ރާއްޖެއަށް ފަތުރުވެރިން ގެނައުމަށް ބުކިން ހަދައިދޭ ބޭރުގެ ޕްލެޓްފޯމްތަކާއި ޓުއާ އޮޕަރޭޓަރުން އަދި ޓްރެވަލް އެޖެންޓުންގެ އަތުން ޓީޖީއެސްޓީ ނެގުމަށް ގާނޫނަށް ގެނައި ބަދަލުތައް އަލުން އިސްލާހުކުރަން ސަރުކާރުން ނިންމައިފި އެވެ.

މިކަން ހާމަކުރެއްވީ ފަތުރުވެރިކަމުގެ ދުވަސް ފާހަގަކުރުމަށް މިރޭ ބޭއްވި ހާއްސަ ޖަލްސާގައި ވާހަކަފުޅު ދައްކަވަމުން ޓޫރިޒަމް މިނިސްޓަރު މުހައްމަދު އަމީން އެވެ.

މިނިސްޓަރު އަމީން ވިދާޅުވީ، ބޭރުގެ އެޖެންޓުންނާއި ޓުއާ އޮޕަރޭޓަރުންގެ އަތުން ޓެކްސް ނަގާ ގޮތަށް މިދިޔަ މަހު ޓެކްސްއާ ބެހޭ ގާނޫނު ތަސްދީގު ކުރުމާ ގުޅިގެން، ރާއްޖޭގެ ފަތުރުވެރިކަމުގެ ސިނާއަތުގެ އިތުރުން ބޭރުގެ ޓުއާ އޮޕަރޭޓަރުންގެ ފަރާތުން ކަންބޮޑުވުންތަކާއި ގިނަ ޝަކުވާތަކެއް ލިބިފައިވާ ކަމަށެވެ. އަދި މި މައްސަލައަށް ހައްލެއް ހޯއްދަވައިދެއްވުމަށް ރައީސް މުހައްމަދު މުއިއްޒު ނިންމަވާފައިވާ ކަމަށް މިނިސްޓަރު ފާހަގަކުރެއްވި އެވެ.

މިވަގުތު ރައީސް ނިންމަވާފައިވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ގާނޫނަށް ވަރަށް އަވަހަށް ބަދަލުތަކެއް ގެންނަން ކަމަށް އަމީން ވިދާޅުވި އެވެ.

ޓެކްސް ނެގުމުގެ ނިޒާމުގައި ހުރި ދަތިތައް ހައްލުކުރުމުގެ ގޮތުން ގެނައި މި ބަދަލުތަކާ އެކު، ބޭރުގެ ޓްރެވަލް އެޖެންޓުންގެ އަތުން 299.3 މިލިއަން ރުފިޔާ އަދި ފޮރިން ޓުއާ އޮޕަރޭޓަރުންގެ އަތުން 1.3 ބިލިއަން ރުފިޔާ ހިމެނޭހެން، ދައުލަތަށް އަހަރަކު 1.6 ބިލިއަން ރުފިޔާ އިތުރުވާނެ ކަމަށް ވަނީ ލަފާކޮށްފަ އެވެ. ނަމަވެސް، މި ގާނޫނަށް އަމަލުކުރަން ފެށުމާ ގުޅިގެން ޔޫރަޕްގެ ބައެއް ޓުއާ އޮޕަރޭޓަރުން ވަނީ ރާއްޖެއަށް ބުކިން ހެދުން ވަގުތީ ގޮތުން މެދުކަނޑާލާފަ އެވެ.

ހަފްލާގައި އިތުރަށް ވާހަކަދައްކަވަމުން މިނިސްޓަރު ވިދާޅުވީ، ރާއްޖޭގެ ފަތުރުވެރިކަމަށް 54 އަހަރު ފުރިގެން ދިޔައިރު، ދުނިޔޭގެ އެންމެ މަގުބޫލު އެއް މަންޒިލަށް ރާއްޖެ ވެގެން ދިޔައީ ދާއިރާގައި މަސައްކަތްކުރާ ފަރާތްތަކުގެ ބުރަ މަސައްކަތުން ކަމަށެވެ. އަދި މެދުއިރުމަތީގެ ހަނގުރާމައިގެ ސަބަބުން މި ސިނާއަތަށް ގޮންޖެހުންތަކެއް ކުރިމަތިވި ނަމަވެސް، އެ ހާލަތުން އަރައިގަނެ ފަތުރުވެރިން އަންނަ މިންވަރު އަލުން ރަނގަޅުވަމުން އަންނަ ކަމަށްވެސް އޭނާ ވިދާޅުވި އެވެ.

މި ލިޔުމާ ގުޅޭ އިތުރު ލިޔުން
Beyruge agent in athun TGST nagaathee, usoolu alun muraajaa kuran govaalaifi ބޭރު އެޖެންޓުން އަތުން ޓެކްސް ނަގާ އުސޫލު މުރާޖައާކުރަން އެދިއްޖެ
Beyruge Tour operatarun Raajjeyge booking thah negun huttaalanee ބޭރުގެ ޓުއާ އޮޕަރޭޓަރުން ރާއްޖޭގެ ބުކިންތައް ނެގުން ހުއްޓާލަނީ
Tour oporaterun ge athun tax negun faskohdheyn MP Mohamed Ibrahim edhijje ޓުއާ އޮޕަރޭޓަރުންގެ އަތުން ޓެކްސް ނެގުން ފަސްކޮށްދޭން އެދެފި