ލޯކަލް ކައުންސިލް އިންތިހާބު ބާއްވާނެ ދުވަހެއް މިއަދު ކަނޑައަޅާނެ ކަމަށް އިލެކްޝަންސް ކޮމިޝަނުން ބުނެފި އެވެ.

އެ ކޮމިޝަނުގެ ރައީސް އަހުމަދު ޝަރީފް "ހުރިހާ"އާ ވާހަކަދައްކަވަމުން ވިދާޅުވީ އިންތިހާބު ބާއްވާނެ ދުވަހެއް ކަނޑައަޅާނީ އެޗްޕީއޭއާއެކު މިއަދު މެންދުރު އެކެއް ޖަހާއިރު އޮންނަ ބައްދަލުވުމަށްފަހު، ކޮމިޝަނުގެ މެމްބަރުންނާ މަޝްވަރާކުރުމަށްފަހު ކަމަށެވެ.

"އިންތިހާބު ބާއްވާނެ ތާރީހެއް އަޅުގަނޑުމެން މާދަމާ އިއުލާންކުރާނަން. ރޯދައިގެ ކުރިން އިންތިހާބު ބޭއްވޭތޯ މަސައްކަތް މިކުރަނީ،" ޝަރީފް ވިދާޅުވި އެވެ.

އޭނާ ވިދާޅުވީ އިންތިހާބާ ބެހޭ ގާނޫނުގައިވާ ގޮތުން މެއި ނުވައެއްގެ ކުރިން އިންތިހާބު ބާއްވަން ޖެހޭ ކަމަށެވެ.

ޝަރީފް ވިދާޅުވީ އިލެކްޝަންސް ކޮމިޝަންގެ ގައުމީ ލަފާދޭ ކޮމެޓީގެ ބައްދަލުވުމުގައި އިންތިޚާބު ބޭއްވުމަށް ދެ ތާރީޚަކާ ގުޅޭގޮތުން މަޝްވަރާ ކޮށްފައިވާ ކަމަށެވެ. އެގޮތުން އޭޕްރީލް ތިންވަނަ ދުވަހު ނޫނީ އޭޕްރީލް 10ގައި އިންތިޚާބު ބޭއްވުމާ މެދު މަޝްވަރާ ކޮށްފައިވާ ކަމަށެވެ.

އެ ތާރީޚުތަކަށް ގައުމީ ލަފާދޭ ކޮމިޓީން ތާއީދު ކުރާއިރު، ކަންބޮޑުވުންތަކެއް ވެސް ފާޅުކުރި ކަމަށް އިލެކްޝަންސް ކޮމިޝަނުން ބުންޏެވެ. އެ ގޮތުން އެ ތާރީޚުގައި އިންތިޚާބު ބާއްވާއިރު، ގާނޫނީ ގޮތުން އިންތިޚާބު ބާއްވަން ކެންޕެއިން ކުރުމާއި، އިލެކްޝަން އޮފިޝަލުން ތަމްރީން ކުރުމާއި އެނޫން ވެސް ގިނަ ކަންބޮޑުވުންތަކެއް ފާހަގަކޮށްފައިވެ އެވެ.

އިލެކްޝަންސް ކޮމިޝަނުން ބުނީ އެޗްޕީއޭ އިން މިހާރު އެކުލަވާލާފައިވާ ގައިޑްލައިންގެ ތެރެއިން އިންތިޚާބު ބޭއްވުމަކީ ކުރެވޭނެ ކަމެއް ނޫން ކަމަށެވެ. އަދި އެ ގައިޑްލައިންގެ ތެރެއިން އިންތިޚާބު ބާއްވައިފި ނަމަ ކޯޓުން އިންތިޚާބު ބާތިލު ކުރުމުގެ ފުރުސަތު ބޮޑުވެ، ދައުލަތުން މިކުރާ ޚަރަދު އަލުން ކުރަން ޖެހުމަކީ ގާތް ކަމެއް ކަމަށް އެ ކޮމިޝަނުން ބުންޏެވެ