގޮތުގައި، މިފަދަ ކުންފުންޏެއް އުފެއްދެވީ ދައުލަތުގެ މާލީ ބޭނުންތައް ފުއްދުމަށާއި، ރާއްޖޭގައި އިސްލާމީ މާލީ ދާއިރާ ފުޅާވަމުން އަންނާތީ، ސަރުކާރުގެ ސީދާ އެހީތެރިކަމާއި ބައިވެރިވުމާއެކު ހަރުދަނާ ހިއްސާގެ ބާޒާރެއް ހިންގުމުގެ މަގްސަދުގަ އެވެ.

ސަރުކާރުން އަލަށް އުފެއްދި "ނޭޝަނަލް އެކްސްޗޭންޖް ލިމިޓެޑް" ގެ މައިގަނޑު މަގްސަދުތަކުގެ ތެރޭގައި ހިމެނެނީ:

  • ރާއްޖޭގެ ކެޕިޓަލް މާކެޓް އިތުރަށް ތަރައްޤީކޮށް، މާލީ ބާޒާރަށް އޮތް އިތުބާރާއި ދެފުށް ފެންނަ މިންވަރު މަތިކުރުން.
  • ޒަމާނީ ފެންވަރުގެ ސެކިއުރިޓީޒް އެކްސްޗޭންޖްތަކާއި ވިޔަފާރިކުރެވޭނެ ވަސީލަތްތައް (ޓްރޭޑިންގ ފެސިލިޓީސް) ގާއިމުކޮށް ހިންގުން.
  • ދައުލަތުގެ ސެކިއުރިޓީޒްތަކާއި އިސްލާމީ ޝަރީއާގެ ހަމަތަކަށް ފެތޭ ސުކޫކުގެ އިތުރުން، އެހެނިހެން މާލީ ވަސީލަތްތައް ބާޒާރަށް ނެރުމާއި، ލިސްޓުކުރުމާއި، އެ ތަކެތީގެ މުއާމަލާތްތައް ހިންގުމަށް ފަހި މާހައުލެއް ގާއިމުކުރުން.
  • ސެންޓްރަލް ސެކިއުރިޓީޒް ޑިޕޮސިޓަރީ (ސީއެސްޑީ) އަދި ކްލިއަރިން އާއި ސެޓްލްމަންޓުގެ ޒަމާނީ ޕޯސްޓް-ޓްރޭޑް ހިދުމަތްތައް ފޯރުކޮށްދިނުން.
  • ރާއްޖެއާއި ބައިނަލްއަޤްވާމީ މާލީ އިދާރާތަކާ ގުޅިގެން ދިވެހިރާއްޖޭގައި ދެމެހެއްޓެނިވި އަދި ވަރުގަދަ މާލީ ނިޒާމެއް ބިނާކުރުން.

މި އާ ކުންފުނި ވުޖޫދަށް އައުމާއެކު، ސަރުކާރު ހިއްސާވާ ކުންފުނިތަކުގެ އިކުއިޓީއާއި، ދައުލަތުން ވިއްކާ ޓްރެޜަރީ ބިލް (ޓީ-ބިލް) އަދި ސޮވްރިން ބޮންޑުތަކުގެ އިތުރުން، ސެކަންޑަރީ މާކެޓުގައި ދައުރުވާ މާލީ ސެކިއުރިޓީތަކުގެ މުއާމަލާތްތައް ދެން ކުރިއަށްދާނީ މި އެކްސްޗޭންޖް މެދުވެރިކޮށެވެ.

ރާއްޖޭގެ ހިއްސާގެ ބާޒާރުގައި ސަރުކާރުގެ ފުރިހަމަ ބާރު ހިނގާ މިފަދަ ކުންފުންޏެއް އުފެއްދިއިރު، މިހާރު ރާއްޖޭގައި ސެކިއުރިޓީސްތަކާއި ހިއްސާ ލިސްޓުކޮށްގެން ހިންގަމުން އަންނަ މޯލްޑިވްސް ސެކިއުރިޓީސް އެކްސްޗޭންޖް (އެމްއެސްއީ) އަކީ އަމިއްލަ ވިޔަފާރިތަކުގެ ހިއްސާ އޮންނަ ކުންފުންޏެކެވެ. ރާއްޖޭގެ މުޅި ހިއްސާގެ ބާޒާރު ރެގިއުލޭޓްކޮށް ބަލަހައްޓާ މައި މުއައްސަސާއަކީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އެވެ.