ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނައިބު ރައީސް އީވާ އަބްދުﷲ މަގާމުން ވަކިކުރުމަށް ގޮވާލައި ހެދި އޮންލައިން ޕެޓިޝަންގައި މިހާތަނަށް 500 އަށްވުރެ ގިނަ މީހުން ސޮއިކޮށްފި އެވެ.

މަޖިލީހުގެ ރައީސް ނަޝީދަށާއި، ނައިބު ރައީސް އީވާގެ މައްޗަށް އިތުބާރު ނެތް ކަމުގެ ވޯޓު ނަގަން މިއަދު ފަށާފައިވާއިރު، މި ޕެޓިޝަން އޮންލައިންކޮށް ކުރިއަށް ގެންދަނީ "#އިމްޕީޗް ނަޝީދު" ގެ ނަމުގަ އެވެ. މި ޕެޓިޝަން ފެށީ، 100 މީހުންގެ ސޮއި ހޯދުމަށެވެ.

އެގޮތުން 100 ހަމަވުމާ އެކު 500 ސޮއި ހޯދުމަށް އަމާޒު ހިފާފައި ވާއިރު، 500 ހަމަވުމާއި އެކު މިހާރު ޕެޓިޝަން ވަނީ 1،000 ސޮޔަށް އަމާޒު ހިފައިފަ އެވެ.

އެ ދެބޭފުޅުން މަގާމުން ވަކިކުރުމަށް ވޯޓު ނަގަން ފަށާފައިވަނީ، ބަންގްލަދޭޝްގެ ރައްޔިތެއް ކަމަށްވާ އަލަމްގިރިއާ އެކު އެއްޖިންސުން ގުޅުން ހިންގި ކަމުގެ ތުހުމަތުގައި މަޖިލީހުގެ ރައީސް ނަޝީދުގެ ކޮއްކޮ ހައްޔަރުކުރުމާ ގުޅިގެން އޭނާގެ ދިފާއުގައި ނަޝީދު ސަރުކާރަށް ފާޑުވިދާޅުވުމާ ގުޅިގެންނެވެ.

އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހިލޭ އަންހެނަކާ އެކު ޒިނޭ ކުރިކަމަށް ރައީސް ނަޝީދު ތުހުމަތުކުރައްވާފައިވާއިރު، އީވާ ވެސް ވަނީ ރައީސް ޞޯލިހް ރާ ފޮދު ހިއްޕަވާކަމަށް ތުހުމަތު ކުރައްވައިފަ އެވެ.

ރައީސް ނަޝީދާއި އީވާ މަގާމުން ވަކިކުރުމަށް ބައެއް މެންބަރުންނާއި ބައެއް އާންމުން ވެސް ގޮވާލަމުން ގެންދާއިރު މަޖިލިސް މި ވަގުތު އޮތީ ޗުއްޓީގަ އެވެ. ރައްޔިތުންގެ މަޖިލީހުގެ ޖަލްސާތައް އަލުން ފަށާނީ އޮގަސްޓް މަހުގެ ތެރޭގަ އެވެ.