ބޮލީވުޑްގެ އައިޓަމް ލަވަތަކުގެ ރާނީ، ނޯރާ ފަތްހީގެ އާ ލަވަ "ނާޗް މެރި ރާނީ" ރިލީސްކޮށްފި އެވެ. ލަވަ ކިޔުންތެރިޔާ ގުރޫ ރަންދަވާ އާއެކު ފެނިގެންދާ މިލަވައަކީ އަނެއްކާވެސް ލަވަ ޗާޓުތަކުގެ 1 ވަނައަށް އަރާނެހާ ޗާލު ލަވައެކެވެ.

ލޭ ކައްކުވާލާ ފަދަ ބީޓުތަކެއް ހިމެނޭ މިލަވައަކީ އިންޑިޔާގެ ސްކްރީންތަކަށް އާ ކޮންސެޕްޓަކަށް ތައްޔާރުކޮށްފައިވާ ލަވަ އެކެވެ. އެގޮތުން މިލަވަ ނަގާފައިވަނީ ވާޗުއަލް ޓެކްނޮލޮޖީ އާއި ވީއެފްއެކްސް ބޭނުންކޮށްގެން ނެވެ. ލަވައިގެ މަންޒަރުތަކުން ފެންނަ ގޮތުގައި ނޯރާ އަކީ ސައިންޓިސްޓް، ރަންދަވާ އުފައްދާ ރޮބޮޓެ ކެވެ.

ގުރޫ ރަންދަވާ އާއި ނިކީތާ ގާންދީގެ އަޑުން ލަވަ ގެނެސްދީފައި ވާއިރު، ލަވައިގެ ލިރިކްސް ލިޔެ މިޔުޒިކް ކޮމްޕޯސްކޮށްފައި ވަނީ ތަނީޝް ބަގްޗީ އެވެ.

https://www.youtube.com/watch?v=TCx1yMegJ4A

ގަރްމީ، ދިލްބަރު އަދި އޯ ސަކި ސަކި ފަދަ ލަވަތަކުން ހޯދި ކާމިޔާބީއިން ކެނެޑާއަށް ނިސްބަތްވާ ތަރި ވަނީ ބޮލީވުޑްގައި އެންމެ ނަން ހިގާ ނެށުންތެރިންގެ ތެރޭގައި ހިމެނިފަ އެވެ. އެގޮތުން ސޮނީގެ އިންޑިޔާ ބެސްޓް ޑާންސާގެ ޖަޖް މަލައިކާ އަރޯރާ ކޮވިޑަށް ފައްސިވުމާއި އެކު މަލައިކާ ބަލިން ރަގަޅު ވަންދެން ބަދަލު ޖަޖެއްގެ ގޮތުގައި ފެނިފައި ވަނީ ނޯރާ ފަތްހީ އެވެ. މަލައިކާ އަލުން ޝޯއާއި ގުޅުމާއި އެކު ނޯރާ ވަނީ ޝޯއަށް އަލްވަދާއު ކިޔާފަ އެވެ. ނަމަވެސް އާންމުންގެ ތަރުހީބާއި އެކު 4 ވަނަ ޖަޖެއްގެ ގޮތުގައި ނޯރާ ޝޯއަށް ގެނައުމަށް ނިންމާފައިވާކަން ސޮނީއިން މިހާރު ވަނީ އިއުލާންކޮށްފަ އެވެ.