އީރާނު އެކަހެރިކުރުމަށްޓަކައި އެމެރިކާއިން ކުރިއަށްގެންދާ އިގްތިސާދީ ކެމްޕޭން ފުޅާކުރުމުގެ ގޮތުން، އެ ގައުމުގެ ރޭލާއި އޮޓޯ ދާއިރާގެ އިތުރުން އެ ދާއިރާތަކަށް ތަކެތި ފޯރުކޮށްދޭ ބޭރުގެ ކުންފުނިތަކާ ދެކޮޅަށް ޓްރަމްޕްގެ ސަރުކާރުން ދަތިކުރުމުގެ ފިޔަވަޅުތައް އަޅާފައިވާ ކަމަށް ޓްރެޜަރީ ޑިޕާޓްމަންޓުން ބުރާސްފަތި ދުވަހު ހާމަކޮށްފި އެވެ.

މި ފިޔަވަޅުތަކަކީ އޯގަސްޓް 24 ގައި އިއުލާނުކުރި "އޮޕަރޭޝަން އިކޮނޮމިކް އައުޓްކާސްޓް" ގެ ބައެކެވެ. މީގެ މައިގަނޑު މަގްސަދަކީ ހަނގުރާމައާއި، މިސައިލް އުފެއްދުމާއި، ސައިބާ ހަމަލާތަކުގެ އިތުރުން އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އަށް ބޭނުންވާ ފައިސާ ލިބޭނެ މަގުތައް ބަންދުކުރުމެވެ.

މި ފިޔަވަޅުތަކާއެކު، އެމެރިކާއިން އީރާނަށް ދެމުންދާ އިގްތިސާދީ ފިއްތުންތައް ކަނޑުގެ އިތުރުން އެއްގަމު މަގަށްވެސް މިވަނީ ފުޅާވެފަ އެވެ. މިއީ ހޮރްމުޒް ކަނޑުއޮޅިން ތެޔޮ ބޭރުކުރުމަށް ހުރަސްއެޅުމާ ގުޅިގެން އީރާނުން ބަރޯސާވާން ފެށި ދާއިރާތަކަށް އަމާޒުކޮށް އެޅި ފިޔަވަޅުތަކެކެވެ. ނަމަވެސް، މި ފިޔަވަޅުތަކުގެ ސަބަބުން އީރާނުގެ އާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހިދާނެ ކަމަށް މާހިރަކު ވަނީ ލަފާކޮށްފަ އެވެ.

އީރާނުގެ ބަނދަރުތައް އެމެރިކާއިން ބަންދުކުރުމާ ގުޅިގެން، ޕެޓްރޯލިއަމާއި، ގަސްކާނާއާއި، ކެމިކަލް ފަދަ ތަކެތި އުފުލުމަށް އީރާނަށް ވަނީ އުޅަނދުފަހަރާއި ރޭލަށް ބަރޯސާވާން މަޖުބޫރުވެފަ އެވެ. ބުރާސްފަތި ދުވަހު އެޅި ފިޔަވަޅުތައް އަމާޒުކޮށްފައިވަނީ އެ ވަސީލަތްތަކަށް ކަމަށް ޓްރެޜަރީ ޑިޕާޓްމަންޓުން ބުނެ އެވެ.

ދަތިކުރުމުގެ ފިޔަވަޅު އެޅި ކުންފުނިތަކުގެ ތެރޭގައި 'އީރާން ޚޮދްރޯ ކޮމްޕެނީ' (އައިކޭސީއޯ) އާއި 'ސައިޕާ އީރާނިއަން އޮޓޯމޮބައިލް މެނުފެކްޗަރިން ކޮމްޕެނީ' (ސައިޕާ) ހިމެނެ އެވެ. ޓްރެޜަރީން ބުނި ގޮތުގައި މި ދެ ކުންފުންޏަކީ އީރާނުގެ އޮޓޯ މާކެޓުގެ 90 އިންސައްތައަށްވުރެ ބޮޑު ބައެއް ހިއްސާކުރާ ދެ ކުންފުންޏެވެ.

މީގެ އިތުރުން، ދައުލަތުގެ 'އިސްލާމިކް ރިޕަބްލިކް އޮފް އީރާން ރޭލްވޭ ކޮމްޕެނީ' އާއި، ފަސިންޖަރުން އުފުލާ 'ރާޖާ ޕެސެންޖާ ޓްރެއިންސް ކޮމްޕެނީ' އަދި އަމިއްލަ މުދާ އުފުލާ އެންމެ ބޮޑު އެއް ކުންފުނި ކަމަށްވާ ރޭލްވޭ ޓްރާންސްޕޯޓޭޝަން ކޮމްޕެނީ އާ ދެކޮޅަށްވެސް ވަނީ ފިޔަވަޅު އަޅާފަ އެވެ.

ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވި ގޮތުގައި، މި ފިޔަވަޅުތަކަކީ އީރާނަށް އެހީތެރިވެދޭ ފަރާތްތަކަށް ސީދާ އަމާޒުކޮށް، އެ ގައުމުގެ ވެރިކަމަށް ލިބޭ އާމްދަނީ އެއްކޮށް ހުއްޓުވުމަށް އެމެރިކާއާއި ބައިވެރިން ކުރާ މަސައްކަތުގެ ބިންގަލެކެވެ.

އަދި އީރާނުގެ އޮޓޯ ސިނާއަތަށް ތަކެތި ފޯރުކޮށްދޭ އިންޑޮނޭޝިއާ، ޔޫއޭއީ އަދި ތުރުކީގެ ބައެއް ކުންފުނިތަކަށްވެސް ބުރާސްފަތި ދުވަހު ވަނީ ފިޔަވަޅު އަޅާފަ އެވެ.

ދަތިކުރުމުގެ ފިޔަވަޅުތަކާބެހޭ މާހިރު ބްރެޓް އެރިކްސަން ވިދާޅުވީ، ކަނޑުގެ މަގުން އީރާނު ފިއްތާލުމަށްފަހު، ވައިގެ މަގުން އެކަހެރިކޮށް، މިހާރު ވޮޝިންޓަނުން މަސައްކަތް ކުރަމުންދަނީ އެއްގަމު މަގުން އެ ގައުމުގެ އިގްތިސާދީ ނާރުތައް ބަންދުކުރުމަށް ކަމަށެވެ. އަދި މިފަދަ ގޮތަކަށް އިގްތިސާދެއް ހުއްޓުވާލާއިރު، އެ އިގްތިސާދަށް ބަރޯސާވާ އާންމު ރައްޔިތުންގެ ދިރިއުޅުމަށް އޭގެ ނޭދެވޭ އަސަރު ނުކޮށް ނުދާނެ ކަމަށްވެސް އޭނާ ފާހަގަކުރެއްވި އެވެ.