ކައުންސިލްތަކުގެ ރައީސާއި ނައިބު ރައީސް ފިޔަވައި އެހެން މެންބަރުން ޕާޓް ޓައިމް ބަޔަކަށް ހަދަން އެމްޑީޕީގެ ކޮންގްރެސްއަށް ހުށަހެޅި ސިޔާސަތު ކަރުދާހަށް ދެކޮޅު ހަދަން ފަށައިފި އެވެ.

މިއަދު ކުރިއަށްދިޔަ ބަހުސްގައި ބައެއް ފަރާތްތަކުން ތާއީދު ނުކުރަނީ ޕާޓް ޓައިމް ބަޔަކަށް ކައުންސިލްތަކުގެ މެންބަރުން ހެދުމާ އެވެ. ނަމަވެސް ކައުންސިލްތަކުގެ މުވައްޒަފުން ނެގުމުގެ ބާރު ކައުންސިލަށް ދިނުމާއި ކައުންސިލަށް ދޭ ބްލޮކް ގްރާންޓް 15 ޕަސެންޓަށް ބޮޑުކުރަން ހުށަހެޅިފައިވާ ބަޔަށް ވާހަކަދެއްކި އެންމެން ވެސް ތާއީދު ކުރި އެވެ.

އެމްޑީޕީގެ ކުރީގެ ޗެއާޕާސަން މާރިޔާ އަހްމަދު ދީދީ ވިދާޅުވީ އަންހެނުންގެ ކޮމިޓީތައް ވެސް ޕާޓް ޓައިމްކޮށް އޮތުމުން ރަނގަޅަށް ނުހިނގައިގެން ފުލްޓައިމް ބަޔަކަށް ބަދަލުކުރި ކަމަށެވެ.

ކުޅުދުއްފުށީ ސިޓީގެ ޑެޕިޔުޓީ މޭޔަރު އަހްމަދު އަބްދުﷲ ވިދާޅުވީ ޕާޓް ޓައިމްކޮށް ކައުންސިލަރުން ތިބުމުން ކަންކަމާ މަޝްވަރާކުރަން އެކަށީގެންވާ ވަގުތު ނުލިބޭނެ ކަމަށެވެ.

އެކަމާ ގުޅޭގޮތުން އެ ގަރާރު ހުށަހެޅުއްވި ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވިދާޅުވީ އެއީ ފެންނީ ބޭފުޅުންގެ ލަފާގެ މަތިން އޭނާ ހުށަހެޅުއްވި ހުށަހެޅުމެއް ކަމަށެވެ. އަދި އެކަމަށް ތާއީދު ނުކުރެވޭނެމަ، އެ އިސްލާހު ނުގެނަޔަސް މައްސަލައެއް ނެތް ކަމަށް އޭނާ ވިދާޅުވި އެވެ.