ބޮލީވުޑްގެ އެންމެ މަގުބޫލު ޖޯޑުތަކުގެ ތެރޭގައި ހިމެނޭ ސަލްމާން ހާން އާއި ކަރިޝްމާ ކަޕޫރުގެ ރީޔޫނިއަންއެއް "ކޮފީ ވިތު ކަރަން"ގައި ފެނިގެން ގޮސްފި އެވެ.

90ގެ އަހަރުތަކުގެ ރަން ޒަމާނުގައި ކާމިޔާބު ގިނަ ފިލްމުތަކެއް ކުޅުނު މި ދެތަރިންގެ ގާތްކަމާއި އެކުވެރިކަން މި ޝޯއިން ވަނީ އަނެއްކާވެސް ފެނިގެން ގޮސްފަ އެވެ.

ކަރަން ޖޯހަރުގެ މި މަޝްހޫރު ޝޯގެ ނުވަވަނަ ސީޒަނުގެ ފެށުން ފާހަގަ ކޮށްލެވުނީ ސަލްމާން އަދި ކަރިޝްމާގެ ހަނދާންތަކުން ފުރިގެންދިޔަ ހާއްސަ އެޕިސޯޑަކުންނެވެ.

މި އެޕިސޯޑުގައި އެ ދެތަރިން ވަނީ އެމީހުންގެ ޒުވާން އުމުރުގެ ފިލްމީ މަސައްކަތްތަކާއި، ޝޫޓިންތަކުގެ ތެރޭގައި ދިމާވި މަޖާ ކަންކަމުގެ އިތުރުން ވޭތުވެދިޔަ އަހަރުތަކުގެ ތެރޭގައި އެކުވެރިކަން ދަމަހައްޓާފައިވާ ގޮތުގެ މައްޗަށް އަލިއަޅުވާލާފަ އެވެ.

ސަލްމާންއާއި ކަރިޝްމާ ކުޅެފައިވާ ފިލްމުތަކަކީ ދިވެހިންގެ މެދުގައިވެސް ވަރަށް ބޮޑު މަގުބޫލުކަމެއް ހޯދާފައިވާ ފިލްމުތަކެކެވެ. އޭގެ ތެރޭގައި އަންދާޒް އަޕްނާ އަޕްނާ، ޖުޑްވާ، ބީވީ ނަމްބަރު އަދި ދުލްހަން ހަމް ލޭ ޖާޔޭންގޭ ހިމެނެ އެވެ.

މި ފިލްމުތަކަކީ މިއަދުވެސް ބެލުންތެރިން ފޫހިކަމެއް ނެތި ބަލަމުން އަންނަ ކާމިޔާބު ފިލްމުތަކެކެވެ. "ކޮފީ ވިތު ކަރަން"ގެ މި ބައްދަލުވުމުގައި އެމީހުންގެ އެންމެ ލޯބިވާ ފިލްމުތަކާއި ހަނދާންތައް ވަނީ އާކޮށްފަ އެވެ.

މި އެޕިސޯޑުގެ އެންމެ ހާއްސަ އެއް ބަޔަކަށްވީ، ކަރަން ޖޯހަރުގެ މަޝްހޫރު "ރެޕިޑް-ފަޔާ" ސެގްމެންޓް ކުރިއަށް ގެންދިއުމަށް ކަރިޝްމާއާ ހަވާލު ކުރުމެވެ.

މިއާއެކު ދެތަރިންގެ ދެމެދުގައި ދެކެވުނު ވާހަކަތަކާއި، އެކަކު އަނެކަކަށް ސަމާސާ ކުރުމުގެ ތެރެއިން އެމީހުންގެ އެތައް އަހަރެއްގެ ގާތް ރަޙުމަތްތެރިކަން ވަރަށް ރަނގަޅަށް ހާމަވެގެން ދިޔަ އެވެ.

މި ޚާއްސަ ރީޔޫނިއަންގެ ސަބަބުން ބޮލީވުޑްގެ ރަން ޒަމާނުގެ ހަނދާންތައް އާވެ، ފޭނުންގެ މެދުގައި މި ދެތަރިންނަށް އޮތް ލޯބި ވަނީ ބޮޑުވެފަ އެވެ.