މިރޭ ފަށާ އިދިކޮޅު މައި ޕާޓީ (އެމްޑީޕީ) ގެ ކޮންގްރެސްގައި އެ ޕާޓީގެ ރައީސާއި ނައިބު ރައީސްގެ މަގާމު އުވާލުމަށް އަސާސީ ގަވާއިދަށް އިސްލާހު ހުށަހަޅަން ނިންމައިފި އެވެ.

އާ އަސާސީ ގަވާއިދުގައިވާ ގޮތުން އެމްޑީޕީގެ އެންމެ އިސް ފަރާތަކީ ޗެއާޕާސަން އެވެ. އަދި ދެން އެންމެ އިސްކޮށް ތިއްބަވާނީ ޗެއާޕާސަންގެ ނައިބުން ކަމަށްވާއިރު، ޕާޓީ ހިންގުމުގެ މުޅި މަސްއޫލިއްޔަތު އޮންނާނީ އެ ބޭފުޅުންގެ އަތްމަތީގަ އެވެ. ޕާޓީގެ ރައީސާއި ނައިބު ރައީސްގެ މަގާމު އުވާލުމަކީ، އެމްޑީޕީގެ ޗެއާޕާސަން ފައްޔާޒު އިސްމާއިލް ކުރިންވެސް ފާޅުކުރައްވާފައިވާ ހިޔާލެކެވެ.

އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ތައްޔާރުވަމުންދާއިރު، އެ ދެ މަގާމުވެސް މިވަގުތު އޮތީ ހުސްކޮށެވެ. އެ މަގާމުތައް ހުސްވީ، އިންތިހާބަކާ ނުލައި އެމްޑީޕީގެ ރައީސްކަމަށް އިންތިހާބުވެވަޑައިގެންނެވި ކުރީގެ ފޮރިން މިނިސްޓަރު އަބްދުﷲ ޝާހިދު، އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށްޓަކައި އިސްތިއުފާ ދެއްވުމުންނެވެ. އަދި އެ ކެމްޕެއިންގައި އަމަލީގޮތުން ބައިވެރިވެވަޑައިގަތުމަށްޓަކައި، ނައިބު ރައީސްގެ މަގާމުގައި ހުންނެވި ހިސާން ހުސެއިންވެސް ވަނީ އިސްތިއުފާ ދެއްވާފަ އެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވީ، ކޮންގްރެސްއަށް ވަރަށް ބޮޑު ތަރުހީބެއް ލިބެމުންދާ ކަމަށާއި މިހާތަނަށް 980 އަށްވުރެ ގިނަ ބައިވެރިން ރަޖިސްޓްރީވެފައިވާ ކަމަށެވެ.

އިލެކްޝަންސް ކޮމިޝަން (އީސީ) ގެ ދަފްތަރުން ދައްކާގޮތުގައި 55,399 މެންބަރުންނާއެކު އެމްޑީޕީއަކީ މިވަގުތު ރާއްޖޭގައި އޮތް ދެވަނައަށް އެންމެ މެންބަރުން ގިނަ ސިޔާސީ ޕާޓީ އެވެ.